Aisea 50 - Vakavakadewa Vou kei na iVola tale eso

¹ A sa kaya o Jiova, “O ni sa nanuma beka au sa vakatalai ira tani na noqu tamata Me vaka e dua na tamata sa sereka na watina? E vei ga na i vola vakadinadina ni veisere? O ni nanuma beka au sa volitaki kemuni Vua e dua sa tu vua na noqu dina? Raica o ni a kau yani vakabobula ena vuku Ni nomuni i valavala ca. O ni a kau tani ena vuku ni nomuni talaidredre.

² A cava au sa sega ni kunea kina e dua na tamata Ena noqu lako yani me'u vakabulai ira? A cava era sega ni rogo mai kina ni'u kaci yani? Au sa rui malumalumu beka me'u ia na veivakabulai? Sa rawa vei au me'u vakamamacataka na wasawasa ena noqu vosa ga, Ka'u vukica na veiuciwai me vanua dravuisiga Me ra mate kina na ika ni sa sega na wai.

³ Au rawa ni vukica na lomalagi me butobuto, Ka ubia ena i sulu taga.”

Na Talairawarawa ni Dauveiqaravi i Jiova

⁴ Sa vakavulici au o Jiova ena ka me'u kaya Me rawa ni'u vakaukauwataki ira kina era sa oca. Sa vakauqeti au ena veimataka, Me'u rogoca na ka ena vakavulica vei au.

⁵ Sa dolava na daligaqu o Jiova Ka'u sa sega ni veisaqasaqa Se gole tani mai vua.

⁶ Au sa solia na dakuqu vei ira era vakanakuitataki au, Ka vagolea na kumiqu vei ira era cavuta na vuti ni kumiqu, Ka'u sega ni tabonaka na mataqu mai na madua kei na i kasivi.

⁷ Ia sa sega ni mosi vei au na nodra veivakasewasewani, Baleta ni sa vukei au o Jiova. Au sa qai vakaukauwataki au me vaka na vatu. Au kila ni'u sa sega ni vakamaduataki,

⁸ baleta ni sa tiko voleka ga na Turaga, O koya ena vakadinadinataka ni'u sega ni cala. E dua li e via beitaki au ena so na ka? Me keirau lako vata ki na mataveilewai, Ka me kauta mai na ka e veibeitaki kina.

⁹ O Jiova sara ga vakai koya ena vukei au, O cei ena vakaraitaka rawa ni'u cala? Era na yali kece o ira era beitaki au, Ka ra na yali me vaka na i sulu sa kania na sarasara.

¹⁰ Oi kemuni kece o ni rerevaki Jiova, Ka muria na nona vosa ni nona dauveiqaravi. Kevaka sa rui butobuto sara na sala o ni lakova tiko, Ni vakadinati koya, ka vakararavi vua na nomuni Kalou.

¹¹ Oi kemuni kece o ni nakita mo ni vakarusai ira na tani, Ena vakarusai kemuni na nomuni i naki. Na Turaga sara ga vakai koya ena vakavuna me yaco na ka oqo; O ni na sota kaya kina e dua na veivakararawataki ca sara.