Cakacaka 23 - Vakavakadewa Vou kei na iVola tale eso

Na Vosa i Paula vei Ira na Lewe ni Matabose

¹ E a wanonovi ira matua na lewe ni Matabose o Paula ka sa qai kaya, “Oi kemuni na wekaqu, e galala vinaka sara tu ga na lomaqu ena ka e baleta na noqu bula ena mata ni Kalou me yacova na siga oqo.”

² Sa qai vakarota o Ananaiasa, na Bete Levu, vei ira era tu volekati Paula me ra sabalaka na gusuna.

³ Sa qai kaya vua o Paula, “Na Kalou ena sabalaki iko vakaidina — ai bulubulu boro vulavula o iko! O sa dabe ena i tikotiko oqori mo lewai au me vaka na ka sa tukuna na Lawa, ia o sa qai voroka tale na Lawa ena nomu vakarota me'u sabalaki!”

⁴ E ratou sa qai kaya na tu volekati koya, “Sa rui viavia levu na gusumu vua na Bete Levu ni Kalou!”

⁵ A sauma vakaoqo o Paula, “Kemuni na wekaqu na Isireli, au a sega ni kila ni Bete Levu o koya. Ka ni sa volai tu ena i Vola Tabu, ‘Mo kakua ni vosa vakacacataka e dua na nodra i liuliu na kai nomu.’ ”

Era sa Veivala na Farisi kei Ira na Setoki

⁶ Ia ni sa raica o Paula ni dua na i wase era Setoki ka dua na i wase era Farisi, sa qai kaci yani vei ira na lewe ni Matabose, ka kaya, “Kemuni na wekaqu na Isireli, oi au e dua na Farisi, na luvena tagane na Farisi. Au sa lewai tu oqo ena vuku ni noqu sa vakadinata na i nuinui me baleti ira sa mate ni ra na tucake tale mai na mate.”

⁷ Ia, ni sa oti na nona kaya o ya, sa tubu sara e dua na veileti ena kedra maliwa na Farisi kei ira na Setoki, ka sa tawase rua sara kina o ira sa soqoni vata yani.

⁸ O ira na Setoki era vakabauta ni na sega na tu cake mai na mate, e sega na agilosi, ka sega talega na yalo; ia era sa vakabauta na ka tolutolu o ya na Farisi.

⁹ A sa tubu cake sara na kaukauwa ni veileti kei na kaikaila, ka sa tu cake kina eso na daunilawa era nodra i tokani na Farisi, ka ra veiba vakaukauwa sara, ka kaya, “Keitou sa sega ni raica e dua na cala vua na tamata oqo. De rairai a vosa dina ga vua e dua na yalo se agilosi!”

¹⁰ Ia ni sa tubu me kaukauwa vakalevu sara na veileti ka sa leqataka na komada de ra na qai basuraki Paula vakamatailalai. Sa mani vakaroti ira kina na sotia me ra lako sobu, ka kaliraki koya tani mai, ka kauta ki na i tikotiko ni valu.

¹¹ Ena bogi ni siga o ya, a sa tu raviti Paula na Turaga, ka kaya vua, “Mo kakua ni rere! O sa vakadinadinataki au oti oqo e Jerusalemi, e dodonu vakakina mo vakadinadinataki au talega mai Roma.”

Nakicataki na Bula i Paula

¹² Ni sa siga na vanua, era sa qai nakicataki Paula eso na Jiu. Era sa cakava e dua na bubului ka ra yalataka kina me ra kakua ni kana se gunu me yacova sara ni ra sa vakamatei Paula.

¹³ Era lewe vasagavulu vakacaca o ira sa bukiveretaki Paula oqo.

¹⁴ Era sa qai lako vei ira na bete levu kei ira na qase, ka kaya, “Keimami sa bubuluitaka me keimami kakua ni kania e dua na ka me yacova ni keimami sa vakamatei Paula.

¹⁵ Ia oqo, mo ni tukutuku kina oi kemuni kei ira na lewe ni Matabose vua na komada me kauti Paula sobu mada mai vei kemuni, me vaka ga ni o ni via kila vakavinaka cake na veika me baleti koya. Keimami sa na vakarau toka me keimami vakamatei koya ni bera ni yaco mai ki ke.”

¹⁶ Ia sa rogoca na vere o ya na luve i ganei Paula gonetagane; a sa mani lako sara ki na i tikotiko ni valu ka la'ki tukuna vei Paula.

