Aisea 7 - Vakavakadewa Vou kei na iVola tale eso

Ai Tukutuku vei Easi na Tui

¹ Ena gauna e a tui kina e Juta o Easi na luve i Jocame, ka makubui Usaia, e a tekivu kina na i valu. E rau a valuti Jerusalemi kina o Risini na tui Siria kei Peka na luve i Rimalia na tui Isireli, ka rau mani sega ni vakamalumalumutaka rawa.

² Ia ni sa tukuni vua na tui Juta ni rau sa mai tovata o Siria kei Ifereimi, sa sautaninini ena rere o koya kei ira na nona tamata me vaka na kau sa liwava na cagi kaukauwa.

³ Ia sa qai tukuna o Jiova vei Aisea, “Mo kauta na luvemu o Siari Jasupi, mo drau lako ka la'ki tavaki Easi na tui. O na raici koya ena gaunisala era cakacaka tiko kina na daucaka i sulu ena mua ni keli e drodro mai kina na wai ena tobu mai cake.

⁴ Tukuna vua me vakarau tu, ia me tiko vakamalua ka me kakua ni rere se taqaya. Na cudru i Risini na tui, kei ira na kai Siria kei Peka na tui sa sega ni vakarerevaki cake mai na kubou e kuvu mai ena rua na ka e kubou wale tu ga ka sega ni caudre.

⁵ Era sa bukiveretaki iko o Siria, Isireli kei ira na kena tui.

⁶ Era sa nakita me ra valuti Juta ena nodra vakarerei ira na lewena ka lesia na luve i Tapeli me nodra tui.

⁷ Ia sa kaya vaka oqo o Jiova: “Ena sega ni vakayacori oqo, Ena sega sara ni yaco.

⁸ Na vuna ni sega ni qaqa cake o Siria vei Tamasiko, Ka sega ni qaqa cake o Tamasiko vei Risini na tui. Ena loma ni onosagavulu kalima na yabaki, Ena kakavorovoro vakamatailalai o Isireli, Ka na sega tale ni yaco rawa me dua na matanitu.

⁹ Sa sega ni qaqa cake o Isireli mai na koro levu o Samaria, Ka sega ni qaqa cake o Samaria mai vei Peka na tui. “Ia kevaka e malumalumu na nomuni vakabauta o ni na sega ni tudei.”

Na i Vakatakilakila i Imanueli

¹⁰ A sa vosa tale o Jiova vei Easi ka kaya,

¹¹ “Kerea mada vei Jiova na nomu Kalou e dua na i vakatakilakila. Kerea me yaco sara mai bulu e ra, se me yaco sara mai lomalagi e cake.”

¹² A qai kaya o Easi, “Au na sega ni kerea e dua na i vakatakilakila. Au na sega ni via vakatovolei Jiova.”

¹³ A qai sauma yani o Aisea ka kaya, “Ni rogoca mada na kawa i Tevita. Sa ka lailai wale na vakaocai ira na tamata, ia o ni sa via vakaoca talega na Kalou?

¹⁴ O Jiova ga vakai koya ena solia vei kemuni e dua na i vakatakilakila. Raica ena bukete e dua na gone yalewa ka na vakasucuma e dua na gone tagane ka na vakatoka me yacana o Imanueli.

¹⁵ Ena gauna sa na yalomatua mai kina, ena kena kakana na sucu kei na oni.

¹⁶ Ia ni bera o ya sa na vakalalai na nodrau vanua na tui e rau vakarerei kemuni.

¹⁷ Ena kauta mai o Jiova vei kemuni, kei ira na nomuni tamata kei na vuvale kece vakatui na veisiga ca sara e sa sega ni bau yaco vakadua ena matanitu o Isireli me tekivu mai na gauna e sa qai tawase kina o Isireli mai Juta, ena kauta mai na tui Asiria.

¹⁸ Ena siga o ya ena qai kaluvi ira na kai Ijipita me ra lako mai me vaka na lago mai na veibasoga lalai ni uciwai na Naile kei ira na kai Asiria me ra lako mai na nodra vanua me vaka na vi.

¹⁹ Era na lako mai ka robota na qakilo veivatu, kei na veiqara vatu ka ra ubia na veikau vakavotona kei na vanua veico kecega.

²⁰ Ena siga o ya, ena sauma o Jiova e dua na dauveikoti mai na tai kadua ni Uferetisi, oqori o tui Asiria, ka na qai toroya laivi na kumimuni, na drau ni ulumuni kei na vuti ni yagomuni.

²¹ Ena gauna o ya, kevaka sara mada ga e dua na dauteitei sa vakabula rawa ga e dua na nona bulumakau gone kei na rua na nona me,

²² e ratou na solia vua na levu ga ni sucu e vinakata. Ena tu na sucu kei na oni me ra kania o ira kece era na vo tu mai ena nodra vanua.

²³ Ena gauna o ya, na loganivaini vinaka sa dau rawa kina e dua na udolu na vaini, na veiloganivaini e rauta e dua na udolu na tiki ni siliva na kena i sau ena ubia na veiwa vakavotona kei na soni.

²⁴ Era na lako ga kina na tamata era vakadakai titi kei na kena gasau, ka sa na robota na vanua taucoko na kau vakavotona kei na soni.

²⁵ Na veidelana kece e dau tei tu kina na kakana ena robota na kau vakavotona ka na sega ni dua me na lako kina. Ena yaco me vanua ni vakana bulumakau kei na sipi.”