Aisea 56 - Vakavakadewa Vou kei na iVola tale eso

Veivakabulai ni Kalou ki na Tamata Kece

¹ A sa kaya o Jiova vei ira na nona tamata, “Au sa na vakarau vakabulai kemuni Ka vakaraitaka na noqu veisereki. Ia ni vakayacora na veika dodonu ka savasava.

² Au na vakalougatataki ira era sa maroroya Na Siga ni Vakacecegu, Ka sega ni vakacacana. Au na vakalougatataki ira era sega ni cakava e dua na ka ca.”

³ Me kakua ni kaya na tamata vulagi sa mai duavata Kei na tamata ni Kalou. Ena tawasei au tani dina o Jiova mai vei ira na nona tamata Me'u kakua ni qaravi koya.”

⁴ A sa kaya o Jiova, “Na vulagi e vakatabuya na Siga ni Vakacecegu Ka digia me vakayacora na ka sa vinaka vei au Ka maroroya na noqu veiyalayalati,

⁵ au na dau nanumi na yacana ena noqu Valenisoro Kei na kedra maliwa na noqu tamata Ena dua na gauna balavu sara. Ena sega sara ni guilecavi o koya.”

⁶ A sa kaya o Jiova vei ira na vulagi, “Era sa mai duavata kei ira na nona tamata; O ira era sa lomani Jiova ka qaravi koya, O ira era sa vakatabuya na Siga ni Vakacecegu Ka yalodina ki na nona veiyalayalati.

⁷ “Au na kauti kemuni mai ki noqu ulunivanua tabu, Ka solia vei kemuni na reki ena noqu vale ni masu. Na nodra i soro kama kei na i madrali Ka'u na vakadonuya ena noqu i cabocabonisoro; Na noqu vale ena vakatokai Me nodra vale ni masu na veimatanitu kecega.”

⁸ A sa kaya na Turaga na Kalou, O koya sa kauti ira lesu mai na Isireli era vakabobulataki, “Au na kauti ira tale mai eso era sa sega ni lako mai.”

Vosataki o Ira na i Liuliu kei Isireli

⁹ A sa kaya o Jiova, “Ni lako mai na veimatanitu me vaka na manumanu daukata Mai loma ni veikau ka tilomi ira na noqu tamata.

¹⁰ Kemuni kece na i liuliu E dodonu mo ni vunauci ira na noqu tamata; O ni sa mataboko ka sega ni kila e dua na ka. Era sa vaka na koli sa sega ni dau kodro, Ka ra sa dau davo voli ga ka tadra; Era sa dau gadreva tu ga me ra moce.

¹¹ Era sa vaka na koli dau kana Ka ra sa sega ni mamau rawa. Era sai liuliu sega ni vakasama. Era sa dui cakava ga na ka era vinakata Ka qara na ka ga e dui baleti ira.

¹² Era sa kaya, ‘Me mai kau eso na waini Ka gunuva na ka eda rawata. Ena vinaka cake na siga ni mataka Mai na siga edaidai.’ ”