Aisea 46 - Vakavakadewa Vou kei na iVola tale eso

Na Veikalou ni Papiloni

¹ “Oqo na kedra i cavacava na kalou ni Papiloni! E rau a dau qaravi taumada tu o Bele kei Nipo, Ia oqo e rau sa vakavodoki ena asa, Sa i colacola bibi ena daku ni manumanu sa oca.

² Erau sa kala sobu, erau sa cuva sobu vata; E rau sa sega ni ia rawa na veivakabulai, Ia erau sa vesu ga ka kau yani vakabobula.

³ “Ni vakarorogo mada vei au, na kawa i Jekope, Oi kemuni na vo-ni-bula ni yavusa o Isireli. Au a qaravi kemuni voli mai Ena gauna o ni se qai sucu mai kina.

⁴ Oi au na nomuni Kalou ka'u na taqomaki kemuni, Vukei kemuni ka vakabulai kemuni.

⁵ “O cei o ni na vakatautauvatataka kei au? E bau dua tale tiko li e keirau tautauvata kaya?

⁶ Era sa dolava na nodra baosi na tamata Ka ra sa sova mai na koula. Era sa sauma e dua na matai ni koula Me cakava e dua na kalou, Era sa qai cuva sobu ka qarava.

⁷ Era a laveta cake ki domodra ka colata Era a biuta ena dua na vanua ka sa tu ga e kea Ka sega ni toso rawa mai na vanua sa biu tu kina. Kevaka e dua e masu kina, Ena sega ni sauma rawa mai Se vakabulai koya mai na leqa.

⁸ “Ni nanuma mada na ka oqo na tamata i valavala ca, Ka vakasamataka na ka au a cakava.

⁹ Ni nanuma mada na veika e a yaco ena gauna e liu; Ni kila ni sai au taudua ga na Kalou, Ka sa sega tale ni dua me tautauvata kei au.

¹⁰ Mai na i vakatekivu au a tukuna na i vakataotioti, Ka'u sa cakava na veika kece au nakita me'u cakava.

¹¹ Au a kaciva e dua na tamata me lako mai ena tokalau Ka na co sobu me vaka na manulevu, Me vakayacora na veika au sa nakita. Au a tukuna ka na vakayacori.

¹² “Ni rogoci au mada na tamata vakadrecike, O ni nanuma tiko ni yawa sara na qaqa.

¹³ Au sa kauta vakavoleka mai na siga ni qaqa, Io, sa sega sara ni yawa. Ena sega ni vakaberaberataki na noqu qaqa. Au na vakabulai Jerusalemi, Ka kauta mai na noqu lagilagi e kea vei Isireli.”