Cakacaka 15 - Vakavakadewa Vou kei na iVola tale eso

Na Bose mai Jerusalemi

¹ Era a lako sobu mai Jutia ki Anitioki eso na tamata, ka vakatekivu vakatavulica vei ira na vakabauta ni ra na sega ni vakabulai kevaka era sega ni cili me vaka na ka e kaya na Lawa i Mosese.

² E rau a veileti vakalevu ka veiba kina kei ira o Paula kei Panapasa. Era sa mani lesi Paula kina kei Panapasa kei iratou tale eso vei ira mai Anitioki me ratou lako cake ki Jerusalemi kivei iratou na i apositolo kei ira na qase ni lotu ena vuku ni ka o ya.

³ Era sa qai talaci iratou o ira na i soqosoqo lewenilotu, ka ratou sa lakovi Finisia kei Samaria ka talanoataka na nodra sa gole na kai matanitu tani vua na Kalou. Era sa marau vakalevu na vakabauta ena i tukutuku o ya.

⁴ Ni ratou sa yaco yani ki Jerusalemi, era sa kidavaki iratou sara mai na i soqosoqo lotu kei iratou na i apositolo kei ira na qase, ka ratou sa qai tukuna na veika kecega ka sa cakava vata kei iratou na Kalou.

⁵ Ia era sa qai tu cake eso na nodra i lawalawa na Farisi ka ra sa vakabauta, ka kaya, “Sa dodonu me ra cilivi o ira oqori, ka me ra vakaroti talega me ra muria na Lawa i Mosese.”

Na Vosa i Pita

⁶ Era sa qai soqoni vata o iratou na i apositolo kei ira na qase me ra bosea na ka o ya.

⁷ Ia ni sa oti e dua na veileti balavu, sa qai tu cake o Pita ka kaya, “Oi kemuni na veiwekani, o ni sa kila ni sa dede toka na gauna ka a digitaki au kina na Kalou mai na keda maliwa me'u vunautaka na i Tukutuku Vinaka vei ira na kai matanitu tani me rawa ni ra rogoca ka vakabauta.

⁸ A sa vakadinadinataka na ka oqo vei ira na Kalou, o koya sa kila na loma ni tamata kecega, ena nona solia vei ira na Yalo Tabu me vaka ga na nona a solia vei keda.

⁹ E a sega ni vakaduiduitaki keda mai vei ira, ni sa bokoca na nodra i valavala ca o koya ena vakabauta.

¹⁰ A cava na vuna o ni qai via vakatovolea kina na Kalou mo ni vakataqara ena domodra na tisaipeli na i colacola ka ra a sega mada ga ni colata rawa o ira na noda qase se oi keda?

¹¹ E sega! Keirau sa vakabauta ni da na vakabulai ga ena vuku ni nona loloma-savu na Turaga o Jisu, ka sa vaka talega kina o ira.”

¹² Era sa qai tiko vakanomodi na lewe ni bose taucoko, ka vakarogoci Panapasa kei Paula ni rau sa talanoataka na veicakacaka mana kecega kei na veika veivakurabuitaki ka a cakava na Kalou ena ligadrau ena kedra maliwa na kai matanitu tani.

¹³ Ni rau sa tukutuku oti, sa qai vosa cake o Jemesa ka kaya, “Kemuni na veiwekani, ni rogoci au mada!

¹⁴ Sa qai tukuna oti ga oqo o Saimoni na i matai ni gauna me kauta mai kina eso na kai matanitu tani na Kalou, me ra nona.

¹⁵ Koya e duavata kei na nodra vosa na parofita, me vaka sa volai tu ena i Vola Tabu:

¹⁶ ‘Ni sa oti o ya au na lesu mai, sa kaya na Turaga, Ka'u na vakatikora lesu tale na matanitu i Tevita. Au na tara vou na veitikina sa vakacacani Ka vakaukauwataka tale.

¹⁷ Era sa na qai lako mai kina vei au o ira na kena vo ni tamata Kei ira na veimatanitu tani kecega; O ira au sa vakatoka me ra noqu.

¹⁸ Sa i koya o ya na ka e kaya na Turaga, O koya ka a sa vakatakila tu na veika oqo mai na gauna makawa sara.’

¹⁹ A tomana o Jemesa na nona vosa ka kaya, “Sa noqu lewa kina vakaoqo me da kakua ni vakavu leqa vei ira na kai matanitu tani era sa saumaki vua na Kalou;

²⁰ ia me da volavola ga vei ira me ra kakua ni kania na kakana dukadukali era sa vakacabori oti tu vei ira na kalou matakau; me ra kakua ni veibutakoci, se kania e dua na manumanu e vakamatei ni kuna se modroki na domona; ka me ra kakua talega ni gunuva se kania na dra.

