Cakacaka 22 - Vakavakadewa Vou kei na iVola tale eso

Na Vosa i Paula vei Ira na Jiu

¹ “Oi kemuni na wekaqu kei kemuni na qase, ni rogoca mada na veika dina au via tusanaka me baleti au.”

² Ia ni ra sa rogoca ni vosa vei ira o koya ena vosa vakaiperiu, era sa tiko lo sara. Sa qai vosa o Paula ka kaya,

³ “Oi au e dua na Jiu, au a sucu mai Tarisu mai Silisia, ia au a susugi ga ena koro oqo, ka'u a gonevuli nei Kamelieli me baleta na kena muri vakadodonu sara na nodra Lawa na noda qase. Au sa dau qarava vagumatua na Kalou me vakataki kemuni kecega o ni tiko eke edaidai.

⁴ Au a dau vakacacani ira vakaukauwa sara na tamata era sa muria na Sala, ka ra la'ki mate sara kina eso. Au a vesuki ira na tagane kei na yalewa ka biuti ira ki valeniveivesu.

⁵ E rawa sara ga ni ra vakadinadinataka ni sa dina na noqu i tukutuku oqo o ira na Bete Levu kei ira kece na lewe ni Matabose. Ni'u a dau taura mai vei ira na nodra i vola vei ira na Jiu mai Tamasiko, ka'u sa dau lako sara me'u la'ki kauti ira mai vakavesu na tamata o ya ki Jerusalemi me ra mai totogitaki kina.”

Sa Tukuna o Paula na Nona Veisau

⁶ “Ia ni'u sa lako tiko ka'u sa voleka yani ki Tamasiko ena dua na sigalevu tutu, sa qai cila vakavolivoliti au vakasauri e dua na rarama levu mai lomalagi.

⁷ Au sa qai bale sobu ki na qele ka'u a qai rogoca e dua na domo ni kaya mai vei au, ‘I Saula! I Saula! A cava o sa vakacacani au tiko kina?’

⁸ Au a qai sauma, ka kaya, “O cei oi kemuni, Turaga?’ Sa qai kaya mai vei au o koya, Oi au o Jisu na kai Nasareci, o koya o sa vakacacana tiko.’

⁹ E ratou a raica na rarama o ya o iratou ka tiko vata kei au, ia e ratou a sega ga ni rogoca na domo i koya ka a vosa vei au.

¹⁰ Au sa qai kaya tale, ‘Kemuni na Turaga, a cava me'u cakava?’ Sa qai kaya vei au na Turaga, ‘Mo tucake, ka lako i Tamasiko. Ena qai tukuni vei iko maikea na ka kece sara sa lesia oti tu vei iko na Kalou mo cakava.’

¹¹ A sa mataboko na mataqu baleta ni sa rui ramase na rarama o ya, ka ratou sa mani tuberi au ga kina o iratou ka tiko vata kei au me yaco sara ki Tamasiko.

¹² “A tiko voli ena koro o ya e dua na tamata, o Ananaiasa na yacana; e tamata daulotu ka dau muria vakadodonu na noda Lawa, ka sa dokai vakalevu sara o koya vei ira kecega na Jiu era tiko kina.

¹³ E a lako mai vei au ka mai tu e yasaqu, ka kaya, ‘I Saula na taciqu, mo rai tale!’ Ena tiki ni gauna vata sara ga o ya, sa rai vinaka tale kina na mataqu ka'u raici koya sara.

¹⁴ Sa qai kaya vei au o koya, ‘Na Kalou ni noda qase sa digitaki iko mo kila na lomana, mo raici Koya na Yalododonu, ka rogoca na voqa ni domona.

¹⁵ Ni o na dau tukuna vei ira kecega na tamata na veika o sa raica ka rogoca.

¹⁶ Ia oqo, a cava tale mo waraka? Mo tucake, ka papitaisotaki, ka me vakasavasavataki laivi na nomu i valavala ca mai na nomu masuti koya.’

Sa Kacivi o Paula me La'ki Vunau Vei Ira na Kai Matanitu Tani

¹⁷ “Ia ni'u sa lesu tale mai ki Jerusalemi, au a mani la'ki masu tiko ena Valenisoro. Au a qai raica e dua na raivotu.

¹⁸ Au a raica na Turaga ni kaya tiko vei au, ‘Vakatotolo ka biuti Jerusalemi sara, ni ra na sega ni vakabauta na nomu i tukutuku baleti au.’

¹⁹ Au a qai kaya vua, ‘Turaga, era sa kila vinaka sara tikoga ni'u a dau curuma na veivalenilotu ka vesuki ira ka vakanakuitataki ira era sa vakabauti kemuni.

²⁰ Ena gauna sa vakamatei kina na nomuni tamata o Sitiveni, au a tu sara ga e kea, ka'u a vakadonuya tu na nona vakamatei, ka'u a maroroya voli na nodra i sulu o ira ka vakamatei koya.’

²¹ Sa qai kaya vei au na Turaga, ‘Mo lako ga, ni'u sa na talai iko vakayawa kivei ira na kai matanitu tani.’ ”

Na Ka e Qai Yaco ena Vuku ni Vosa i Paula

²² Era a vakarogoci koya vakavinaka tiko me yacova ni sa cavuta na vosa o ya. Era sa qai tabalaka cake mai na domodra, ka kaya, “Me kau tani e vuravura na tamata vakaoqo! Sa sega ni dodonu me bula tiko!”

²³ Ia ni ra sa qoqolou tikoga, ka cebuceburaka na nodra i sulu, ka kaburaka ki macawa na kuvu ni qele,

²⁴ sa qai vakarota na komada me kau ki na i tikotiko ni valu o Paula. A sa kaya talega me vakanakuitataki ka vakatarogi, me kilai kina na vu ni nodra qolouvaki koya na Jiu.

²⁵ Ia ni ra sa vesuki koya tu me sa kanakuita, sa qai kaya o Paula ki vua na turaganivalu ka duri tu e kea, “E tara li vei kemuni mo ni vakanakuitataka e dua na kai Roma ni se sega mada ni veilewaitaki ena dua na cala?”

²⁶ Ni sa rogoca na turaganivalu na ka oqo, sa lako sara vua na komada ka tarogi koya, “Na cava o sa cakava oqo? Na tamata o ya e kai Roma!”

²⁷ Sa mani lako na komada ka kaya vei Paula, “Tukuna mada mai vei au, o iko li o kai Roma se sega?” Sa qai sauma o Paula ka kaya, “Io.”

²⁸ A sa kaya na komada, “Oi au, au a sauma e dua na i lavo levu me'u yaco rawa kina me'u kai Roma.” Sa qai kaya o Paula, “Ia o au, au kai Roma ena noqu sucu.”

²⁹ E ratou sa mai biuti koya vakatotolo sara o iratou ka dodonu me ratou la'ki vakatarogi Paula. A sa rere talega na komada ni sa qai kila ni sa kai Roma o Paula, ka ni a vesuki koya talega ena sinucodo.

O Paula ena Matadra na Lewe ni Matabose

³⁰ Ena mataka ka tarava, ni sa via kila na komada na dina ni ka era beitaki Paula tiko kina o ira na Jiu, sa mani sereki koya ka vakarota me ra soqoni vata yani o ira na bete levu kei ira na lewe ni Matabose e cake. A sa qai mai kauti Paula sobu yani o koya ka la'ki vakaturi koya e matadra.