Aisea 5 - Vakavakadewa Vou kei na iVola tale eso

Na Sere ni Loganivaini

¹ Me'u seretaka mada vua na noqu daulomani E dua na sere ni loloma me baleta na nona loganivaini. E dua tiko na nona loganivaini na noqu daulomani, E koto ena dua na delana qele bulabula.

² E a cukita ka biuta tani na kena veivatu Ka qai tea kina na veivaini digitaki. A sa tara e dua na vale ni yadra e loma Ka kelia na qara me dau qaqi kina na qerepi. Sa qai waraka me dreu na qerepi, Ia sa qai vuataka na qerepi ca.

³ Ia oqo kemuni mai Jerusalemi kei Juta, Au vakamasuti kemuni, Mo ni lewa mada ena vukuqu kei na noqu loganivaini.

⁴ A cava tale beka au a sega ni cakava ena noqu loganivaini Ka dodonu me'u a cakava? Ia ni'u sa vakaraica tiko me vuataka na vuana, A cava sa qai vuataka ga kina na qerepi ca?

⁵ Ia oqo au na tukuna vei kemuni, Na ka au na cakava ki na noqu loganivaini. Au na kauta tani na veikau era tubu wavokita Ka basuraka sobu na kena bai, Au na qai laivi ira na manumanu kila me ra buturaka sobu.

⁶ Au na biuta tu ga me veikau tu, Ena sega ni samaki se wereci Ka sa na tubu mai kina na soni kei na kau vakavotona. Au na vakarota talega na o Me kua ni vakatauca kina na uca.

⁷ O Isireli na loganivaini i Jiova ni lewevuqa, Na vaini sa tea sai ira na lewe i Juta. Sa namaka o koya me ra cakava na ka vinaka, Ia sa qai kena i sosomi na vakadave dra. Sa namaka o koya me ra cakava na ka dodonu, Ia sa qai rogo mai na domo ni veivakararawataki.

Na Veika Ca sa Cakava na Tamata

⁸ Ena yaco na veika ca, Vei ira era kuria na vale vei ira sa tu vei ira na vale Vei ira era kuria na vanua vei ira sa tu na nodra vanua Me yacova ni sa sega tale ni dua na tikina e vo. Ka mo ni qai tiko vakataki kemuni ga ena loma ni vanua.

⁹ Au sa rogoca ni sa kaya o Jiova ni lewevuqa, “Ena vuqa sara na vale ena rusa, Ka na sega ena tawana na veivale lelevu ka rairai vinaka.

¹⁰ E tini na eka na vaini ena rawa kina e dua na qaloni waini Ka rawa e dua na i vakarau sila mai na tini na i vakarau sore ni kau.”

¹¹ Ena yaco na veika ca, Vei ira era sou ena mataka lailai Ka vaqara me ra gunu Ka qai mateni tiko ena yakavi taucoko.

¹² Ena nodra kana magiti era sa rogoca kina, Na api, na tibereli, na lute ka ra gunuva kina na waini, Ia era na sega ni via kauwaitaka na veika sa cakava o Jiova.

¹³ O koya oqo era na kau kina vakabobula na noqu tamata. Era na mate na nomuni turaga ena viakana. Ka ra mate na tamata wale ena karamaca.

¹⁴ Sa vakalevutaka na ketena na i bulubulu, Ka vakarabailevutaka na gusuna, Me tilomi ira na turaga kei Jerusalemi, Kei na dua na i lala tamata wale, Vata kei na nodra maue kei na kosakosa.

¹⁵ Ena vakamaduataki na tamata kecega Ka ra vakayalomalumalumutaki kece na dokadoka.

¹⁶ Sa vakaraitaka na nona cecere o Jiova ni lewevuqa, Ena nona vakayacora na ka dodonu, Ka vakaraitaka nona savasava Ena nona lewai ira na nona tamata.

¹⁷ Ena veiyasa ni koro sa rusa tu, Era na kana co kina na lami Ka ra na kunea talega kina na me Na veico me ra kania.

¹⁸ Ena yaco na veika ca vei ira era sa sega ni sereki ira rawa Mai na nodra i valavala ca.

¹⁹ Era na kaya, “Laiva mada me vakatotolo mai o Jiova, Ka cakava sara na ka e kaya me na caka me da raica mada. Laiva mada na nodra Kalou na Isireli, Me cakava na nona i naki, Me da raica na ka e nanuma.”

²⁰ Ena yaco na veika ca, Vei ira era vakatoka na vinaka me ca. Era sa vukica na butobuto me rarama, Kei na rarama me butobuto. Era sa cakava na ka gaga me kamikamica, Kei na kamikamica me gaga.

²¹ Ena yaco na ka ca vei ira Era nanuma ni ra sa vuku Ka yalomatua sara.

²² Ena yaco na veika ca vei ira Era sa dau gumatua ena gunu waini Kei ira na doudou ni ulia na gunu kaukauwa ni mateni.

²³ Ia o ni sa sereki ira era sa cala, O ira era sa taura na ka era sa saumi kina, Me ra cakava na ka tawa dodonu. O ni sa qai kauta tani Mai vei ira na tamata tawa cala na nodra dodonu.

²⁴ Ia me vaka na kena kama na vu ni sila ena buka, Kei na kena yavu na co madu ena yameyame ni buka, Sa na vuca vakakina na wakadra, Ka vuka cake na sedra me vaka na kuvu ni soso. Ni ra sa cata na lawa i Jiova ni lewevuqa, Ka beca na nona vosa na Le Dua Yalo Savasava ni Isireli.

²⁵ O koya oqo sa cudruvi ira kina na nona tamata o Jiova, Ka sa dodoka yani na ligana me totogitaki ira. Ena uneune na veiulunivanua, Ka na mai tu na yagodra era sa mate oti Ena gaunisala me vaka na benu. Ni sa yaco kece oqo e sa sega ga ni oti Na cudru ni Turaga. A sa dodoka tikoga yani na ligana.

²⁶ Ena solia na i vakatakilakila na Turaga Ki na matanitu sa tu vakayawa. Sa kaluvi ira me ra lako mai na i yalayala kei vuravura. Ka raica ni sa totolo ka sega ni bera na nodra lako mai.

²⁷ Sa sega ni dua vei ira me oca se tarabe, Era sa sega ni sosovu se via moce, Ka sa sega ni bau lalaga e dua na beleti ni tolodra, Se cavuka e dua na nodra i vava.

²⁸ Sa gagata na gasau ni nodra dakaititi, Ka sa vakarau vana sara ga na nodra dakaititi. Na bukubuku ni nodra ose sa vaka na vatu gagata, Ka sa vaka na covulaca na nodra qiqinivalu.

²⁹ Na domodra na sotia sa vaka na domo ni laione, Era sa vakamatea e dua na manumanu kila, Ka sega ni dua e kauta tani rawa ni ra sa colata tiko.

³⁰ Ena siga o ya era sa tagicaki Isireli, Me vaka na rogo levu ni vadugu ni wasawasa, Kevaka e dua e raica yani na vanua, Ena raica na butobuto kei na ka rarawa, Ka sa vakabutobutotaki na rarama ena kena vei o.