Aisea 64 - Vakavakadewa Vou kei na iVola tale eso

¹ Na cava o ni sega kina ni botea na lomalagi Ka lako sobu mai? Era na raici kemuni na veiulunivanua Ka sautaninini ena rere.

² Era sa sautaninini me vaka na wai Sa buebue ena dela ni buka katakata. Ni lako mai ka vakaraitaka na nomuni kaukauwa Vei ira na kemuni meca Ka cakava me ra sautaninini Na veimatanitu e matamuni.

³ O ni a lako mai ena dua na gauna, Ka mai cakava na veika rerevaki Keimami a sega ni namaka. Era a raici kemuni na veiulunivanua Ka sautaninini ena rere.

⁴ Sa sega ni dua e bau rogoca se raica, E dua na Kalou me vakataki kemuni O koya sa dau cakava na ka Ena vukudra era vakanuinui vua.

⁵ O ni sa vinakati ira era taleitaka ni cakava na ka vinaka O ira era nanuma me ra bula voli Me vaka na lomamuni. O ni a cudruvi keimami, Ia keimami sa ia tikoga na i valavala ca, Veitalia ga na nomuni cudru levu. Keimami sa ia tikoga na i tovo ca me tekivu sara mai liu.

⁶ Keimami sai valavala ca kece sara; Na neimami tovo vinaka sara mada ga e sa dukadukali ga. Keimami sa vaka na draunikau sa cagina tani ena cagi Ena vuku ni neimami i valavala ca.

⁷ E sega ni bau dua e gole yani vei kemuni ena masu me kere veivuke. O ni sa vunitaki kemuni vei keimami Ka biuti keimami ena vuku ni neimami i valavala ca.

⁸ Ia oqo kemuni Jiova sai kemuni na Tama i keimami, O ni sa vaka na dautuli kuro Ka keimami sa vaka na qele me tuli kina na kuro, o ni a tuli keimami,

⁹ Ia ni kakua ni cudruvi keimami Se wilika tiko vei keimami na neimami i valavala ca ka sega ni mudu. Keimami sa nomuni tamata, Ni lomani keimami mai.

¹⁰ Na nomuni veikoro tabu era sa vaka na vanua lala. O Jerusalemi e sa rusa ka lala tu.

¹¹ Na neimami vale tabu ka vanua rairai vinaka Era dauqaravi kemuni kina na neimami qase, Sa vakarusai ena buka. Sa rusa na veivanua kece keimami dau lomana.

¹² Kemuni Jiova O ni sega li ni vakayavalati ena ka oqo? O ni na sega li ni cakava e dua na ka, Ka cakava me keimami sota kaya Na ka keimami sega ni rawa ni colata?