Aisea 49 - Vakavakadewa Vou kei na iVola tale eso

O Isireli, a Rarama ki na Veimatanitu

¹ Ni rogoci au na veimatanitu Oi kemuni na tamata o ni tu sara vakayawa. Ni bera ni'u qai sucu mai sa digitaki au o Jiova Ka lesi au me'u nona dauveiqaravi.

² A sa cakava na noqu vosa me gagata vaka na i seleiwau, Ka sa taqomaki au ena ligana. Sa buli au me vaka na gasau ni dakaititi, Sa gagata ka vakarau me vanataki.

³ A sa kaya vei au, “Isireli o iko na noqu dauveiqaravi. Era vakalagilagi au na tamata ena vukumu.”

⁴ Au a qai kaya, “Sa tawa yaga na noqu cakacaka! Au a vakayagataka na noqu kaukauwa Ka sa sega ni rawa kina e dua na ka.” Ia ka'u na vakararavitaka ga vei Jiova na noqu bula, Ka sa tiko ga vua na Kalou na noqu i cocovi.

⁵ A digitaki au o Jiova ni'u se bera ni sucu Sa buli au me'u nona dauveiqaravi me'u kauti ira Lesu mai na nona tamata na Isireli Era a veiseyaki tu. A solia vei au o Jiova me'u dokai, Ka sai koya na vu ni noqu kaukauwa.

⁶ A sa kaya vei au o koya, “Sa tu vei au e dua na i tavi levu mo qarava na noqu dauveiqaravi O na sega wale ga ni vakasuka lesu tale mai Na nodra lagilagi na Isireli era sa bula tiko, Ia au na buli iko talega mo rarama ki na veimatanitu, Me na vakabulai kina na vuravura taucoko.”

⁷ A sa kaya na Kalou savasava na i vakabula i Isireli Kivei koya sa beci vakalevu sara, O koya ka sa cati mai vei ira na veimatanitu, Ka sa nodra dauveiqaravi na veiliutaki. “Era na tucake na tui ni ra raici iko Ka ra na cuva ena vakarokoroko na turaga vei iko.” Ena yaco na ka oqo baleta ni sa digitaki iko o Jiova, O koya na Kalou Yalo Savasava ni Isireli, O koya sa dau vakayacora na nona vosa ni yalayala.

Na Vakalesui Tale ni Bula e Jerusalemi

⁸ A sa kaya o Jiova vei ira na nona tamata, “Sa na yaco mai na gauna me'u vakabulai kemuni kina, Au na qai lomani kemuni ka sauma na nomuni kere veivuke. Au na taqomaki kemuni ka maroroi kemuni Ka cakava ena vukumuni e dua na veiyalayalati Kei ira na tamata kecega. Au na solia mo ni la'ki tawana tale Na nomuni vanua sa lala tu.

⁹ Au na kaya vei ira na vesu tu, Ni lako! Vei ira era tiko ena butobuto. Ni lako mai ki na rarama! Era na qai vaka na sipi sa kana voli ena veidelana;

¹⁰ Era na sega ni viakana se viagunu. Ena sega ni kati ira na katakata ni siga Kei na nuku katakata ni vanua dravuisiga, Ni sa na liutaki ira voli o koya sa lomani ira. Ena liutaki ira yani ki na veitobu wai.

¹¹ Au na cakava e dua na gaunisala levu Me kosova na veiulunivanua; Ka vakarautaka e dua na gaunisala Me ra lako kina na noqu tamata.

¹² Era na lako sara mai vakayawa na noqu tamata Mai na vualiku kei na ra Ka vakakina mai Sainimi mai na ceva.”

¹³ Ni sere na lomalagi, ka kaila ena marau na vuravura. Ni ia na sere na veiulunivanua! Sa na vakacegui ira na nona tamata o Jiova Ka lomani ira na nona tamata era sa rarawa.

¹⁴ Ia era sa kaya na tamata mai Jerusalemi “Sa biuti keda o Jiova, Ka sa guilecavi keda.”

¹⁵ Ia sa qai sauma mai na Turaga. E rawa li ni dua na yalewa me guilecava na luvena lailai, Ka sega ni lomana na luvena a vakasucuma mai? E dina ni rawa ni dua na tina ni gone e guilecava na luvena. Ia au na sega sara ni guilecavi kemuni.

¹⁶ Jerusalemi au na sega sara ni rawa ni guilecavi iko. Au sa vola na yacamu ena qeteqete ni ligaqu.

¹⁷ O ira era na mai tarai iko vou tale Era sa voleka ni yaco mai; Era na qai toki laivi o ira era a vakarusai iko.

¹⁸ Rai wavoki mada ka raica na ka sa yaco tiko. O ira kece na luvemu era sa soqoni vata ka lako mai vei iko. Me vaka ni sai au dina na Kalou bula O na dokadokataki ira na luvemu Me vaka na nona dokadokataka na nona i taube vatu talei E dua na yalewa sa qai vakawati.

¹⁹ Na nomu vanua ena vakacacani ka lala tu Ia oqo ena yaco me lailai ga Vei ira era lako mai me ra tawana, Kei ira era a vakacacani iko tu, Era na kau tani vakayawa sara mai vei iko.

²⁰ Era na kaya vei iko ena dua na siga O ira ga na luvemu sa sucu donuya na gauna ni tiko vakabobula, “Sa lailai na vanua oqo vei au, Sa gadrevi eso tale na rumu me da tiko kina.

²¹ O na qai kaya e lomamu, “O cei e vakasucumi ira na gone oqo vei au. Era a sa yali na luvequ kau sa biu taudua tu. Au a kau vakabobula ka kau sara vakayawa. O cei e a susugi ira na gone oqo? Au a sa tu taudua tu ga, Era lako mada mai vei na gone oqo?”

²² A qai kaya o Jiova na Kalou vei ira na nona tamata: “Au na laveta na ligaqu ka tukutuku yani ki na veimatanitu Ka ra na qaravi kemuni na ranadi me vaka na tina.

²³ Era na cuva sobu ka vakarokoroko vei kemuni Ka dramica na kuvu ni soso mai na yavamuni. Ia o ni sa na qai kila ni sai au o Jiova O ira kece era waraka na noqu veivuke, Era na sega ni vakamaduataki.”

²⁴ Ena rawa li ni kovei na i toki ni valu mai vua na qaqa? Se me sereki na nona bobula e dua na turaga lewa kaukauwa?

²⁵ A qai sauma o Jiova ka kaya, “Sa i koya sara ga oqori na ka ena yaco. Ena kau tani yani na nona bobula na qaqa, Ka kovei na nona i toki ni valu na turaga lewa kaukauwa. Au na vala kei koya ga e vala kei kemuni Ka sereki ira na luvemuni.

²⁶ Au na vakavuna me ra veivakamatei ga vakai ira O ira era vakasaurarataki kemuni. Era na mateni ena dra me vaka era mateni ena waini. Ia era sa na qai kila na veimatatamata kecega ni sai au o Jiova, O koya a vakabulai kemuni ka sereki kemuni. Era na kila ni sai au na Kalou Kaukauwa i Isireli.”