Aisea 63 - Vakavakadewa Vou kei na iVola tale eso

Na Qaqa i Jiova vei Ira na Veimatanitu

¹ “O cei sa lako tiko mai oqo mai Posira mai Itomi? O cei sa vakaisulu damudamu rairai vinaka Ka lako tiko mai ena kaukauwa levu?” Na Turaga o Jiova o koya sa kaukauwa ni veivakabulai Ka sa lako tiko mai me mai kacivaka na qaqa.

² “Na cava e sa rui damudamu kina na nona i sulu, Me vaka na nona i sulu e dua na tamata butu qerepi Me caka kina na waini?”

³ A qai sauma na Turaga ka kaya. “Au a butuqaqia na veimatanitu me vaka na qerepi Ka sega ni bau dua e lako yani me vukei au. Au a butuqaqi ira ena noqu cudru Ka sa dra wale ga na noqu i sulu.

⁴ Au sa nakita me yaco mai na siga, Me'u vakabulai ira kina na noqu tamata; Ka sa gauna me'u totogitaki ira kina na kedra meca

⁵ Ia na ligaqu ga sa vakavuna me'u qaqa Ka sa vakaukauwataki na noqu cudru.

⁶ Au sa butulaki ira sobu na veimatanitu ena noqu cudru; Era sa dasila, ka'u sa sova na nodra dra ki na qele.”

Na Vinaka i Jiova vei Isireli

⁷ Au na tukuna voli na loloma tawa yalani i Jiova Au na vakacaucautaki koya baleta na veika kece sa cakava vei keda. Sa vakalougatataki ira sara vakalevu na Isireli Ena vuku ni nona yalovinaka kei na yalololoma.

⁸ A sa kaya o Jiova. “Era sa noqu tamata ka ra na sega ni vakaisini au.” Au sa yaco me'u nodra i Vakabula

⁹ Mai na leqa kece era sotava. Na Turaga sara ga vakai koya sa vakabulai ira; E sega tale ni dua na agilosi. Sa vakabulai ira o koya ena nona loloma levu Kei na nona yalololoma. Sa dau taqomaki ira ena veigauna sa oti,

¹⁰ Ia era sa dau saqati koya Ka vakararawataka na nona Yalo Tabu; A sa yaco kina me kedra meca o Jiova Ka sa veivala vata tale kei ira.

¹¹ Ia era sa qai nanuma na gauna e liu, Na gauna i Mosese na tamata ni Kalou, ka kaya. “Sa e vei o Jiova O koya a vakabulai ira na nodra i liuliu na nona tamata Mai na loma ni wasawasa? Sa e vei o koya ka solia na yalona vei Mosese?

¹² Sa e vei na Turaga a vakayagataka na nona kaukauwa Ka cakava na veika lelevu ena bula nei Mosese, O koya ka wasea rua na wasawasa e matadra Me rogo tu kina ena veigauna kece,

¹³ Ka liutaki ira talega ena loma ni wasawasa? A ra sa sega ni tarabe Me vaka e dua na ose ena vanua dravuisiga.”

¹⁴ Me vaka na bulumakau era kau yani ki na dua na buca bulabula Sa solia vakakina na vakacegu o Jiova vei ira na nona tamata.

A Masu ni Kere Loloma kei na Veivuke

¹⁵ Kemuni na Turaga, Ni raici keimami sobu mai lomalagi Mai na nomuni i tikotiko lagilagi. Sa e vei na nomuni kauwaitaki keimami? Sa e vei na nomuni kaukauwa? Sa e vei na nomuni veinanumi ena yalololoma? Ni kakua ni vakanadakui keimami.

¹⁶ Sa i kemuni na tama i keimami. O Epara-ama e sega ni kilai keimami, O Jekope talega e sega ni kilai keimami. Ia oi kemuni ga Jiova na Tama i keimami. Sa i kemuni ga o ni dau vukei keimami ena veigauna kece.

¹⁷ Na cava o ni sa laivi keimami kina Me keimami yalo kaukauwa ka vakanadakui kemuni? Ni lesu mai ena vukudra na nomuni tamata dauveiqaravi O ira na nomuni tamata digitaki.

¹⁸ O ira na neimami meca Era sa voleka ni vakasavi ira vakadua na nomuni tamata, Ka ra sa vakadukadukalitaka na nomuni vale tabu.

¹⁹ O ni sa okati keimami me vaka o ni sega ni neimami i liuliu Ka vaka me keimami sa sega ni nomuni tamata.