Aisea 66 - Vakavakadewa Vou kei na iVola tale eso

Sa Vakataulewa ki na Veimatanitu o Jiova

¹ A sa kaya o Jiova, “Sa noqu i dabedabe vakatui na lomalagi Ka sai tutu ni yavaqu na vuravura. Na mataqali vale vakacava me'u tiko kina?

² Oi au ga au a bulia na veika kece! Ka sa noqu na veika kece oqo. Au sa vinakati ira era yalo malumalumu ka veivutuni, O ira era rerevaki au ka talairawarawa vei au.

³ Era sa cakava na tamata na veika ga era dui vinakata. Era vakamatea e dua na bulumakau me i soro Se cabo e dua na tamata; Era vakacabora e dua na lami, Se musuka e dua na domo ni koli. Era vakacabora na ka boi vinaka, Se masu ki na matakau, Ka taleitaka na mataqali sokalou vakasisila.

⁴ Oi au talega au sa digitaka me ra sota kei na veika ni leqa Na veika sara ga era rerevaka, Baleta ni'u a kacivi ira A qai sega ni dua e rogo mai. Era sa digitaka me ra talaidredre vei au Ka vakayacora na veika ca.”

⁵ Ni rogoca mada na veika a kaya o Jiova, ‘Oi kemuni kece o ni rerevaka ka talairawarawa vua. Baleta na nomuni yalodina vei au Ena so vei kemuni era na cati kemuni.’ Era na vakalialiai kemuni, ka kaya, ‘Keimami vinakata me keimami raica mo ni marau, Ia me vakaraitaka o Jiova na nona kaukauwa Ka vakabulai kemuni.’

⁶ Ni rogoca mada na rorogo levu o ya mai na koro! E rorogo mai na Valenisoro, Na domo ni nona vakatotogitaki ira Na nona meca o Jiova!

⁷ “Na noqu koro tabu e vaka e dua na tina ni gone E vakasucuma vakasauri e dua na luvena gone tagane, Ka sega mada ni bau taratara.

⁸ Sa bau dua mada e rogoca Se raica e dua na ka vaka o ya. E bau dua li na matanitu e a sucu ga ena dua na siga? Ena sega so ni rarawa vakadede o Saioni Ni bera ni sucu mai na matanitu.”

⁹ A sa kaya o Jiova. “Ni kakua ni nanuma au na kauti ira mai na noqu tamata Ki na gauna me ra sucu kina, Ka qai sega ni laiva me ra sucu.

¹⁰ Ni marau vata kei Jerusalemi, ka reki ena vukuna Oi kemuni kece o ni lomana na koro oqo! Ni marau vata kaya oqo Oi kemuni kece o ni a tagicaka!

¹¹ O ni na marautaka na nona tubu cake, Me vaka e dua na gone ena lomaserei tinana.”

¹² A sa kaya o Jiova. “Au na kauta mai vei iko na sautu me tawa mudu. Ena drodro mai vei iko na i yau ni veimatanitu Me vaka e dua na uciwai e sega ni maca rawa. O na vaka e dua na gone e qarava na tinana, E roqota ena ligana ka qaravi ena yalololoma.

¹³ Au na vakacegui kemuni e Jerusalemi Me vaka na nona vakaceguya na luvena e dua na tina.

¹⁴ Ni o ni raica ni sa na yaco na ka oqo O ni sa na qai marau; Ka na vakavuna mo ni bulabula ka kaukauwa. Ia o ni sa na qai kila ni sai au o Jiova, Au sa dau vukei ira era talairawarawa vei au Ka vakaraitaka na noqu cudru vei ira na kequ meca.”

¹⁵ Ena lako mai o Jiova ena buka. Ena vodo mai ena bati ni cagi kaukauwa Me mai totogitaki ira sa cudruvi ira o koya.

¹⁶ Ena totogitaki ira kece na tamata e vuravura era sa cala Ena nona i seleiwau kei na bukawaqa, Ka ra na lewe vuqa sara era na mate.

¹⁷ A sa kaya o Jiova, “O ira kece era vakasavasavataki ira me baleta na qaravi kalou tani ka dau lako vakaiyatu yani ki na veicabocabo ni soro ni veiwere, o ira era dau kana vuaka, kalavo kei na kakana tawa savasava sa voleka na gauna me ra mate kina.

¹⁸ Au sa kila na nodra vakasama kei na nodra i valavala. Au sa lako mai me'u soqoni ira vata na lewe ni veimatanitu kecega. Ni ra na lako vata mai era na qai raica na noqu lagilagi,

¹⁹ au na qai cakava e dua na ka veivakurabuitaki ena kedra maliwa. Ia au na qai vakabula eso vei ira ka'u na qai talai ira yani ki na veimatanitu era sa sega ni bau rogoca na kequ i rogorogo se raica na noqu kaukauwa kei na noqu i ukuuku! Au na talai ira yani ki Sipeini Libiya vata kei ira na kena dauvana ena dakaititi, ki Tupali vata kei Kirisi. Era na la'ki tukuna ki na veimatanitu oqo na noqu qaqa:

²⁰ Era na kauti ira lesu mai na wekamuni mai na veimatanitu oqori me i loloma vei au. Era na kauti ira mai ki na noqu ulunivanua tabu ena ose, meuli, kameli, kareti, qiqi me vaka na nodra kauta mai na Isireli na i soro sila ki na vale ni Soro ena veiyaya savasava.

²¹ Au na qai lesia eso me bete ka so me ra Livai.”

²² A sa kaya o Jiova, “Ia me vaka na nodrau tudei tu e mataqu na vuravura vou kei na lomalagi vou; ena tudei vakakina na nomuni kawa kei na yacamuni.

²³ Ena Solevu ni Vulavou kece kei na Siga ni Vakacecegu kece, era na lako mai na tamata kece ki mataqu me ra qaravi au.

²⁴ Ia ni ra sa na lesu, era na raica na yago ni tamata mate era sa dau talaidredre vei au. Ena sega ni mate na kedra baca, ka na sega talega ni bokoci rawa na kedra buka; ka ra na ka vakasisila vei ira na tamata kecega.”