Cakacaka 10 - Vakavakadewa Vou kei na iVola tale eso

Na Raivotu i Konilio

¹ E a tiko mai Sisaria e dua na tamata, ka yacana o Konilio. O koya e dua na kavetani ni mataivalu e vakatokai na “Mataivalu ni Itali.”

² Sa dau tokona sara vakalevu o koya na veika vakalotu; ka sa qarava na Kalou vata kei iratou kece na nona matavuvale. Sa dau vukei ira talega vakalevu na tamata dravudravua vei ira na Jiu ka dau masu vua na Kalou ena veigauna.

³ Ena dua na yakavi siga ni rauta na tolu na kaloko, a sa raica o koya e dua na raivotu, ka raica ni curu yani e dua na agilosi ni Kalou ka kaya vua, “I Konilio!”

⁴ A mai vakaraici koya matua yani o Konilio ena taqaya, ka kaya, “Sa vakaevei saka?” Sa qai kaya vua o koya, “Sa marautaka dina na Kalou na nomu masu kei na nomu cakacaka vinaka ni loloma, ka sa tu vakarau me sauma vei iko.

⁵ Ia raica, mo tala mada eso na tamata ki Jopa me ra lakova e dua na tamata ka yacana o Saimoni; a yacana tale ka dua o Pita.

⁶ E tiko oqo o koya vei Saimoni na daucaka kuli-ni-manumanu; ka tiko na nona vale e matasawa.”

⁷ Sa lako tale na agilosi ka sa qai kacivi rau e lewe rua vei ira na nona tamata o Konilio, vata kei na dua na sotia daulotu mai vei ira na sotia ka ra dau qaravi koya.

⁸ Ia ni sa talanoataka oti vei iratou na ka kecega ka a yaco, sa qai talai iratou ki Jopa.

Na Raivotu i Pita

⁹ Ena siga ka tarava, rauta na siga levu tutu, ni ratou sa lako tikoga e sala o iratou o ya ka ratou sa volekata tiko yani na koro, sa cabe cake ki na dela ni vale o Pita me la'ki masu kina.

¹⁰ Sa tuburi koya na viakana ka sa vinakata me kania e dua na ka. Ia ni sa vakarautaki tiko na kakana, sa qai raica o koya e dua na raivotu.

¹¹ E a raica ni sa tadola na lomalagi, ka sa lako sobu tiko mai e dua na ka me vaka e dua na i tutuvi levu, ka vakalutulututaki sobu mai ki vuravura ena tutuna vava.

¹² E tu ena i tutuvi o ya na veimataqali manumanu yavaiva kecega, kei na veimataqali manumanu dauqasi voli ni vanua, kei na manumanu vuka.

¹³ Sa qai rogo mai e dua na vosa, ka kaya, “I Pita, mo tucake; mo vakamatea ka kania!”

¹⁴ Ia sa qai kaya o Pita, “Me kakua sara, Turaga! Ni'u se sega vakadua ni bau kania e dua na ka tawa savasava se vakatabui.”

¹⁵ Sa qai rogo tale mai vakarua vua na vosa, ka kaya, “Na ka sa vakasavasavataka na Kalou mo kakua ni okata me tawa savasava!”

¹⁶ E a yaco vakatolu na ka oqo, ka qai kau lesu tale ki lomalagi.

¹⁷ Ni se vakasamataka tikoga o Pita se cava na i balebale ni raivotu o ya, e ratou sa kunea rawa sara na vale i Saimoni ena nodratou vakatataro o iratou ka a talai mai vei Konilio, ka ratou sa tu sara ga ena matamata ni vale ena gauna o ya.

¹⁸ E ratou sa qai kaci ka taroga, “E tiko beka eke e dua na vulagi ka yacana o Saimoni Pita, se segai?”

¹⁹ Ia sa vakananuma tikoga na raivotu o Pita. Sa qai kaya vua na Yalo Tabu, “Raica, e ratou sa tiko oqo e lewe tolu ka ratou vakasaqarai iko tiko mai.

²⁰ Tu cake ka lako sobu, ka kakua ni lomalomarua, ni sala vata kei iratou; au a talai iratou mai.”

²¹ Sa mai lako sobu sara yani o Pita ka kaya vei iratou, “Oi au na tamata o dou vakasaqara tiko. A cava na i naki ni nomudou lako mai?”

²² E ratou sa qai kaya, “E talai keitou tiko mai na turaganivalu o Konilio. E tamata dodonu ka dau rerevaka na Kalou o koya ka vinaka na kena i rogorogo vei ira na Jiu kecega. E a tukuna vua e dua na agilosi yalo savasava mo ni mai lakovi mo ni lako yani ki na nona vale me rogoca kina na ka o ni na kaya.”

²³ Sa qai kacivi iratou ki vale o Pita, ka ratou a mani moce kina. Ena siga ka tarava sa qai lako vata kei iratou o koya, ka ra sala vata kei iratou eso na lewenilotu mai Jopa.

²⁴ A yaco yani o Pita ki Sisaria ena siga ka tarava, ka sa namaki koya toka mai kina o Konilio, kei ira na wekana dina kei ira na nona i tokani voleka ka a sa sureti ira tu.

Sota o Pita kei Konilio

²⁵ Ni sa curu yani o Pita, sa tavaki koya sara mai o Konilio, sa cuva sobu ki yavana ka vakarokoroko vua.

