Aisea 8 - Vakavakadewa Vou kei na iVola tale eso

Dusidusi vei Ira na Tamata na Luve i Aisea

¹ A sa kaya vei au o Jiova, “Taura e dua na vava ni volavola ka vola ena matanivola lelevu, “Tokinivalu Totolo - Tokia Tani Vakasauri.”

² Kauta mai e rua na tamata nuitaki, o Uraia na bete kei Sakaraia na luve i Jeperekaia me rau i vakadinadina.”

³ Ni sega ni dede na nodrau tiko, a sa qai bukete na watina ka vakasucuma e dua na luvena tagane. Sa qai tukuna vei au o Jiova, “Vakatoka me yacana o ‘Tokinivalu Totolo-Tokia Tani Vakasauri.’ ”

⁴ Ni se bera ni yalomatua mai na gone me kaya ‘Nana’ kei ‘Tata,’ sa na kauta tani kece na tui Asiria na i yau kei Tamasiko kei na i toki ni valu kece mai Samaria.

Sa Lako Tiko Mai o Tui Asiria

⁵ A qai kaya tale vei au o Jiova,

⁶ “Ena vuku ni nodra sa cata na wai drodro malua mai Sailo o ira na tamata oqo, ka ra sautaninini ena mata i Resini na tui Siria kei Peka na tui Isireli,

⁷ raica sa na kauti Tui Asiria kei na nona mataivalu kece mai kina na Turaga me valuti Juta. Era sa na toso mai me vaka na kui ni wai ni waluvu sa vuabale ena bati ni uciwai na Uferetisi.

⁸ Ena dave yani ka robota na loma ni vanua o Juta, ena ubia na ka kecega ka na yaco ena domo na kena cecere.” Sa tiko kei keda na Kalou! Sa taqomaka na vanua na tabana sa tevuka yani.

⁹ Ni soqoni vata ena rere na veimatanitu! Ni vakarorogo na veivanua yawa e vuravura. Ni tu vakarau ki na i valu, ia ena rere! Io, vakarautaki iko ga ena rere!

¹⁰ Ni tuvana vata na nomuni i nakinaki! Ia era na sega ga ni yaco. Ni vosa ena levu taucoko! Ia ena tawayaga kece sara, Baleta ni sa tiko kei keda na Kalou.

Sa Vakaroti Koya na Parofita o Jiova

¹¹ Sa vakaroti au o Jiova ena nona kaukauwa levu me'u kakua ni muria na sala era sa muria na tamata. A sa kaya,

¹² “Kakua ni duavata kei ira na tamata oqo ena veika era nakita, kakua talega ni rerevaka na veika era rerevaka se kidroa kina.

¹³ Mo nanuma ni sai Jiova ni lewevuqa taudua ga mo okata me savasava ka sai koya taudua ga mo rerevaka ka kidroa kina.

¹⁴ Ena yaco o koya me vale tabu ka vatu me ra tarabe kina na tamata, na vatu me rau tarabe ruarua kina o Isireli kei Juta ka dai me ra coko kina na lewe i Jerusalemi.

¹⁵ Era lewe vuqa era na tarabe ka bale. Era lewe levu na bale ka mavoa ka ra na coko ka vesu.”

Vakaroti me ra Kakua ni Vakatarogi na Mate

¹⁶ O ira na noqu tisaipeli me ra taqomaka ka maroroya na i tukutuku sa solia vei au na Kalou.

¹⁷ Sa vunitaki koya o Jiova mai vei ira na nona tamata, ia au sa vakadinati koya ka vakanuinui vua.

¹⁸ Raica oi au kei ira na gone sa solia mai vei au o Jiova keimami sai vakadinadina ka i vakatakilakila ni veika dredre e Isireli mai vei Jiova ni lewevuqa, o koya sa tiko mai na ulunivanua o Saioni.

¹⁹ Era na kaya vei kemuni na tamata mo ni la'ki taro i tukutuku vei ira na daurairai kei ira era daucurumi, o ira era dau vosa e ra ka vakasolokakana. Na matanitu yadua sa dodonu me qara na i vakasala ni kena kalou, me ra tarogi ira na mate ena vukudra na bula.

²⁰ Ia mo ni qai kaya vei ira, “Rogoca na ka sa vakavulici kemuni kina na Turaga! Ni kakua ni rogoci ira na daurairai. Na veika era kaya ena sega ni solia vei kemuni e dua na ka vinaka.”

E Dua na Gauna Dredre

²¹ Era na veilakoyaki voli na tamata ena loma ni vanua ena rere kei na viakana. Era na vosacataka na nodra tui kei na nodra Kalou ena nodra viakana kei na cudru. Era na rai cake ki na maliwa lala,

²² se rai sobu ki na qele, ia era na sega ni raica e dua na ka; era na raica ga na leqa, kei na butobuto vakarerevaki era sa vakasavi yani kina.