Aisea 59 - Vakavakadewa Vou kei na iVola tale eso

Na Parofita sa Vunauca na Ca ni Tamata

¹ Kakua ni nanuma ni sa lekaleka na liga i Jiova Me sega kina ni ia na veivakabulai, Se didivara na daligana Me sega kina ni rogoca na nomudou kaci ni veivuke!

² Ia na nomudou i valavala ca ga Sa tawasei kemudou mai vua na Kalou; Na nomudou i valavala ca ga Sa vunitaka na matana mai vei kemudou, Me sega kina ni rogoca.

³ O ni sa cala ena vuku ni nomuni vosa lasu, Kei na i tovo kaukauwa kei na laba.

⁴ O ni sa sega ni totaka na dodonu ni ka o ni la'ki veilewai kina. O ni sa vakararavi ki na lasu mo ni qaqa kina ena veilewai. O ni sa vakayacora na nomuni i naki me ra ca kina na tani.

⁵ Sa rerevaki na nomuni i naki ca me vaka na yaloka ni gata bati gaga. Ni dirika e dua na yaloka, sa lade sara mai na gata.

⁶ Na nomuni i naki ena sega ni solia e dua na ka vinaka vei kemuni. Era sa tawa yaga me vaka na i sulu e caka mai na lawalawa ni viritalawalawa.

⁷ Na yavamuni sa ciciva na ca, ka vakusakusa mo ni vakadavea na nodra dra na tamata dodonu. O ni sa vakasamataka ga ena nomuni vakasama na i valavala ca, Ka laiva tu na veika ca kei na veika sa rusa ena veivanua o ni lakova.

⁸ O ni sa sega ni kila na sala ni vakacegu Ka sa sega ni dua na ka dodonu e tu ena nodra sala. O ni sa cakava me veve na nomuni veigaunisala, Ka sa sega ni dua e lako kina me kunea na vakacegu

Era sa Vakatusa na Nodra Cala na Tamata

⁹ Era sa kaya na tamata, “O koya oqo sa yawa kina vei keda na lewa dodonu, Ka sa sega ni yaco mai vei keda na ka dodonu. Eda a vaqara na rarama, ia eda a qai raica na butobuto, Eda sa qara na i serau, ia eda qai lako ena butobuto.

¹⁰ Eda sa vakayayamo voli me vaka na mataboko. Eda sa tarabe tu ena yakavi siga me vaka ena buto Me vakataki ira na mate mai bulu.

¹¹ Eda sa kudrukudru kece me vaka na bea, Ka vakaloloku me vaka na ruve. Eda sa vakasaqara na lewa dodonu, Ia eda sa sega ni kunea. Eda sa vakasaqara na veivakabulai, Ia sa yawa sara mai vei keda.

¹² Turaga sa ka levu na neimami i valavala ca e matamuni Ka sa beitaki keimami na neimami i tovo ca. Keimami sa kila tu na kena levu.

¹³ Keimami sa dau saqati kemuni, Ka dau vakanadakui kemuni, Ka dau bese ni muri kemuni. Keimami sa dau vakararawataki ira na tani Ka dau saqati kemuni. Sa ka lasu na neimami vakasama kei na neimami vosa.

¹⁴ Sa vagolei tani na dodonu Ka sega ni rawa ni voleka mai na i tovo savasava. Sa bale sobu na dina ena loma ni rara ni koro Ka sa sega na tikina me nona na dina.

¹⁵ Sa sega na yalodina, Ia o koya sa sega ni cakava na ka ca, Sa na vakaleqai dina ga.” Sa raica o Jiova na ka oqo Ka sa sega ni taleitaka Ni sa sega sara na ka dodonu.

Sa Vakarau o Jiova me Vueti Ira na Nona Tamata

¹⁶ Sa kurabui sara ni sa sega ni raica E dua na tamata me vukei ira era vakararawataki. Ia sa na vakayagataka ga na nona kaukauwa Me vakabulai ira kina Ka me qai qaqa talega kina.

¹⁷ Ena qai daramaka na dodonu me vaka na kote i yaragi ubi ni sarisari Kei na qaqa me vaka e dua na i sala kaukamea ni valu. Ena qai vakaisulutaki koya ena yalo e gadreva vakalevu Me caka vakadodonu na veika ka totogitaki me sauma na veika ca Sa yacovi ira na tamata.

¹⁸ Ena totogitaki ira na nona meca me vaka ga na nodra i valavala ca, Ka vakakina vei ira era tiko sara vakayawa.

¹⁹ Me tekivu mai na tokalau me yaco sara ki na ra, Na tamata kece era na rerevaki koya kei na nona kaukauwa levu. Ena lako mai o koya Me vaka na uciwai sa dobui Kei na cagi kaukauwa.

²⁰ A sa kaya o Jiova vei ira na nona tamata, “Au na lako yani ki Jerusalemi Me'u taqomaki kemuni ka vakabulai kemuni kece O ni sa gole tani mai na nomuni i valavala ca.

²¹ Au na cakava kei kemuni e dua na veiyalayalati: Na yaloqu sa tu vei kemuni kei na noqu vosa au a sa solia ki na gusumuni ena sega ni takali mai vei kemuni se mai na gusudra na luvemuni se me na takali mai na gusudra na luvedra na luvemuni ena veigauna kecega ka sega ni mudu,” sa kaya o Jiova.