²¹ Ni sa dau taura e dua na gauna balavu sara na kena wiliki na Lawa i Mosese ena nodra veivalenilotu na Jiu ena Siga ni Vakacecegu kece sara, ka sa dau vunautaki na nona vosa ena veikorokoro.”

Na i Vola vei Ira na Kai Veimatanitu Tani Era sa Vakabauta

²² E ratou sa qai lewa na i apositolo kei ira na qase, kei ira na i soqosoqo lotu taucoko me ra digitaka eso na tamata mai na kedra maliwa, ka talai ira me ra lako vata kei rau o Paula kei Panapasa ki Anitioki. Era sa qai digitaki Jutasa, ka yacana talega o Parisapa, kei Sailasa; e rau tamata dokai vakalevu vei ira na vakabauta oi rau oqo.

²³ Sa qai vakaoqo na vosa ni vola era vakauta: “Mai vei keitou na i apositolo kei ira na qase, na wekamuni, keimami vakabula yani vei kemuni na weka na lewe ni veimatanitu tani o ni tiko mai Anitioki kei Siria kei Silisia.

²⁴ Keimami sa mai rogoca ni so era a cavutu yani eke era sa la'ki vakaleqai kemuni tiko ena ka era kaya, ka sa veilecayaki kina na nomuni vakasama. Ia keimami a sega ni solia yani e dua na i vakaro vei ira.

²⁵ Keimami sa mani lomavata kece sara kina ka digitaka e lewe rua vei keimami me rau talai yani vei kemuni, me rau lako vata yani kei rau na noda i tokani o Panapasa kei Paula,

²⁶ oi rau ka rau sa solia tu na nodrau bula ki na yaca ni Turaga o Jisu Karisito.

²⁷ Sa i koya o ya keimami sa talai Jutasa yani kina kei Sailasa, ka rau na tukuna talega ena gusudrau na veika keimami sa vola tiko yani oqo.

²⁸ Keimami sa duavata kei na Yalo Tabu me sa kakua ni dua tale na i colacola e soli vei kemuni me i kuri ni veika bibi ga eso ka sa koto oqo:

²⁹ O ya mo ni kakua ni kania e dua na ka sa vakacabori oti kivei ira na kalou matakau; ni kakua ni gunuva se kania na dra, se kania na manumanu ka vakamatei ni modroki na domona; ka kakua talega ni veibutakoci. Kevaka o ni sa qarauni kemuni mai na veika oqori, sa na daumaka sara. Ni sa moce.”

O Iratou na i Apositolo mai Anitioki

³⁰ Sa mani yaco na veitalatala ka ratou sa lako sobu sara ki Anitioki. Ni ratou sa yaco yani, e ratou sa qai vakasoqoni ira vata kece na vakabauta ka solia vei ira na i vola.

³¹ Ia ni ra sa wilika na i vola, era sa sinai ena marau ena vuku ni vosa ni veivakayaloqaqataki e koto kina.

³² E rau sa qai vosa vakabalavu o Jutasa kei Sailasa, ka ni rau parofita talega oi rau. E rau vakauqeti ira na vakabauta ka vakataudeitaki ira talega.

³³ Ni oti e vica na siga na nodratou tiko e kea, era sa qai vakasukai rau tale ena vakacegu o ira na veiwekani kivei ira ka a talai rau yani.

³⁴ [Ia sa mani loma i Sailasa me sa tiko ga e kea.]

³⁵ E rau sa mani tiko voli ga o Paula kei Panapasa mai Anitioki, ka rau vakatavuvulitaka ka vunautaka na vosa ni Turaga, vata kei ira e lewe vuqa.

E Rau sa Tawase o Paula kei Panapasa

³⁶ Ni oti e vica na siga, sa qai kaya o Paula vei Panapasa, “Me daru lako tale mada ka talevi ira na veiwekani ena veikoro e daru sa vunautaka oti kina na vosa ni Turaga, se sa vakaevei tiko na nodra bula.”

³⁷ A mani vinakata o Panapasa me rau kauti Joni Marika.

³⁸ Ia sa nanuma o Paula ni sega ni dodonu me rau kauti koya, baleta ni a sega ni vakaotia vata kei rau na nodrau veiqaravi ni veivakalotutaki taumada, ia sa vuki ga ka biuti rau mai Pamifilia.

³⁹ A yaco kina e dua na veileti katakata, ka rau sa tawase kina o Paula kei Panapasa. Sa mani kauti Marika o Panapasa ka rau soko sara ki Saipurusi.

⁴⁰ Ia sa digitaki Sailasa o Paula ka rau mai lako sara yani, ni sa oti na nodra tataunaki rau ki na loloma-savu ni Kalou o ira na veiwekani.

⁴¹ E a lakova na lomai Siria kei Silisia o Paula ka vakaukauwataki ira na veisoqosoqo lewenilotu e kea.