Aisea 54 - Vakavakadewa Vou kei na iVola tale eso

Na Loloma i Jiova vei Isireli

¹ I Jerusalemi, o a vaka voli na yalewa sega ni vakaluveni, Ia oqo sa qai rawa mo sere ka kaila ena marau. Ena qai levu cake oqo na luvemu Mai vua na yalewa e sega vakadua ni biuti watina.

² Vakalevutaka cake na valelaca o tiko kina! Vakabalavutaka na kena dali ka vakaukauwataka na i vakadei.

³ O na vakalevutaka na kemu i yalayala ena veiyasana kece; Era na taura lesu tale na vanua o ira na luvemu, Na vanua era sa tawana tiko oqo na veimatanitu; Ka ra na vakasinaiti ena tamata na veikoro sa lala tu oqo.

⁴ Kakua ni rere, o na sega ni vakamaduataki tale, Ka sega ni vakarogocataki. O na guilecava na nomu rogorogo ca Ni bula vakagoneyalewa, Kei na nomu bula dredre vakayada.

⁵ Ni sa vaka na watimu o koya sa buli iko, Na yacana o Jiova ni lewevuqa. Sa nomu i vakabula na Kalou Yalo Savasava ni Isireli O koya sa lewa na vuravura taucoko.

⁶ Isireli o sa vaka e dua na yalewa vakawati gone, Sa biuti koya na watina ka sa vakaloloma sara. Ia sa kacivi iko lesu tale o Jiova, ka kaya:

⁷ “Au a biuti iko tu ena dua na gauna lekaleka; Ia au sa na tauri iko lesu tale ena loloma levu sara.

⁸ Au a vuki tani ena cudru ena dua na gauna; Ia au sa na vakaraitaka vei iko na noqu loloma me tawa mudu.” Sa kaya o Jiova na nomu i Vakabula,

⁹ “Au a yalataka ena gauna i Noa, Me'u kakua ni luvuca tale na vuravura. Ia oqo au sa yalataka ni'u na sega tale ni cudruvi iko, Ka sega ni vunauci iko.

¹⁰ Na veiulunivanua kei na veidelana ena rawa me takali Ia na noqu loloma vei iko ena sega ni oti rawa Ka'u na maroroya tiko me rawa mada na noqu veiyalayalati ni veisaututaki.” Sa tukuna ga na veika oqo o Jiova ni sa lomani iko.

O Jerusalemi Vou

¹¹ A sa kaya o Jiova, “Jerusalemi, na koro vakalolomataki ka sega ni vakacegui, Ka sega e dua me vukei iko. Au na tara tale na kemu yavu ena veivatu talei.

¹² Au na tara na kemu bai ena rupi, Ka cakava na kemu matamata ena vatu makualiliva Kei na kemu bai wavoki na daimani!

¹³ Oi au sara ga au na vakavulici ira na luvemu Ka solia vei ira na sautu kei na bula vakacegu.

¹⁴ Na lewa dodonu ena vakaukauwataki iko Ka galala mai na veivakararawataki kei na veivakarerei.

¹⁵ Kevaka e dua e kaba vakaivalu vei iko, au sega ni vakavuna; O koya yadua ena vala kei iko ena bale!

¹⁶ Au sa buli ira na dautuki kaukamea, O ira era sa vakawaqara na buka ka bulia na i yaragi. Au sa buli ira talega na sotia Era sa vakayagataka na i yaragi me ra veivakamatei kina.

¹⁷ Ia ena sega ni dua na i yaragi e buli Me na vakamavoataki iko. O na sauma rawa na nodra vosa era sa beitaki iko. Au na taqomaki ira na noqu tamata Ka solia vei ira na qaqa.” Ni sai Jiova ga ka sa tukuna oqo.