Cakacaka 19 - Vakavakadewa Vou kei na iVola tale eso

O Paula mai Efeso

¹ Ena gauna e tiko kina mai Korinica o Apolosi sa lakova na veiyasana ena loma ni vanua o Paula ka mani yaco sara ki Efeso. E a kunea e kea eso na tisaipeli,

² ka kaya vei ira, “E vakaevei, o ni sa ciqoma li na Yalo Tabu ena nomuni sa vakabauta se segai?” Era sa qai kaya vua, “Keimami se sega mada ga ni bau rogoca ni dua tiko na Yalo Tabu.”

³ Sa qai kaya vei ira o Paula, “Ia o ni a papitaisotaki ga ena papitaiso cava?” Era sa qai kaya, “Ena papitaiso i Joni.”

⁴ Sa qai kaya o Paula, “A sa veipapitaisotaki o Joni me baleti ira era sa veivutunitaka na nodra i valavala ca; ka sa kaya vei ira na Isireli o koya me ra vakabauti koya sa muri koya tiko yani, ka sai koya o ya o Jisu.”

⁵ Ni ra sa rogoca oqo, era sa qai papitaisotaki sara ena yaca ni Turaga o Jisu.

⁶ A sa tabaki ira o Paula ena ligana, ka sa sobuti ira na Yalo Tabu; ka ra sa vosataka na vosa tani eso, ka vunautaka na vosa ni Kalou.

⁷ E rauta ni lewe tinikarua taucoko na tagane o iratou o ya.

⁸ Sa qai dau curu ki na nodra valenilotu na Jiu o Paula ka dau vosa kina vakadoudou. A sa kitaka tiko o ya o koya me tolu na vula. A sa veivakatavulici ka vakauqeti ira na tamata me baleta na matanitu ni Kalou.

⁹ Ia eso ga era sa lomaqa ka bese ni vakabauta, ka vosacataka na Sala ni Turaga ena matadra na lewe vuqa. Sa mani biuti ira tu yani o Paula ka kauti ira vakatikitiki na tisaipeli. Sa qai dau la'ki veivakavulici tiko ena veisiga ena valenivuli nei Tirano.

¹⁰ E a vakayacora tiko vaka o ya ena loma ni rua na yabaki, me rawa kina ni ra rogoca kina na vosa ni Turaga na tamata kecega era sa tiko mai Esia, o ira na Jiu kei ira talega na kai matanitu tani.

O Iratou na Luve i Sikeva

¹¹ A sa cakava tiko na Kalou na cakacaka mana ka veivakurabuitaki eso ena liga i Paula.

¹² Na i tavoi kei na i sulu eso ka sa tara oti na yagona era sa qai dau kauta na tamata kivei ira na tauvimate, ka sa takali kina vei ira na kedra mate, ka ra lako laivi talega kina na tevoro.

¹³ E ratou a tovolea talega eso na Jiu dauvakasavi tevoro ka ratou dau veilakoyaki voli me ratou cavuta na yaca ni Turaga o Jisu vei ira era curumi tevoro tu, ka kaya, “Au sa vakaroti kemudou tani ena yaca i Jisu, o koya e vunautaka tiko o Paula.”

¹⁴ E ratou a dau cakava tiko na ka oqo e dua na i lawalawa veitacini, o iratou na luvena tagane o Sikeva, e dua na nodra bete levu na Jiu.

¹⁵ Sa qai sauma na tevoro ka kaya vei iratou, “O Jisu ka'u sa kila, o Paula talega ka'u sa kila, ia o cei ga oi kemudou?”

¹⁶ Sa qai rikati iratou na tamata curumi tevoro, ka vakamalumalumutaki iratou sara. E ratou sa qai dro laivi mai na vale o ya: a ratou sa luvawale ka mavoa.

¹⁷ Era a qai rogoca na ka oqo o ira kecega na Jiu kei ira na kai matanitu tani era tiko mai Efeso. A sa tuburi ira kece kina na rere; ka sa tubu cake tikoga na dokai ni yaca ni Turaga o Jisu.

¹⁸ Era sa qai lako yani e lewe vuqa vei ira na tamata vakabauta ka vakatutusa, ka vakaraitaka ena matana levu na veika era a dau cakava e liu.

¹⁹ E lewe levu talega vei ira era daukilakila, era sa kumuna vata na nodra i vola ka la'ki vakama ena matadra kecega. Era a cakacakataka na i sau ni veika kece o ya ka kunea ni rauta e 50,000 na i lavo siliva.

²⁰ A sa tete tikoga yani na vosa ni Turaga ka sega ni tarovi rawa.

O Paula mai Efeso

²¹ Ni sa oti na veika o ya, sa qai nakita e yalona o Paula me sa lakovi rau mada na yasana o Masitonia kei Akaia ka me oti o ya me qai gole sara ki Jerusalemi. A sa kaya, talega, “Ni sa oti o ya, me'u sa na la'ki raici Roma talega.”