¹⁷ Sa qai kaciva e dua na turaganivalu o Paula ka kaya, “Kauta mada na cauravou lailai oqo ki vua na komada, e tiko vua e dua na ka me tukuna vei koya.”

¹⁸ Sa qai kauti koya na turaganivalu o ya vua na komada, ka kaya, “Na kaivesu o Paula sa kacivi au, ka kerea me'u kauta mai vei kemuni na cauravou lailai oqo, baleta ni tiko vua e dua na ka me tukuna vei kemuni.”

¹⁹ Sa taura sara na ligana na komada ka tuberi koya vakatikitiki, ka kaya vua, “A cava o via tukuna vei au?”

²⁰ Sa qai kaya o koya, “Era sa lomavata na Jiu me ra kerei kemuni ni mataka mo ni kauti Paula sobu ki na Matabose ena vakanananu de ra via taroga tale na Matabose eso tale na taro me baleti koya.

²¹ Ia mo ni kakua sara ni vakarogoca na nodra kerekere, baleta ni sa sivia e lewe vasagavulu vei ira era sa nakicataki koya tiko. Era sa bubuluitaka tu ni ra na sega ni kana se gunu me yacova ni ra sa vakamatei Paula. Era sa vakarau sara tu ga oqo, ka ra sa namaka wale tikoga na nomuni lewa.”

²² Sa qai kaya na turaganivalu vua na cauravou lailai, “Kakua ni tukuna tale vua e dua ni o sa mai tukutuku oti vei au.” Oti o ya sa mani mai vakatala sara yani.

Sa Kau o Paula ki Vua na Kovana o Vilikesa

²³ Sa qai kacivi rau e rua na turaganivalu na komada, ka kaya vei rau, “Drau vakarautaka e lewe rua na drau na sotia i valu yava, vata kei na vitusagavulu na sotia i valu ose, ka rua na drau na sotia i valu moto me ra lako ki Sisaria ena ciwa na kaloko ena bogi edaidai.

²⁴ Drau vakarautaka talega eso na ose me na vodo kina o Paula, ka kauti koya vei Vilikesa, na kovana.”

²⁵ Sa qai mai vola yani o koya e dua na i vola ka vakaoqo na lewena:

²⁶ “Mai vei Kilotiu Laisiasa, ki vua na turaga dokai, na kovana, o Vilikesa. Ni sa bula!

²⁷ Na tamata ka kau tiko yani oqori sa voleka sara ni ra vakamatei koya na Jiu. Ni'u sa mai kila ni kai Roma o koya, au sa qai kauti ira kina na sotia ka la'ki vakabulai koya mai.

²⁸ Ia ni'u a via kila se cava na ka era a beitaki koya tiko kina, au a mani kauti koya sobu kina ki na nodra Matabose.

²⁹ Au a mani kunea ni beitaki tiko o koya ena dua na ka e baleta na nodra Lawa, ia sa sega ni dua na ka e dodonu me mate kina, se me tiko vakavesu kina.

³⁰ Ia ni sa mai tukuni vei au ni ra sa nakicataki koya tiko na Jiu, au sa vakauti koya sara yani kina oqo vei kemuni, ka'u sa vakaroti ira talega era sa beitaki koya tiko me ra na qai la'ki tukuna e matamuni na ka sa beitaki kina o Paula.”

Sa Kau o Paula ki Sisaria

³¹ Era sa qai kauti Paula na sotia me vaka na veika sa vakaroti vei ira ka kauti koya sara ki na koro o Anitipatiri ena bogi.

³² Ena mataka ka tarava era sa qai lesu tale ki na i tikotiko ni valu na lewe ni mataivalu ni vanua ka ra tomana na i lakolako o ira na lewe ni mataivalu vodo ose.

³³ Era sa mani yaco ki Sisaria, ka ra la'ki solia sara na i vola vua na kovana, ka soli Paula talega vua.

³⁴ Ia ni sa wilika oti na i vola na kovana, sa qai tarogi Paula se o cei na nona yasana. Ia ni sa kila ni kai Silisia o koya,

³⁵ sa qai kaya, “Au na qai rogoca na ka e baleti iko ni ra sa yaco mai o ira era beitaki iko.” Oti o ya sa qai vakarota na kovana me la'ki yadravi tiko o Paula ena vale ni veilewai i Eroti.