Cakacaka 21 - Vakavakadewa Vou kei na iVola tale eso

Tekivu na i Lakolako i Paula ki Jerusalemi

¹ Keitou sa qai vakamoce vei ira, ka vakarewataka na neitou laca me keitou sa soko vakadodonu sara yani ki na yanuyanu o Kosa; a keitou yaco ki na koro o Roti ena siga ka tarava; a biu o Roti ka keitou gole sara ki na koro o Patara.

² E kea keitou mani raica kina e dua na waqa e vakarau soko tiko ki na yasana o Finisia, ka keitou sa mani vodo sara kina ka soko yani.

³ Keimami soko tiko ka yacova yani e dua na vanua keitou raica rawa kina na yanuyanu o Saipurusi. Keimami sa qai biuti Saipurusi toka ena i mawi ka gole sobu ki na ceva ki Siria, keimami a la'ki kele sara ki na koro o Taia, ni la'ki sobu kina na i usana ni waqa.

⁴ E kea keitou sotava kina eso na tamata vakabauta, ka keitou mani macawa dua vata tiko kei ira. Ena veivakauqeti ni Yalo Tabu, era a cikevi Paula vakaukauwa kina me kakua ni lako sara ki Jerusalemi.

⁵ Ia ni sa oti na neitou gauna vata kei ira, keitou sa qai tomana na neitou i lakolako. Era sa qai lako kece yani mai na i bili ni koro ki na baravi me ra la'ki talaci keitou, o ira kece kei ira na watidra, kei ira na luvedra. Keimami sa qai tekiduru e matasawa, ka masu.

⁶ Sa ia na veivakamocetaki ka keitou sa la'ki vodo sara ki waqa, ka ra sa suka tale o ira ki na nodra veivale.

⁷ Ni sa biu mai o Taia, keimami sa soko sara ki na koro o Toleme. E kea keitou a kidavaki ira kina na tamata vakabauta maikea, ka tiko vata kei ira ena dua ga na siga.

⁸ Ena mataka cake, keimami sa qai biubiu ka yaco sara yani ki Sisaria. Keitou a la'ki curu sara ki na vale i Filipe na dauveivakalotutaki, ka keitou sa mani vakaicili toka kina. O Filipe oqo e dua vei iratou na lewe vitu ka a digitaki mai Jerusalemi me ratou dauniveivuke.

⁹ E ratou sa lewe va na luvena goneyalewa ka ratou dau vunautaka kece na i tukutuku ni Kalou.

Sa Vakasalataki o Paula me Kua ni Lako ki Jerusalemi

¹⁰ Ni sa oti e vica na siga na neitou tiko e kea, sa qai lako sobu mai Jutia e dua na parofita, a yacana o Akapo.

¹¹ A lako sara yani vei keitou ka taura na i vaunisulu nei Paula ka vesuka kina na ligana kei na yavana, ka kaya, “Oqo na ka e kaya na Yalo Tabu, ‘Era na vesuki koya vakaoqo na i taukei ni vau oqo o ira na Jiu mai Jerusalemi, ka soli koya ki na ligadra na kai matanitu tani.’ ”

¹² Ni keitou sa rogoca na veika o ya, keitou sa qai vakamamasu vata kei ira na tamata e kea me kakua ni lako cake ki Jerusalemi o Paula.

¹³ Ia sa qai sauma o Paula, ka kaya, “A cava o ni tagicaka vakaoqo? O ni sa via vakadatuvutaka na lomaqu? Au sa vakarau tu oi au, me sega walega ni'u la'ki vesu ki Jerusalemi, ia me'u mate talega maikea ena vuku ni yaca i Jisu na Turaga.”

¹⁴ Ia me vaka ni sa sega ni rawa me keimami veisautaka na lomana, keimami sa mani laiva ga, ka kaya, “Me yaco ga na loma ni Turaga.”

¹⁵ Ni sa oti e vica na siga e kea, keitou sa qai vakasosolo tale ka lako cake sara ki Jerusalemi.

¹⁶ Era lako vata talega kei keitou eso na tisaipeli mai Sisaria. Era sa qai kauti keitou sara vua e dua na kai Saipurusi me keitou la'ki tiko vua. A yaca ni tamata o ya o Nasoni, ka sa tisaipeli dede sara toka o koya.

Sa La'ki Sikovi Jemesa o Paula

¹⁷ Ia ni keitou sa yaco yani ki Jerusalemi, era sa tavaki keitou mai na vakabauta ena marau.

¹⁸ Ena kena mataka ka tarava, keitou sa qai lako vata kei Paula ka sikovi Jemesa, ka ra a tiko kece talega kina na qase ni lotu.

¹⁹ A sa kidavaki ira o Paula ka sa qai vakadewataka na nona i tukutuku taucoko sara me baleta na veika kece sara sa cakava na Kalou ena nona bula vei ira na kai matanitu tani.

²⁰ Ni ra sa rogoca oti na nona i tukutuku, era sa qai vakalagilagia na Kalou. Era sa qai kaya vua, “I Paula, na weka i keimami, o sa raica na levu ni kedra i wiliwili na Jiu era sa yaco me ra vakabauta, ka ra yalodina talega ena nodra muria na Lawa.

²¹ Sa mai tukuni vei ira ni o sa vakatavulici ira tiko na Jiu kece sara era tiko ena veimatanitu tani me ra biuta tani na Lawa i Mosese, ka tukuna tiko vei ira me ra kakua ni cilivi ira na luvedra se muria na i valavala vaka-Jiu.

