Aisea 58 - Vakavakadewa Vou kei na iVola tale eso

Na Sala Dodonu ni Lolo

¹ A sa kaya o Jiova, “Kaila sara vakadomoilevu ena kena levu ga o rawata! Tukuna vei ira na noqu tamata na Isireli na nodra i valavala ca!

² Era sa vakasaqarai au ena veisiga Ka kaya ni ra sa muria na noqu lawa Ka cakava na ka dodonu. Era sa kerei au me'u vakalougatataki ira Ka me'u solia vei ira na lewa dodonu.”

³ Era kaya na tamata, “Na cava me da lolo kina kevaka e sega ni raica na Turaga, A cava me da cakava kina kevaka e sega ni kauwaitaki?” Sa qai kaya vei ira o Jiova, “Raica, ena gauna o ni lolo kina O ni dui vaqara ga na ka o ni vinakata Ka tabaki ira sobu na nomuni tamata cakacaka.

⁴ O ni sai tovo kaukauwa, Dau veivala ka dau veisei. O ni nanuma beka ni mataqali lolo vaka oqo Ena vakavuna me'u rogoca na nomuni masu?

⁵ Ni o ni sa dau lolo, o ni sa dau vakaocai kemuni. O ni sa dau vakacuva sobu na ulumuni ki na qele Me vaka e dua na drau ni co ki na qele. O ni sa dau daramaka na i sulu taga Ka davo ena dravusa. Sa i koya li o ya na ka o ni vakatoka me lolo? O ni nanuma beka au taleitaka na veika o ya?

⁶ Na mataqali lolo au vinakata e vaka oqo: E luvata tani na i vesu ni veitabaki sobu Kei na i colacola tawa dodonu, Ka laivi ira era vakararawataki me ra sereki.

⁷ E vota na kena vei ira era viakana, Ka dolava na nona vale vei ira na dravudravua e sega na nodra vale. Ena solia na i sulu vei ira e sega na ka era daramaka, Ka via vukei ira na wekadra.

⁸ Ena qai kida mai na nomuni rarama me vaka na mataka, Ka totolo na maca ni nomuni mavoa. Au na dautiko ga kei kemuni me'u vakabulai kemuni, Ia na mataqu ena taqomaki kemuni Mai na veiyasana kecega.

⁹ Ni o ni masu, au na sauma. Ni o ni kacivi au, au na rogoca. Ke o ni muduka vakadua na veivakararawataki, na nomuni veibeci kei na vosa ca kecega;

¹⁰ Kevaka o ni vakani ira era viakana, ka vakamamautaki ira era leqa tu, Ena qai vuki me rarama ni yakavi siga na butobuto sa wavokiti kemuni.

¹¹ Au na qai liutaki kemuni tikoga, ka vakamamautaki kemuni ena veika vinaka. Au na maroroi kemuni mo ni qaqa tikoga. O ni na qai vaka e dua na i teitei sa vakasuasuataki vinaka, Ka vaka e dua na mata ni wai sa sega ni maca rawa.

¹² O ira na nomuni tamata era na tara tale Na veika sa rusa makawa tu Me ra tara tale ena veiyavu makawa. O ni na vakatokai mo ni tamata Sa vakavoutaka tale na veikorokoro Ka tara vou tale na veivale sa rusa tu.”

Na i Sau ni Kena Rokovi na Siga ni Vakacecegu

¹³ A sa kaya o Jiova, “Kevaka o ni vakatabuya na Siga ni Vakacecegu Ka sega ni cakava kina na ka o ni vinakata; Kevaka o ni okata na Siga ni Vakacecegu me ka talei; Ka sega ni veilakoyaki, cakacaka se Veivosaki tawa yaga wale ga kina,

¹⁴ O ni na qai raica na marau dina ni qaravi Jiova. Au na cakava mo ni dokai e vuravura taucoko Ka marautaka na vanua au a solia Vua na nomuni qase o Jekope, a kaya o Jiova.”