Aisea 45 - Vakavakadewa Vou kei na iVola tale eso

Sa Digitaki Sairusi o Jiova

¹ Sa digitaki Sairusi o Jiova me tui! A sa digitaki me vakamalumalumutaka na veimatanitu; Sa talaki me luvata tani na i sulu ni veiliutaki vakatui; Ena dolava vua o Jiova na veimatamata ni koro. A sa kaya o Jiova vei Sairusi,

² “Au sa na vakarautaka na nomu sala, Me'u na talaraka sobu na veiulunivanua. Au na basuraka sobu na veimatamata parasa, Ka musuka rua na kedra veibai kaukamea.

³ Au na solia vei iko na i yau mai na veivanua e vunitaki tu kina Ena veivanua butobuto; O na qai kila kina ni sai au o Jiova, Ka sa digitaki iko na nodra Kalou na Isireli.

⁴ Au sa digitaki iko mo vukei ira na noqu tamata na Isireli, O ira na tamata au sa digitaka. Au sa solia vei iko mo dokai vakalevu, Dina ga ni o sega ni kilai au.

⁵ Oi au ga o Jiova; ka sa sega tale ni dua na Kalou. Au na vakaukauwataki iko, Dina ga ni o sega ni kilai au.

⁶ Au sa cakava na ka oqo me ra kila kece kina Mai na i cabecabe ki na i dromudromu ni siga Ni sai au taudua ga o Jiova, Ka sa sega ni dua tale na Kalou keirau lewe rua kaya.

⁷ Au sa bulia na rarama kei na butobuto; Ka'u kauta mai na veivakalougatataki kei na veivakarusai. Au sa cakava na ka kecega oqo oi au o Jiova.

⁸ Au na tala sobu mai lomalagi na qaqa me vaka na uca Ka na tadola na vuravura me ciqoma, Ena qai sereka mai na galala kei na dodonu. Oi au o Jiova au na vakavuna me yaco na ka oqo.”

Na Turaga ni Veika Buli kei na Veitabagauna

⁹ E bau dua li na kuro qele e via veileti kei koya e bulia Se dua na kuro ena kedra maliwa na kena vo? Ena taroga li vua na dautuli kuro qele dregadregata Na cava e cakava tiko? Sa bau kudruvaka li na kuro vua a buli koya ni tawa vuku?

¹⁰ E dua li na tamata ena via kaya vei rau na nona qase, “Na cava o drau buli au tu kina vaka oqo?”

¹¹ O Jiova na nodra Kalou na Isireli, O koya a buli ira, “Sa sega ni dodonu mo tarogi au ena vukudra na luvequ Se mo tukuna vei au na ka me'u cakava!

¹² Oi au ka'u a bulia na vuravura, Ka buli ira na tamata me ra tiko kina. Ia ka'u sa tevuka na lomalagi ena noqu kaukauwa, Ka'u sa lewa na matanisiga, na vula, kei na veikalokalo.

¹³ Oi au ga au sa vakauqeti Sairusi ena yalo dodonu Ka'u na vakadodonutaka na nona sala kecega. Ena tara tale na noqu koro o Jerusalemi, Ka sereki ira na noqu tamata era sa vesu tu. Sa sega ni soli vua e dua na ka Se saumi me cakava na ka oqo.” Ni sai Jiova ga sa kaya vakaoqo.

¹⁴ A sa kaya o Jiova vei ira na Isireli, “Ena nomuni na i yau nei Ijipita kei Eciopea Ka ra na nomuni bobula na tamata balavu ni Sipa, Era na vesu tu ena sinucodo ka muri kemuni. Era na cuva sobu vei kemuni ka vakatusa, ‘Sa tiko kei kemuni na Kalou, ka sai Koya taudua ga na Kalou.

¹⁵ Na nodra Kalou na Isireli, O koya sa vakabulai ira na nona tamata. Sa sega ni dau vakaraitaki koya.

¹⁶ O ira kece era dau buli matakau Era na vakamaduataki Ka vakalolovirataki kece sara.

¹⁷ Ia sa vakabulai Isireli o Jiova Ena tawa mudu na nona qaqa, Ka ra na sega ni vakamaduataki na lewena.’ ”

¹⁸ Sa bulia na lomalagi o Jiova, Ka sai koya taudua ga na Kalou. O koya ka a bulia na vuravura ka vakataudeitaka, Sa sega ni bulia me vanua lala, Ia me ra tiko ga kina na tamata. “Sa i au ga o Jiova, Ka sa sega tale ni dua na kalou.

¹⁹ Au sa sega ni vosa vuni, Se vunia tiko na noqu i naki. Au sega ni vinakata me ra vaqarai au na Isireli Ena vanua sa sega ni vakaivakarau. Oi au o Jiova ka sa tukuna na ka dina; Ka'u sa vakatakila na ka sa dina.”

O Jiova kei na Veimatakau ni Papiloni

²⁰ A sa kaya o Jiova, “Ni lako vata kece mai na tamata ni veimatanitu, Oi kemuni kece o ni bula mai na veivanua. O ni sa rui lialia, O ni sa kauta voli ga na nomuni matakau, Ka masu tiko ki na kalou sa sega ni vakabulai kemuni rawa.

²¹ Ni lako mai me mai rogoci Na nomuni kisi ena mataveilewai; Laiva me ra veivosaki kei ira na mai veitaqomaki. O cei e a tukuna makawa na veika ena yaco, Ka yalataka makawa sara? E sega li ni oi au o Jiova. O koya sa vakabulai ira na nona tamata? Sa sega tale ni dua na kalou, oi au taudua ga.

²² Ni gole mai vei au mo ni vakabulai Na tamata mai na veiyasa i vuravura kece. Ni sai au taudua ga na Kalou ka sega Ni dua me keirau lewe rua.

²³ Na veika kece au kaya ena yaco dina Ka na sega sara ni veisau. Au sa yalataka ga vakai au. Era na lako kece mai na tamata ka mai cuva vei au Ka yalataka me ra yalodina vei au.

²⁴ Era na kaya. ‘Sa rawa ga na qaqa kei na kaukauwa mai vei au Ia o ira kece era cati au era na vakamaduataki.

²⁵ Oi au o Jiova, au na sereki ira kece na kawa i Jekope, Era na qai vakalagilagi au.’ ”