Cakacaka 11 - Vakavakadewa Vou kei na iVola tale eso

Na i Tukutuku i Pita ki na Lotu mai Jerusalemi

¹ Era sa mani rogoca na i apositolo kei ira na vakabauta mai Jutia ni ra sa vakabauta talega na vosa ni Kalou o ira na kai matanitu tani.

² Ia ni sa yaco cake yani ki Jerusalemi o Pita, era a qai vakalewai koya o ira na i lala vakabauta ka ra vinakata me ra cilivi talega na lewe ni veimatanitu tani ni ra sa vakabauta.

³ Era kaya vua, “O a la'ki curu ena nodra vale na tawa cili, ka la'ki kana vata sara kei ira!”

⁴ Sa qai vakamacalataka vei ira o Pita na veika sa yaco mai na kena i vakatekivu me vakaoqo:

⁵ “Au a tiko mai na koro o Jopa, ka'u masu tiko. Au a qai raica e dua na raivotu. A lako sobu mai e dua na ka e vaka na i tutuvi levu, ka sa vakalutulututaki sobu mai lomalagi ena tutuna vava, ka yacovi au sara mai.

⁶ Au mani vakaraica matua ka'u raica kina na manumanu yavai va ni vanua, na manumanu kila, na manumanu dau qasi, kei na manumanu vuka ni macawa.

⁷ Au qai rogoca talega e dua na domo ni kaya mai vei au, ‘Duri cake Pita, vakamatea ka kania!’

⁸ Au sa qai kaya, ‘Turaga, me kakua sara vei au! E sega vakadua ni se bau curu ki gusuqu e dua na kakana tabu se tawa savasava.’

⁹ Sa qai vosa tale mai vei au na domo mai lomalagi, ka kaya, ‘Mo kakua ni vakatoka me tawa savasava na ka sa vakasavasavataka na Kalou!

¹⁰ E a yaco vakatolu na ka oqo, ka sa qai kau kece tale ki lomalagi.

¹¹ Ena gauna vata o ya, e ratou sa yaco yani kina e lewe tolu na tamata ki na vale au tiko kina. E ratou a talai yani kivei au mai Sisaria.

¹² E a qai kaya vei au na Yalo Tabu me'u lako vata kei iratou, me kakua ni'u lomalomarua tale. E ratou a salavata kei au e lewe ono vei ira na vakabauta ka keitou la'ki curu sara ki na vale ni tamata o ya.

¹³ Sa qai tukuna vei keitou o koya na nona a raica na agilosi ena nona vale ni tucake tu, ka kaya vua, ‘Mo talatala ki Jopa, me lakovi e dua na tamata, o Saimoni Pita na yacana.

¹⁴ Ena qai tukuna vei iko o koya na vosa mo na bula kina o iko kei ira kecega na lewe ni nomu matavuvale.’

¹⁵ Ni sa tekivu me'u vosa, sa sobuti ira sara na Yalo Tabu me vaka ga na kena sa yaco vei keda ena kena i vakatekivu.

¹⁶ Au sa qai nanuma na vosa ni Turaga, ni sa kaya, ‘Sa papitaisotaki kemudou o Joni ena wai, ia dou na papitaisotaki ena Yalo Tabu.’

¹⁷ Ia kevaka sa solia vei ira na Kalou na i solisoli vata ga ka a solia vei keda ena noda sa vakabauta na Turaga o Jisu Karisito, o cei oi au me'u via tarova na Kalou?”

¹⁸ Ia ni ra sa rogoca o ya, era sa galu ga, ka vakatekivu me ra vakalagilagia na Kalou, ka kaya, “Sa solia talega na Kalou vei ira na kai matanitu tani na gauna oqo me ra veivutuni ka bula kina.”

Na i Soqosoqo Lewenilotu mai Anitioki

¹⁹ Eso vei ira na vakabauta era a veiseyaki ena veivakacacani ka tubu ena vuku i Sitiveni era a yaco sara vaka ki na yasana o Finisia, na yanuyanu o Saipurusi kei na koro o Anitioki. Era a vunautaka voli na i tukutuku vinaka vei ira ga na Jiu, ka sega ni ra tukuna vei ira na veimatanitu tani.

²⁰ Ia eso vei ira na vakabauta era kai Saipurusi ka so e kai Kirini. Era a lako o ira o ya ki Anitioki ka vosa talega vei ira na kai matanitu tani, ka vunautaka kina na Turaga o Jisu.

²¹ A sa tiko vata kei ira na kaukauwa ni Turaga, ka ra sa lewe vuqa era vakabauta ka saumaki vua na Turaga.

²² Sa mani yaco na kena i tukutuku vei ira na i soqosoqo lewenilotu mai Jerusalemi, ka ra mani talai Panapasa me lako me yaco sara ki Anitioki.

²³ Ia ni sa yaco yani ka sa raica na levu ni veivakalougatataki ni Kalou vei ira na tamata, sa marau sara, ka sa vakauqeti ira me ra kabita matua na Turaga ena yalodra taucoko.

²⁴ A sa dua na tamata vinaka o Panapasa, ka sinai ena Yalo Tabu kei na vakabauta. Era sa lewe vuqa na tamata era sa vuki vua na Turaga.

²⁵ Ni sa oti o ya, sa qai lako o Panapasa ki na koro o Tarisu me la'ki vakasaqarai Saula kina.

²⁶ Ni sa kunei koya, sa qai kauti koya ki Anitioki. E a dua na yabaki taucoko na nodrau dausoqoni vata voli kina kei ira na i soqosoqo lewenilotu, ka rau vakatavulici ira e lewe vuqa. A sa vakatekivutaki na nodra vakatokai na tamata vakabauta me ra lotu Vakarisito mai Anitioki.

Na Dausiga Levu

²⁷ Ena gauna vata o ya era a lako sobu kina ki Anitioki eso na parofita mai Jerusalemi.

²⁸ A qai tu cake e dua vei ira, a yacana o Akapo, ka tukuna ena kaukauwa ni Yalo Tabu ni na yaco e dua na dausiga levu ena vuravura raraba. (E a mani yaco na ka o ya ena gauna e tui tiko kina o Kolotiu.)

²⁹ Era sa mani lewa vata o ira na tisaipeli, me ra vakauta, me vaka na ka era dui rawata, na nodra veivuke vei ira na vakabauta mai Jutia.

³⁰ Era sa qai cakava vakakina, ka ra solia na i lavo vei rau o Panapasa kei Saula me rau kauta vei ira na qase ni lotu maikea.