²² Era na rogoca vakaidina na nomu sa qai yaco mai oqo. Ia na cava beka me na vakayacori?

²³ Ia e vakaoqo na ka keitou vinakata mo cakava. E ratou tiko oqo e lewe va na tamata e ratou sa kitaka e dua na bubului.

²⁴ Mo lako vata kei iratou ka tomani iratou ena qaravi ni veivakasavasavataki, ka mo sauma na i sau ni nodratou i madrali, me rawa ni tasivori kina na uludratou. Ena vuku ni ka oqo, era na kila kece kina ni sa sega ni dina na veika sa tukuni vei ira me baleti iko, ka ni o sa dau muria talega na Lawa i Mosese o iko.

²⁵ Ia ena vukudra na kai matanitu tani era sa vakabauta, keitou sa vola oti vei ira na neimami lewa, o ya me ra vakatabui ira mai na kena laukana na kakana sa vakacabori oti vei ira na kalou matakau, se mai na dra talega, se mai na manumanu sa kidomoki me mate, ka me ra kakua ni ia na veibutakoci.”

²⁶ Sa qai kauti iratou na tamata o ya o Paula ena siga ka tarava, ka vakasavasavataki koya vata kei iratou. Sa qai curu ki na Valenisoro ka la'ki tukuna kina na siga ena oti kina na veivakasavasavataki, ka me sa na qai vakacabori kina na i madrali me dui baleti iratou yadua.

Sa Vesu o Paula e Valenisoro

²⁷ Ia ni sa vovoleka sara tikoga ni cava na siga vitu, era sa qai raici koya ena Valenisoro eso na Jiu mai Esia. Era sa qai vakasosataki ira kecega na lewe vuqa, ka vesuki Paula.

²⁸ Era sa qoqolou ka kaya, “Oi kemuni na Isireli, ni veivuke mai! Oqo na tamata sa vakatavulici ira tiko na tamata kecega ena veivanua kecega me ra cati ira na noda, me ra cata na Lawa i Mosese kei na Valenisoro oqo. Ia sa yaco sara oqo me la'ki kauti ira mai eso na kai matanitu tani ki na Valenisoro me mai vakadukadukalitaka kina na i tikotiko tabu oqo!”

²⁹ (Era sa kaya oqo me baleta ni ra sa raici rau vata kei Tirofimo na kai Efeso ena loma ni koro, ka ra sa nanuma ni a kauti koya talega o Paula ki na Valenisoro.)

³⁰ A sa yaco e dua na veilecayaki levu ena koro taucoko ka ra sa cici vata yani na tamata, ka tauri Paula, ka yarataki koya ki na tautuba ni Valenisoro; ka sa sogo sara na katuba.

³¹ Ni ra sa vakasaga tikoga me ra vakamatei koya, sa yaco na i tukutuku vua na komada ni matasotia ni Roma ni sa yaco tiko na tiko yavavala mai Jerusalemi taucoko.

³² A sega tale ni wawa na komada ni sa kauta yani vakatotolo eso na sotia kei na turaganivalu ka ra cici sobu vei ira na tamata. Ia ni ra sa raici ira na sotia kei na komada o ira na tamata, sa mudu sara na nodra vaculaki Paula.

³³ Sa qai lako sara yani na komada ka tauri koya, ka vakarota me vesu ena rua na sinucodo. Sa qai taroga vei ira na tu e kea, “O cei na tamata oqo? A cava e cakava?”

³⁴ Era sa qai kacivaka yani eso e dua na ka, ka so e dua tale na ka. Ia ni sa sega ga ni kila rawa o komada na kena dina ena vuku ni levu ni veilecayaki, sa mani vakarota me kau o Paula ki na nodra i tikotiko na sotia.

³⁵ Ni sa yaco o Paula ki na i kabakaba, era sa qai colati koya na sotia ena vuku ni nodra i valavala kaukauwa na tamata o ya:

³⁶ ka ni ra muri tiko yani e dua na i lala levu, ka qolouvaka tiko, “Vakamatea!”

Sa Taqomaki Koya o Paula ena Nona Vosa

³⁷ Ni sa vakarau me curuma yani o Paula na i tikotiko ni valu, a sa qai kaya vua na komada ena vosa Vakirisi, “E rawa beka ni'u tukuna vei kemuni e dua na ka?” Sa qai tarogi koya na turaganivalu, “O sa kila li na vosa Vakirisi?

³⁸ O qai sega li ni o koya na kai Ijipita ka tekivuna e dua na i lawalawa era se tani mai na matanitu ena dua na gauna sa oti o iko, ka liutaki ira yani ki na vanua lala e lewe 4,000 na dauvakamate tamata?”

³⁹ Sa qai sauma o Paula ka kaya, “Oi au e dua na Jiu, au a sucu mai na koro o Tarisu, ka'u lewe ni dua na koro dokai ena yasana o Silisia. Au sa kerei kemuni mo ni laivi au mada me'u vosa vei ira oqo.”

⁴⁰ Sa mani vakadonuya na turaganivalu me vosa o Paula. Sa qai tu o koya ena i kabakaba, ka dodoka yani na ligana vei ira na tamata me vakatakila ni sa vakarau vosa. Ni ra sa tiko lo kece sara, sa qai vosa vei ira ena vosa vakaiperiu.