Cakacaka 12 - Vakavakadewa Vou kei na iVola tale eso

Toso Tikoga na Veivakacacani

¹ Ena gauna ka tukuni tiko oqo, a sa vakatekivu me vakacacana eso na lewe ni soqosoqo lotu o Eroti na tui.

² E a vakamatei Jemesa, na tuakai Joni, ena i seleiwau.

³ Ni sa raica vakaoqo o koya ni ra sa taleitaka na ka o ya o ira na Jiu, a sa la'ki vesuki Pita talega. (E donuya tiko o ya na gauna ni Solevu ni Madrai Sega ni Vakatubu.)

⁴ Ni sa vesuki mai, a sa qai biu o Pita ki valeniveivesu, ka sa soli yani me ratou yadravi koya e va na i wasewase ni matayadra ka ra lewena na veiwasewase yadua e va na sotia. A sa nakita o Eroti me qai la'ki veilewaitaki koya ena matana levu ni sa oti na Solevu ni Lakosivia.

⁵ A sa mani biu o Pita ki na valeniveivesu, ia o ira na i soqosoqo lewenilotu era a sega ni cegu ena masulaki koya vagumatua tiko vua na Kalou.

Sa Sereki mai Valeniveivesu o Pita

⁶ Ena bogi me kena mataka cake me sa kauti Pita kina o Eroti vei ira na lewenivanua, sa moce koto o Pita ena kedrau maliwa e rua na sotia. E a vesu tu o koya ena rua na sinucodo ka ra yadra tale tikoga eso ena matamata ni valeniveivesu.

⁷ Sa qai tu vakasauri e tikina e dua na agilosi ni Turaga, ka sa cila e dua na rarama ena loma ni valeniveivesu. Sa qai tavia na agilosi na taba i Pita ka vakaduria cake, ka kaya, “Totolo! Mo duri cake mada!” A sa tasere sara vakasauri mai ligana na sinucodo.

⁸ A sa qai kaya na agilosi, “Vakadreta na i vau ni tolomu, ka daramaka na nomu i vava.” A sa cakava vakakina o Pita, ka sa kaya kina na agilosi, “Dara na nomu kote balavu, ka muri au mai.”

⁹ Sa mai curu yani ki tautuba o Pita ka muri koya, ka sega ni kila sara tiko se sa ka dina na ka e cakava tiko o ya na agilosi se sega. E nanuma tikoga ni raica tiko e dua na raivotu.

¹⁰ E rau sa siviti iratou sara na i matai ni matayadra, kei na kena i karua. E rau sa mani yaco sara yani ki na matamata kaukamea ka gole ki na koro. E a tadola vaka i koya ga vei rau na matamata, ka rau sa curu sara yani ki tautuba. E rau a lakova sara yani e dua na gaunisala, ka sa qai la'ki laivi koya kina vakasauri na agilosi.

¹¹ Ia ni sa vakilai koya tale o Pita, sa qai kaya, “Au sa qai kila dina sara oqo ni a tala mai na nona agilosi na Turaga, ka sa vakabulai au mai na liga i Eroti kei na nodra i naki kece talega na Jiu.”

¹² A sa vakasamataka na veika kece o ya o Pita, ka sa qai lako ki na vale nei Maria, na tina i Joni Marika, ena vanua era sa soqoni ka masu vata tiko kina e lewe vuqa.

¹³ Ni sa tukituki tiko o Pita ena katuba ni matamata ni bai ni vale, sa lako sara yani me la'ki rogoca o Rota, e dua na goneyalewa veiqaravi.

¹⁴ Ni sa kila o koya na domo i Pita, sa tuburi koya e dua na marau levu ka cici lesu tale ki loma ka a sega mada ga ni bau dolava rawa na katuba, ia sa cici ga ki loma ka la'ki tukuna ni sa tu ena katuba ni matamata o Pita.

¹⁵ Era sa qai kaya vua, “O sa lialia?” Ia sa kaya tikoga o koya ni sa dina o koya. Era sa qai kaya tale, “Oqori na nona agilosi!”

¹⁶ A sa tukituki tikoga o Pita. Era sa qai dolava vua na katuba; ia ni ra sa raici koya, a sa duatani na levu ni nodra kurabui.

¹⁷ Sa qai dodoka yani na ligana vei ira o koya me ra tiko lo, ka sa tukuna vei ira na nona a kauti koya tani mai na Turaga mai valeniveivesu. Sa qai kaya talega, “Ni qai la'ki tukuna na ka oqo vei Jemesa kei ira na kena vo ni vakabauta.” Sa qai lako o koya ki na dua tani tale na vanua.

¹⁸ Ni sa kida cake na mataka, sa ka levu na nodra kidroa na sotia — a cava beka e sa yaco vei Pita?

¹⁹ A sa vakarota o Eroti me ra vakasaqarai koya, ia ni ra sa sega ni kunea, sa qai vaqaqai ira na yadra ka vakarota me ra vakamatei. Ni sa oti oqo, sa qai biuti Jutia o Eroti ka la'ki tiko vakalailai mai Sisaria.

Na Mate i Eroti

²⁰ Ia sa cudruvi ira vakalevu na lewe ni koro e rua o Taia kei Saitoni o Eroti. Era sa mani lako vata me ra la'ki raici koya. Era a tekivu mada vei Pilasito, na i vakailesilesi liu ena vale nei Eroti. Ni ra sa rawai koya oti era sa qai la'ki soro vei Eroti ka kerei koya me ra kakua ni cudruvi, ka ni dau kau tiko mai na kedra kakana mai na nona vanua na tui.

²¹ Ia ena siga sa lokuci tu sa qai daramaka o Eroti na nona i sulu vakatui, ka la'ki dabe ena nona i tikotiko vakaturaga, ka tauca e dua na nona vosa vei ira.

²² Era sa qai qolou vata yani na tamata, ka kaya, “Sa domo ga ni Kalou oqo, sega ni domo ni tamata!”

²³ Sa qai samuti Eroti vakasauri e dua na agilosi ni Turaga ka ni a sega ni vakarokorokotaka na Kalou o koya. A sa kanilaka na yagona na baca ka mani mate sara kina.

²⁴ Ia sa tubu ka tete tikoga na vosa ni Kalou.

²⁵ E rau sa qai lesu tale ki Jerusalemi o Panapasa kei Saula, ni rau sa vakayacora oti na nodrau i tavi, ka rau sa kauti Joni Marika tale tikoga.