Aisea 9 - Vakavakadewa Vou kei na iVola tale eso

Sa Sucu mai e Dua na Gone

¹ Ena sega tale ni dua na sala me ra na dro tani rawa mai kina ena gauna ni leqa oqo. A sa beci tu na nodra vanua na yavusa o Sevuloni kei Navitalai ena dua na gauna eliu, ia na gauna mai muri ena qai dokai tale kina na veivanua oqo, me tekivu mai na Meditereni vaka ki na tokalau me yaco ki na tai kadua ni Joritani, ka yaco sara yani i Kalili, ena vanua era sa tiko kina na kai veimatanitu tani.

O Koya na Tui sa Namaki

² O ira na tamata era lako ena butobuto, Era sa raica na rarama levu! Ka sa cila mai na rarama, Vei ira era tiko ena vanua butobuto loaloa sara.

³ O ni sa vakalevutaka na nodra marau, Ka vakaikuritaka na nodra reki. Era sa marautaka na ka o ni cakava, Me vaka na nodra marautaka na tamata na musu sila, Se ni ra wasea na i toki ni valu.

⁴ O ni sa musuka na i vua sa vakaicolacolabibitaki ira, Kei na i titoko sa mokuta na tabadra. Sa i kemuni na Turaga o ni sa vakadruka na matanitu, Sa vakararawataki ira na nomuni tamata, Me vaka na nomuni vakadruka na mataivalu ni Mitiani ena gauna e liu.

⁵ Ena vakamai kece ena buka na nodra i vava, Kei na nodra i sulu tauvi dra na mataivalu era kaba mai.

⁶ Sa sucu mai e dua na gone me noda! Sa soli mai vei keda e dua na gonetagane! O koya ena yaco me liutaki keda. Ena vakatokai na yacana o, “Na i Vakavuvuli Veivakurabuitaki,” Na “Kalou Kaukauwa,” na “Tama ni Gauna Tawamudu,” Na “Ravouvou ni Vakacegu kei na Sautu.”

⁷ Ena tubu tikoga na nona kaukauwa vakaturaga; Na nona matanitu ena dautiko sautu tikoga. Ena veiliutaki me i sosomi kei Tevita na tui, Ka yavutaka na nona lewa ena dina kei na dodonu, Mai na gauna oqo me yacova na i vakataotioti. Na gumatua i Jiova ni lewevuqa ena vakayacora na ka oqo.

Ena Totogitaki Isireli o Jiova

⁸ Sa tauca na nona cudru na Turaga ki na matanitu o Isireli, Kei ira na kawa i Jekope.

⁹ Era na qai kila kece na tamata, O Ifereimi kei ira kece era tiko e Samaria. O ira era kaya ena dokadoka kei na viavialevu ni lomadra.

¹⁰ Era sa bale sobu na biriki, Ia eda na tara tale ena veivale vatu. Sa musuki laivi na lolo, Ia era na vakaisosomitaki ena sitari.

¹¹ Sa vakayavalati ira na kedra meca o Jiova, Me ra valuti ira,

¹² O ira na kai Siria ena tokalau, Kei ira na kai Filisitia ena ra, Era sa tilomi Isireli ena gusudra sa dalaga tu. A sa sega ga ni oti na cudru ni Turaga ena ka kece oqo, Ia e sa dodoka tikoga na ligana me veitotogitaki.

¹³ Era sa sega ga ni vuki lesu na tamata vei koya ka mokuti ira Se vakasaqarai Jiova ni lewevuqa.

¹⁴ O koya oqo ena kauta tani kina o Jiova Mai Isireli ena dua wale ga na siga, Na nodra i liuliu kei ira na lewe ni vanua, Ena muduka tani na uluna kei na buina.

¹⁵ O ira na qase kei na tamata dokai sai ira na ulu Ka ra buina na parofita era vakatavuvulitaka na ka lasu.

¹⁶ O ira era liutaki ira oqo sa vakasesei ira, Ka ra sa veilecayaki kina o ira era liutaki.

¹⁷ O koya oqo sa sega kina ni loloma Vei ira na nodra tabagone na Turaga, Se yalololoma vei ira na luveniyali kei na yada. Ni ra a sega kece ni goleva na Kalou ka i tovo ca, Ka sa ca na veika kecega era kaya. Ia ena sega kina ni oti na cudru ni Turaga, Ni se dodo tikoga na ligana me veitotogitaki.

¹⁸ Ni sa waqa na i valavala ca me vaka na buka, Ka sa vakama yavu na kau vakavotona kei na soni; Sa vakama me vaka na veigasau mai veikau, Ka kuvu cake me vaka na duru o na kena kubou.

¹⁹ Ena vuku ni cudru i Jiova, Sa vaka ga kina na kama ni buka na nona cudru. Era sa vaka na i vakawaqa ni buka na tamata; Era sa dui sagai ira ga vakai ira ka tabu loloma.

²⁰ E dua na tamata ena kana mai na i matau, Ena kania na kena i votavota ka na sega ni mamau, E dua tale ena kana ena yasana i mawi, Ia ena sega talega ni mamau, Na tamata kece ena dui kania na lewe ni luvena.

²¹ O Manasa ena valuti Ifereimi, Ka valuti Ifereimi o Manasa, Ia e rau sa qai valuti Juta ruarua. Na ka kece oqo ena sega ni oti kina na cudru ni Turaga. Ena dodo tikoga mai na ligana, Me veivakaitotogitaki. Ni ra sai valavala ca kece ka sega ni qarava na Kalou.