²² Sa mani mai talai rau sara yani e lewe rua vei ira na nona i vukevuke, o Timoci kei Erasito, me rau lako ki Masitonia, ka ni se tiko vakalailai tale mada o koya mai Esia.

²³ Ena gauna vata oqo, a sa qai tubu cake mai kina e dua na tiko yavavala mai Efeso ena vuku ni Sala ni Turaga.

²⁴ A sa dua na matai ni kaukamea, o Timitirio na yacana, sa dau cakava voli o koya na i vakatakarakara siliva ni burekalou ni nodra kalou yalewa o Atemisa, ka dau levu sara kina na i lavo era rawata na nona tamata cakacaka.

²⁵ Sa qai kacivi ira vata mai na nona tamata cakacaka o Timitirio kei ira na tamata cakacaka vakamatai tale eso, ka kaya, “Kemuni na noda, o ni sa kila ni sa cakacaka ga oqo eda sa rawata vakalevu sara tiko kina na noda i yau.

²⁶ Ia o ni sa raica tiko ka rogoca na ka sa cakava tiko na tamata oqo o Paula. E kaya tiko ni kalou e cakava na tamata e sega ni kalou dina. Sa vuqa sara na tamata e rawai, e Efeso ka vakakina ena yasana taucoko o Esia.

²⁷ Na leqa e tiko sai koya oqo: ena sega walega ni beci ka rogorogo ca na noda bisinisi ni volivolitaki, ia ena rawa talega ni vakawaletaki kina na burekalou ni yalewa kalou levu o Atemisa, ka kau laivi kina na nona i tutu lagilagi, o koya ka ra sa qarava na tamata kecega e Esia taucoko kei vuravura!”

²⁸ Ni ra sa rogoca na lewe vuqa na veivosa oqo, sa duatani na nodra cudru, ka ra sa tekivu qoqolou, ka kaya, “Sa cecere duadua ga o Atemisa na kalou ni Efeso!”

²⁹ A sa yaco na tiko yavavala ena koro taucoko. Era sa qai tauri Keio vakaukauwa kei Arisitako, oi rau na kai Masitonia ka salavata voli mai kei Paula, ka ra kauti rau vakatotolo sara yani ki na nodra vale ni soqo.

³⁰ E a via lako o Paula me la'ki sotavi ira na lewe vuqa, ia era a qai tarovi koya o ira na tamata vakabauta.

³¹ Era a talatala talega vua o ira eso na i vakailesilesi ni yasana era sa nona i tokani, ka masuti koya me kakua ni douvaka me lako ki na vale ni soqo.

³² A sa yaco tu e dua na veilecayaki levu ena vanua ni soqo: era sa qolouvaka mai e dua na ka o ira eso, ka dua tale na ka o ira eso tale, baleta ni ra sa lewe vuqa era sa sega ni kila se cava na vuna era sa soqoni vata yani kina.

³³ Era sa mani nanuma eso ni a vakavuna na nodra soqoni vata yani o Alekisada, ka ni ra a kauti koya na Jiu me la'ki tu mai liu. Sa qai dodoka yani na ligana o Alekisada me ra tiko lo na tamata ni sa via tauca e dua na vosa me taqomaki koya kina.

³⁴ Ia ni ra sa kila ni sa dua vei ira na Jiu o koya, sa qai tubu vata mai vakadua na domodra ka ra qolouvaka tiko me rauta e rua na aua: “Sa cecere duadua ga o Atemisa na kalou ni Efeso!”

³⁵ A sa qai mani rawata na vunivola ni koro me vakamalumutaka na lomadra na tamata. E a kaya vei ira, “Oi kemuni na kai Efeso, eda sa kila kece sara ni koro o Efeso sai vakatawa ni burekalou nei Atemisa na kalou levu, vata kei na vatu tabu sa lutu mai lomalagi.

³⁶ E sega ni dua na tamata e rawa ni vakalasuya na veika oqo. O koya oqo, mo ni tiko kina vakamalua, ka kakua ni cakava e dua na ka lialia.

³⁷ O ni sa kauti ira mai ki ke na tamata oqo, ia era sega ni butakoca e dua na ka mai na burekalou se ra vosa vakacacataka na noda yalewa kalou.

³⁸ O koya oqo, kevaka sa vinakata kina o Timitirio kei ira na nona matacakacaka me ra beitaka e dua na tamata, sa tu na mataveilewai kei na siga eso ni veilewai; ka me qai vakayacori kina na veibeitaki.

³⁹ Ia kevaka ga e tiko tale na ka o ni vinakata, e rawa ni kunei na kena i wali mai na matabose vakadonui vakalawa ni lewenivanua.

⁴⁰ Ena vuku ni veika sa yaco oti edaidai, eda sa toka oqo ena dua na vanua rerevaki sara, ka sa rawa ni da beitaki ni da vakavuna na tiko yavavala oqo. Sa sega kina ni dua na i ulubale ni veilecalecavi oqo, ka na dredre kina me da vakamacalataka e dua na i sau ni taro vinaka.”

⁴¹ Ni sa tukuna oti na veika oqo, a sa qai vakasukai ira yani.