Aisea 65 - Vakavakadewa Vou kei na iVola tale eso

Na Cudru ni Kalou vei Ira na Dauveisaqasaqa

¹ A sa kaya o Jiova, “Au sa vakarau tu me'u sauma na nodra masu na tamata, Ia era sa sega ni bau masu. Au sa vakarau tu me'u laurai, ia era sa sega ni tovolea. ‘Au a kaya, oi au oqo, oi au oqo,’ Ki na dua na matanitu sa sega ni masu vei au.

² Au dodoka tu yani na ligaqu ena veisiga kece Ki na dua na matatamata dauveisaqasaqa; Era sa dui muria ga na sala ca Ka vakayacora ga na dui nodra i naki.

³ Era sa sega ni madua ni vakacudrui au. Era sa ia na vakacaboisoro ena veiwere Ka vakama na ka boi vinaka Ena veicabocabo ni soro ni veikalou tani.

⁴ Ena bogi era sa dau lako ki na veiqara vatu kei na veibulubulu Me ra taroga na nodra i vakasala na yalo ni tamata mate. Era sa dau kana vuaka na tamata oqo.

⁵ Era sa qai dau kaya vei ira na tani Me ra kakua ni voleka mai vei ira Ni ra sa rui savasava. Au sa sega ni vosota rawa na tamata vaka o ya. Na noqu cudruvi ira e vaka na buka Sa sega ni lako ki tuba.

⁶ “Au sa lewa oti me ra totogitaki Ka sa volai oti tu na kedra i totogi. Au na sega ni vakawaletaka na nodra i valavala ca, Ia au na sauma vei ira,

⁷ Kei na nodra i valavala ca na nodra qase. Era sa vakacaboisoro ki na veicabocabo ni soro tani, Ka ra vosa vakacacataki au. A ka oqo ka'u na totogitaki ira kina Me rauta vinaka na i sau ni nodra i vakarau.”

⁸ A sa kaya o Jiova. “E sega ni dua e dau vakarusa na vaini vinaka Ia e dau caka ga kina na waini. Au na sega ni vakarusai ira vakakina na noqu tamata; Ka'u na vakabulai ira era qaravi au.

⁹ Au na vakatubura eso na kawa i Jekope Kei na so na kawa i Juta me ra taukena na Na noqu vanua veiulunivanua.

¹⁰ Era na qaravi au Ka liutaka na nodra sipi kei na bulumakau Ena veico ena buca o Saroni mai na ra, Kei na Qakilo ni Leqa ena tokalau.

¹¹ Ia ena sega ni vakakina vei kemuni o ni sa vakanadakui au Oi kemuni o ni guilecavi Saioni na noqu ulunivanua tabu Ka qarava na Kalou ni kalougata kei na veivakaleqai.

¹² Na nomuni voravora mo ni mate ena i seleiwau Baleta ni o ni sega ni rogo mai Ni'u kacivi kemuni, se vakarorogo ni'u vosa yani. Ia o ni sa cakava ga na ka vakasisila e mataqu Ka digitaka na ka au sega ni taleitaka.

¹³ Oi koya oqo au sa kaya kina vei ira Era qaravi au ka talairawarawa vei au Ni na levu na kedra kei na medra. Ia oi kemuni o ni na viakana ka viagunu. Era na marau ka o ni na vakamaduataki.

¹⁴ Era na sere ena marau Ia o ni na tagi ena yalo rarawa.

¹⁵ Na yacamuni ena yaca ni veivakamaduataki Vei ira na noqu tamata digitaki. Oi au o Jiova au na vakamatei kemuni. Ia au na solia e dua na yaca vou, Vei ira era talairawarawa vei au.

¹⁶ O koya yadua sa kerea Me vakalougatataki ena vanua oqo, Ena kerea me vakalougatataki koya Na Kalou sa dau yalodina. O koya yadua sa ia na bubului, Ena bubului ga ena yaca ni Kalou Yalodina. Na leqa ni veigauna sa oti ena takali yani Ka guilecavi sara yani.”

Na Vuravura Vou kei na Lomalagi Vou

¹⁷ A sa kaya o Jiova, “Raica au sa bulia e dua na vuravura vou Kei na dua na lomalagi vou. Na veika e a yaco ena gauna sa oti, Sa na guilecavi sara yani vakadua.

¹⁸ Ia ni reki ka marau ka tawa mudu, Ena vuku ni ka au sa bulia. Na Jerusalemi vou au na cakava ena sinai ena marau Ka ra na marau talega na lewena.

¹⁹ Oi au sara mada ga au na sinai ena marau Baleti Jerusalemi kei ira na lewena. Ena sega kina na tagi se na kere veivuke.

²⁰ Era na sega ni mate kina na gone ena nodra gauna ni gone Ka na balavu sara na nodra bula yadua era bula kina. O ira mada ga era mate ni ra yabaki dua na drau Era na okata ga ni ra sa mate gone. O koya e mate ni sa bera ni drau na nona yabaki, Ena totogi ga ena vuku ni nona i valavala ca.

²¹ Era na tara na vale ka tawana talega Ka ra na tea na loganivaini ka gunuva talega na vuana.

²² Era na sega ni tara vale me dua tale e la'ki tawana Ka ra na sega ni teitei ka qai dua tale e la'ki vakayagataka. O ira na noqu tamata era na vaka na kau Ena nodra bula balavu, Ka ra na vakayagataka ena marau na cakacaka ni ligadra.

²³ Na veika era cakava ena rawa vinaka Ka ra na sega ni sota kaya na luvedra na veika ni leqa. Au na vakalougatataka na nodra kawa ena gauna kecega.

²⁴ Ni ra bera ni masu vei au, au sa na sauma.

²⁵ Na olifa kei na lami era na kana vata. Na laione ena kana co madu me vaka na bulumakau Ia na gata ena kana kuvu ni soso. Mai Saioni na noqu ulunivanua tabu, Ena sega kina na ka me veivakacacani Se me veivakarusai.” Sa i Jiova ga sa kaya na veika oqo.