Aisea 62 - Vakavakadewa Vou kei na iVola tale eso

E Dua na Yaca Vou i Jerusalemi

¹ Au na vosa yani me'u vakayaloqaqataki Jerusalemi; Ka'u na sega ni galu me yacova ni sa vakabulai. Ia na nona qaqa ena serau Me vaka e dua na cina livaliva ena bogi.

² Jerusalemi era na raica na matanitu na nomu qaqa. Era na raica kece na tui na nomu lagilagi, Ena soli vei iko e dua na yaca vou, Na yaca o ya ena solia sara ga o Jiova.

³ O na vaka e dua na i sala vakatui totoka Ena liga i Jiova.

⁴ O na sega tale ni vakatokai me “O koya sa biu tu.” Se me vakatokai na nomu vanua me “Yalewa Vakawati sa Biu tu.” Ena yacamu vou o “Sa Yalo Vinaka vei iko na Kalou.” Ka na yaca ni nomu vanua o “Vakamau ena Marau.” Baleta ni sa vinakati iko o Jiova Ka na vaka e dua na tagane vakawati o koya ki na nomu vanua

⁵ Ena tauri iko na Turaga me vaka o watina, Ka drau na tiko kaya ena marau, Ka drau na marau me vaka e dua na cauravou Kei na gone yalewa e rau sa qai vakamau.

⁶ Jerusalemi, au na biuti ira era yadra ena kemu bai Me ra kua ni galu ena siga kei na bogi. Me ra vakadeitaka tikoga vei Jiova na nona vosa ni yalayala, Ka kakua ni laivi koya me guilecavi ira.

⁷ Me ra kakua ni laiva me vakacegu me yacova ni sa Vakavinakataki Jerusalemi, Ka cakava me dua na koro era vakacaucautaka na veimatanitu.

⁸ Sa vosa bubuluitaka o Jiova Ka na vakayacora ena nona kaukauwa. “Na nomu sila ena sega tale ni kedra na kemu meca, Ka ra na sega tale ni gunuva na memu waini na kai tani.

⁹ Ia o ira ga era tea ka tamusuka na sila; Era na kania na madrai ka vakacaucautaki Jiova Kei ira era tei vaini ka kumuna na qerepi Era na gunu waini ena lomanibai ni noqu vale tabu.”

¹⁰ Kemuni na lewe i Jerusalemi, ni lako yani ki na taudaku ni koro Ka cakava e dua na sala me ra lesu mai kina na wekamuni. Ni cakava e dua na sala levu, ka kauta tani mai kina na vatu. Biuta i cake e dua na i vakatakilakila Me ra kila na veimatanitu.

¹¹ Ni sa kacivaka o Jiova ki vuravura taucoko, “Tukuna vei ira na lewe i Jerusalemi, Ni sa lako mai na Turaga na nomu i Vakabula Ka sa kauti ira tu mai na tamata sa vakabulai ira.”

¹² O ni na vakatokai mo ni Matatamata Tabu ni Kalou Na matatamata sa vakabulai ira o Jiova. Ena vakatokai o Jerusalemi me “Koro sa lomana na Kalou.” “Na koro sa sega ni biuta na Kalou.”