²⁶ Ia sa vakaduri koya cake o Pita ka kaya vua, “Tu cake, au tamata talega oi au!”

²⁷ E a vosa tikoga vei Konilio o Pita ni rau sa curu tiko ki vale. Ia ni rau sa yaco yani ki loma sa raica ni ra sa lewe vuqa era soqoni tiko kina.

²⁸ Sa qai kaya vei ira o koya, “O ni sa kila vinaka sara ni tabu vua na Jiu me veitokani se lako vua e dua na kai matanitu tani. Ia sa vakaraitaka vakamacala sara vei au na Kalou me'u kakua ni okata e dua me dukadukali se me tawa savasava.

²⁹ O ya ga na vuna au a sega tale kina ni lomalomarua ni'u sa lakovi yani. Ia oqo au via taroga ga se cava na vuna o a talatala yani kina me'u la'ki lako mai.”

³⁰ Sa qai kaya o Konilio, “Ena va na siga sa oti, ena gauna vata tikoga oqo, ni'u a masu tiko eke, ena noqu vale, ena tolu na kaloko ena yakavi, au qai kidacala sa tu e mataqu e dua na tamata ka sa ramase na nona i sulu.

³¹ E a kaya vei au o koya, ‘I Konilio, sa rogoci na nomu masu ka sa nanumi na nomu cakacaka vinaka ni loloma ena mata ni Kalou.

³² Mo talatala mada ki Jopa, me lakovi e dua na tamata na yacana o Saimoni Pita. E tiko o koya ena vale i Saimoni na daucaka kuli-ni-manumanu, ka tiko na vale o ya e matasawa.’

³³ Sa i koya au sa talatala sara yani kina vei kemuni, ka sa vinaka sara ga na nomuni lako mai. Keimami tiko kece sara ga kina oqo ena mata ni Kalou me keimami rogoca na veika kece sa vakarota vei kemuni na Turaga mo ni mai tukuna.”

Na Vosa i Pita

³⁴ Sa qai vosa o Pita, ka kaya, “Au sa qai kila dina sara oqo ni sega ni dau vakaduiduitaka na tamata na Kalou.

³⁵ Ia sa dau vinakati ira kecega era dau vakarokorokotaki koya ka dau cakava na ka e dodonu, veitalia ga se mataqali kawa tamata cava era lewena.

³⁶ Sa i koya oqori na i tukutuku ka a tukuna vei ira na Isireli o koya, ka vunautaki kina na i tukutuku ni veivinakati ena vuku i Jisu Karisito, o koya na nodra Turaga na tamata kecega.

³⁷ O ni sa kila na ka levu ka a yaco ena vanua o Isireli, ka tekivu mai Kalili ni sa oti na papitaiso ka a vunautaka o Joni.

³⁸ O ni sa kila ni sa lumuti Jisu na kai Nasareci na Kalou ena Yalo Tabu kei na kaukauwa. O ni sa kila na nona dau lako voli ka dau caka vinaka, kei na nona dau vakabulai ira kecega e vakalolomataki ira tu na tevoro. O ni kila talega ni a cakava na veika kecega o ya o koya ni sa tiko vata kei koya na Kalou.

³⁹ Keitou sai vakadinadina ni veika kecega ka a cakava o koya ena nodra vanua na Jiu kei Jerusalemi talega. Era a qai vakamatei koya ena nodra vakarubeci koya ena kau.

⁴⁰ Ia sa qai vakaturi koya cake tale na Kalou ena i katolu ni siga, ka me vakatakilai koya votu kina.

⁴¹ E a sega ni vakatakilai koya na Kalou vei ira na tamata kecega, ia vei ira ga na i vakadinadina ka a sa digitaka tu mai liu na Kalou, io o ya vei keitou oi keitou ka a kana ka gunu vata kaya ni sa tucake tale mai na mate.

⁴² A sa vakaroti keitou o koya me keitou vunautaka vei ira na tamata ka vakadinadinataka ni sai koya ga sa lesia tu na Kalou me na turaganilewa vei ira na bula kei ira na mate.

⁴³ Sa i koya oqo ka ra a dau tukuna tiko o ira kecega na parofita, ni na bokoci ena vuku ni yacana na nodra i valavala ca na tamata kecega era na vakabauti koya.”

Sobuti Ira na Kai Matanitu Tani na Yalo Tabu

⁴⁴ Ia ni sa vosa tikoga o Pita, sa sobuti ira kecega era vakarorogo tiko na Yalo Tabu.

⁴⁵ E ratou sa kurabui na Jiu vakabauta ka ratou a lako vata yani kei Pita mai Jopa ni sa sovaraka talega na Kalou na nona i solisoli, o ya na Yalo Tabu, vei ira na kai matanitu tani.

⁴⁶ Ia ni ratou sa rogoca na nodra vosataka na veivosa tani eso kei na nodra vakacaucautaka na Kalou, sa qai kaya o Pita,

⁴⁷ “O ira oqo e sa tiko talega vei ira na Yalo Tabu me vakataki keda. E dua li e rawa ni bureitaka na wai ka tarova me ra kakua ni papitaisotaki?”

⁴⁸ Sa qai vakarota o Pita me ra papitaisotaki ena yaca i Jisu Karisito. Oti o ya era sa qai kerei koya me tiko mada ka siga vica tiko kei ira.