Aisea 44 - Vakavakadewa Vou kei na iVola tale eso

Sa Kalou Duadua Ga o Jiova

¹ A sa kaya o Jiova, “Ia oqo ni rogoca mada na noqu tamata na Isireli, Sa i kemuni na kawa i Jekope na noqu tamata digitaki.

² Oi au o Jiova au a buli kemuni, Ka'u a dau vukei kemuni mai na gauna o ni tekivu bula kina. Ni kakua ni rere; sai kemuni na noqu dauveiqaravi, Ka noqu matatamata digitaki kau dau lomana.

³ Au na solia na wai ki na vanua sa viagunu, Ka vakadrodroya na veiuciwai ena vanua dravuisiga. Au na sovaraka na yaloqu vei ira na luvemuni Kei na noqu veivakalougatataki vei ira na nomuni kawa.

⁴ Era na tubu cake me vaka na veico sa vakasuasuataki Vinaka kei na kuta ena bati ni veiuciwai.

⁵ Era na dui kaya yadua na tamata, ‘Au sa nei Jiova!’ Era na lako mai me mai duavata kei ira na Isireli. Na tamata yadua ena vakatakilakilataka na ligana, Ena yaca ni Turaga, ka okata me dua na tamata ni Kalou.

⁶ A sa kaya o Jiova na tui kei Isireli Na Turaga kaukauwa, na kena i Vakabula. Oi au na kena i vakatekivu kei na i vakataotioti, Na Kalou taudua ga; Sa sega tale ni dua na Kalou, Oi au taudua ga.

⁷ O cei sa tautauvata kei au? Ia me ra tucake mai, Me ra vakaraitaka ka biuta e mataqu. O cei e a vakaraitaka mai na i vakatekivu Na veika ena yaco mai e muri? Me tukuna mai vei keda na veika e vakarau yaco mai.

⁸ Ni kakua ni rere na noqu tamata. Au a sega li ni tukuna vei kemuni mai na i vakatekivu Na veika ena yaco? Sa i kemuni na noqu i vakadinadina. E dua tale tiko li na Kalou? E sega tale ni dua na i karua ni dauveibuli au kila?

⁹ Era tawa yaga o ira kece era dau caka matakau, Ka tawa yaga na matakau era cakava. O ira era qarava na veikalou oqo Era mataboko, lecaika ka ra na vakamaduataki.

¹⁰ Sa sega sara ni vinaka Me ceuti e dua na matakau Me qaravi me vaka e dua na kalou.

¹¹ O ira kece era qarava na matakau Era na vakamaduataki Ka ni ra sa tamata ga o ira era cakava na matakau. Me ra lako vata mada mai me ra mai lewai, Era na vakarerei ka vakamaduataki.

¹² Sa taura e dua na tiki ni kaukamea na dautuki kaukamea ka biuta ki na dela ni buka ka tukilaka yani ena nona i tuki levu, me buli kina na kena i bulibuli. Ni sa cakacaka voli, a sa qai viakana, ka viagunu ka sa oca.

¹³ Sa vakarautaka e dua na kau na matai. Sa mai droinitaka yani na kena i yaloyalo ena peni, a sa qai siviraka yani ena nona i yaya vakamatai, ka bulicaka me vaka na tamata totoka, ka qai la'ki biuta ena nona vale.

¹⁴ Ena taya sobu beka e dua na sitari se digia e dua na oki se damanu mai na veikau. Se ena tea e dua na sitari ka na qai waraka na uca me vakabula.

¹⁵ E dua na tamata e vakayagataka ena tiki ni dua na kau me buka ka qai vakayagataka e dua tale na tikina me cakava kina e dua na matakau. Eso na tiki ni kau e vakayagataka me buka me tatalai kina ka vavi madrai talega kina. Ia sa qai vakayagataka e dua tale na tikina me cakava kina e dua na matakau me vakalou kina.

¹⁶ Sa vakayagataka eso na tiki ni kau me waqaca kina e dua na buka. A sa tavuna kina eso na lewe ni manumanu ka kania, ka mamau. Sa tatalai talega kina ka kaya, ‘Au sa katakata vinaka sara! Sa dua na buka vinaka.’

¹⁷ Ia sa qai cakava e dua na matakau ena vo ni kau vata ga o ya, ka cuva sobu ka qarava. A sa masuta ka kaya, ‘Sa i kemuni na noqu kalou ni vakabulai au.’

¹⁸ Era sa rui lialia sara na tamata vaka o ya; era sa sega ni kila na ka era cakava tiko. Era sa tabonaka na matadra ka sogota nodra vakasama ki na dina.

¹⁹ O koya sa cakava na matakau sa sega ni kila se vakasamataka rawa ka kaya, ‘Eso na tiki ni kau au a vakama. Au a vavi madrai ena kena qilaiso, ka tavu lewe ni manumanu kina ka kania. Ia mai na vo ga ni kau o ya, au a qai cakava kina e dua na matakau. Au sa cuva tiko oqo ka vakalou ki na dua na tiki ni kau!’

²⁰ Sa kana dravusa o koya. Na nona i tovo ni vakasama sesewa sa vakacalai koya ka sega ni rawa ni sereki mai kina. Sa sega ni raica rawa o koya ni sa ka lasu na matakau sa qumia tiko e ligana.”

O Jiova, na Dauveibuli kei na i Vakabula

²¹ A sa kaya o Jiova, “Ni nanuma mada na veika oqo Isireli. Ni nanuma ni o ni sa noqu dauveiqaravi. Au a buli kemuni mo ni noqu dauveiqaravi Ka'u na sega sara ni guilecavi kemuni.

²² Au a sa taviraka tani na nomuni valavala ca me vaka na o. Ni lesu tale mai vei au, oi au ga au na vakabulai kemuni.

²³ Ni kaila ena marau na lomalagi! Ni kaila na veivanua titobu e vuravura! Ni kaila ena marau na veiulunivanua Kei na kau yadua ni veikau! Sa vakabulai ira na nona tamata na Isireli o Jiova, Ka sa vakaraitaka na nona qaqa.

²⁴ Oi au o Jiova, o koya ka buli kemuni, Ka nomuni i Vakabula. Oi au o Jiova o koya sa bulia na ka kecega. Oi au taudua ga au a tevuka na lomalagi, Ena gauna au a bulia kina na vuravura Ka sega ni dua e vukei au kina.

²⁵ Au sa vakalialiai ira era dautukuna na veika ena yaco mai Ka vakacacana na nodra yalayala na daurairai. Au sa vakalasuya na nodra vosa na vuku.

²⁶ Ia ni sa yalataka e dua na ka na noqu dauveiqaravi Ka'u tala na noqu i talai me tukuna na noqu i naki Au na vakayacora sara me ra yaco dina. Au a tukuna ki Jerusalemi Ni ra na bula tale kina na tamata, Ka tara cake tale na koro oqo mai na kena rusa.

²⁷ Oi au, au a kaya ki na wasawasa me mamaca; Au na vakamacara talega na veiuciwai.”

²⁸ Au na kaya ena vuku i Sairusi, Sa i koya na noqu i vakatawa, Ka na vakayacora kece na noqu i naki. O na vakarota me tara tale o Jerusalemi, Ka caka tale na yavu ni Valenisoro.