Aisea 55 - Vakavakadewa Vou kei na iVola tale eso

Na Veisureti kivei Ira sa Viagunu

¹ A sa kaya o Jiova, “Ni lako mai oi kemuni kece o ni viagunu, Sa tu oqo na wai. Ni lako mai oi kemuni kece e sega na nomuni i lavo; Ni mai voli kakana. Ni lako mai ka mai voli waini kei na sucu, E sega ni saumi ena dua na ka!

² Na cava o ni vakayagataka kina na i lavo Ena ka e sega ni kakana? Na cava o ni vakayagataka kina na kemuni i sau O ni qai sega ni mamau? Ni vakarorogo vei au o ni na qai rawata Na kakana vinaka mo ni kania Na kakana uasivi o ni marautaka ni kania.

³ “Ni vakarorogo vei au oqo na noqu tamata ka lako mai vei au: Ni lako mai vei au mo ni na bula kina. Au na cakava e dua na veiyalayalati tawa mudu kei kemuni, Ka solia vei kemuni na veivakalougatataki au a yalataka Me'u solia vei Tevita.

⁴ Au a buli koya me i vakadinadina vei ira na tamata Ka me i liuliu ka dau lewa vei ira na veimatanitu.

⁵ O na kacivi ira na veimatanitu o sega ni kilai ira, Ia era na lako mai me ra duavata kei iko. Oi au o Jiova na Kalou Yalo Savasava ni Isireli Sa vakavuna me yaco na ka oqo; Ka'u na solia vei iko mo lagilagi ka dokai!”

⁶ Ni gole vei Jiova ka masu vua ni sa voleka tiko.

⁷ Laivi ira na tamata ca me ra biuta na nodra i valavala Ka veisautaka na i tovo ni nodra vakasama. Laivi ira me ra gole vei Jiova na noda Kalou, Sa yalololoma o koya ka dau totolo na nona veivosoti.

⁸ A sa kaya o Jiova, “Na noqu vakasama e sega ni vaka na nomuni vakasama, Ka sa duidui na noqu sala mai na nomuni sala.

⁹ Me vaka na yawa ni lomalagi mai vuravura Sa yawa vakakina na noqu sala kei na noqu vakasama Mai na nomuni sala kei na nomuni vakasama.

¹⁰ “Na noqu vosa sa vaka na wai cevata kei na uca Sa lako sobu mai lomalagi me vakasuasuataka na vuravura, Ka vakavuna me ra tubu na kau Ka sa rawa kina me so na sore ni kau vua na daukakaburaki Kei na kakana me laukana.

¹¹ Ena vaka talega kina na noqu vosa sa lako mai gusuqu; Ena sega ni lesu lala mai vei au; Ia ena vakayacora na veika ka'u sa nakita, Ka rawata na veika ka'u a tala kina.

¹² “O ni na biuti Papiloni ena marau; Ka liutaki yani ki taudaku ni koro ena vakacegu. Na veiulunivanua kei na veidelana era na sere mai Ka ra kaikaila mai na veikau ena marau.

¹³ Ena tubu mai na damanu ena vanua e tu kina na soni, Ka na tubu mai na co ena vanua e tubu kina na soni. Sa i koya oqo e dua na i vakatakilakila ena tawa mudu Me dau nanumi tiko kina na veika au sa cakava.”