Apakuki 3 - Vakavakadewa Vou kei na iVola tale eso

Na Masu i Apakuki

¹ Oqo na masu i Apakuki na parofita:

² I Jiova, au sa rogoca na nomuni cakacaka, Ka'u sa vakasinaiti ena rere kei na qoroqoro. Ni vakayacora tale mada ena neimami gauna Na cakacaka cecere o ni a dau cakava e liu. Ena nomuni cudru, mo ni yalololoma ga.

³ Sa lako tale mai Itomi na Kalou; O koya na Yalosavasava mai Ulu i Perana. Sa ubia na lomalagi na nona i serau; Sa sinai o vuravura ena vakacaucautaki koya.

⁴ Sa muri koya mai na rarama ni tibi ni liva; Sa tatalivaliva mai na ligana na rarama, E kea sa vuni tu kina na nona kaukauwa.

⁵ Sa vakatala yani me liu vua na mate veitauvi Ka sa vakaroti mate me muri tiko mai.

⁶ Ni sa tu vakadua, sa yavavala o vuravura; Ni sa rai yani, sa sautaninini na veivanua. Era sa karusa na veiulunivanua tawa mudu; Sa dromu sobu na veidelana makawa, O ya na veidelana sa daulako voli kina e liu.

⁷ Au sa raici ira na kai Kusani ni ra sa rere; Ka ra sa sautaninini na kai Mitiani.

⁸ I Jiova, e vu li mai na veiuciwai na nomuni cudru? E vu li mai na wasawasa na nomuni lomakatakata? O ni a vodo voli ena dela ni veio; A sa nomuni qiqinivalu na o loaloa ni cagi ca, Ka kauta mai na qaqa vei ira na nomuni tamata.

⁹ O ni sa vakarautaka oti tu na nomuni dakaititi, Ka vakarau vanataka yani na kena gasau. Sa kavida o vuravura mai na nomuni yaseyase.

¹⁰ Ni rai yani na veiulunivanua, sa sautaninini; Sa tau mai lomalagi na uca bi. E vadugu na wai ena ruku i vuravura, Ka rewa-i-cake na kena veibiau.

¹¹ Ena cawi ni nomuni gasau ni dakaititi, Kei na tatibi ni nomuni moto taliva, Sa tu vakadua kina na siga kei na vula.

¹² O ni a lako voli yani i vuravura ena cudru, Ka butuqaqia na veivanua ena yalokatakata.

¹³ O ni sa lako yani me vakabulai ira na nomuni, Ka vakabulai koya na tui o ni sa digitaka. O ni sa mokuta na nodra i liuliu na tamata ca Ka vakarusai ira vakadua na nona i lawalawa.

¹⁴ Na nomuni gasau sa laubasikata na nona komada Ni sa lako mai vaka na covulaca me cemuri keimami, A sa reki voli me vakataki ira Sa dauvakasosataki ira lo na dravudravua.

¹⁵ O ni a buturaka na wasawasa, Oi kemuni kei ira na nomuni ose, Ka sa vusovusoa na wasawasa kaukauwa.

¹⁶ Au a rogoca, ka'u sa na taqaya; Sa yavavala na tebenigusuqu ena rere. Sa damele na yagoqu, Ka mani tarabe na yavaqu. Au na waraka galugalu ga na kena gauna Me na cudruvi ira kina sa totogitaki au o Jiova.

¹⁷ E dina ga ni sega tu na vuadra na veilolo, Ka sega ni vua mai na veivaini; E dina ga ni sa yali na vua ni olive, Ka sega ni tubu na kakana ena i teitei; E dina ga ni sa mate kecega na sipi, Ka sa lala tu na ba ni bulumakau;

¹⁸ Ia ka'u na rekitaki Jiova ga, Ka'u na marautaka na Kalou, O koya na noqu i vakabula.

¹⁹ Sa vu ni noqu kaukauwa o Jiova. Sa vakayacora me'u yava totolo me vaka na dia, Ka taqomaki au voli ena veiulunivanua.