Aisea 6 - Vakavakadewa Vou kei na iVola tale eso

Na Raivotu kei na Kacivi nei Aisea

¹ Ena yabaki e a mate kina o Usaia na tui, au a raica na Turaga ni dabe tiko ena nona i dabedabe vakatui, e cecere, ka laveti cake.

² Era a tu wavokita na veika bula era caudre tu ena yameyame ni buka, ka yaono na dui tabadra. Na veika bula yadua oqo era dui ubia na matadra ena rua na tabadra, ka ra ubia na yagodra ena rua na tabadra me ra vuka kina.

³ Era a veikacivi vakai ira ka kaya, “Sa dodonu, ka tabu, ka savasava O Jiova ni lewevuqa. Sa sinai na vuravura ena nona lagilagi.”

⁴ Na vadugu ni domodra sa yavalata na yavu ni Valenisoro ka sa sinai na Valenisoro ena kubou.

⁵ Au a qai kaya, sa sega na ka au vakanuinui kina! Sa na yacovi au na veika ca. Au sa tamata tebe ni gusu qeleqelewa, ka'u sa tiko talega kei ira na tamata i valavala ca ka dukadukali. Ia oqo au sa raica ena mataqu dina na Tui, o Jiova ni lewevuqa.

⁶ Sa qai vuka mai vei au e dua vei ira na ka bula sa caudre tu ena yameyame ni buka ka kauta mai e dua na qilaiso sa waqa tu mai na i cabocabonisoro ka taura mai ena i saga ni buka.

⁷ A vakaterega na qilaiso waqa ki na tebe ni gusuqu ka kaya, “Raica sa terega na tebe ni gusumu na qilaiso waqa oqo, ka sa takali kina na nomu dukadukali ka bokoci na nomu i valavala ca.”

⁸ Au a qai rogoca na domo ni Turaga ni a kaya, “O cei beka me'u tala? O cei me na lako ena vuku i keitou?” Au a qai kaya, “Oi au oqo! Mo ni talai au.”

⁹ Sa qai tukuna vei au me'u lako ka la'ki tukuna vei ira na tamata na i tukutuku oqo, “Veitalia ga na levu ni nomuni vakarorogo, o ni na sega ga ni kila rawa. Veitalia ga na levu ni nomuni raica, o ni na sega ni kila na ka sa yaco tiko.”

¹⁰ Ia sa qai kaya vei au na Turaga, “Vakagogotaka na nodra vakasama na tamata oqo, vakadidivarataka na daligadra, ka vakamatabokotaka na matadra me ra kakua ni rai rawa, se rogo rawa, se kila rawa, ka me ra na qai gole ga mai vei au ka vakabulai.”

¹¹ Au sa qai taroga, “Kemuni na Turaga, ena vakacava soti na kena dede?” A sauma lesu ka kaya: “Me yacova ni ra sa vakacacani na veikoro lelevu Ka sa lala ni sega na kedra i vakatawa, Ka sega na tamata e loma ni veivale, Ka vakaleqai na vanua;

¹² Me yacova ni sa kauti ira vakayawa sara na tamata o Jiova, Ka sivia na vanua lala e loma ni vanua.

¹³ Kevaka e dua na i katini e vo tiko, Ena vakarusai talega; Ia me vaka na oki, Ena duri tu ga na kena dulumi Ni sa musu na kau. Era na cava bula vakakina eso na noqu digitaki.