Aisea 43 - Vakavakadewa Vou kei na iVola tale eso

Yalataka na Kalou me Vueti Ira na Nona Tamata

¹ A sa kaya vakaoqo o Jiova, O koya sa buli iko, i Jekope, O koya sa vakayacori iko, i Isireli: Kakua ni rere, ni'u sa voli kemuni vakadua; Au sa kacivi kemuni ena yacamuni, O ni sa noqu.

² Ni o ni lako ena loma ni wai, Au na tiko kei kemuni, Kei na loma ni veiuciwai Era na sega ni luvuci kemuni. Ke o ni lako ena loma ni buka O ni na sega ni kama, Ka na sega ni kati kemuni Na yameyame ni buka.

³ Ni sai au o Jiova na nomuni Kalou Na Kalou Yalo Savasava ni Isireli O koya sa vakabulai kemuni. Au na soli Ijipita yani me kemuni i voli Ka soli Eciopea kei Sepa yani mo ni sereki kina.

⁴ Au na solia yani na veimatanitu taucoko Mo ni vakabulai kina Baleta na kemuni talei vei au, Ka'u sa dokai kemuni ka lomani kemuni.

⁵ Ni kakua ni rere ni'u sa tiko kei kemuni. Au na kauti ira mai na nomu kawa Mai na tokalau kei na ra, Ka kauti ira mai ki na nomuni vanua.

⁶ Au na kaya ki na vualiku me sereki ira mai Ka tukuna ki na ceva me kakua ni tarovi ira. Laivi ira na noqu tamata me ra lesu mai na veivanua yawa.

⁷ Era sa noqu tamata Ka'u a buli ira me ra vakavuna me'u dokai!

Sa i Vakadinadina Bula i Jiova o Isireli

⁸ A sa kaya na Kalou, “Kauti ira mai na tamata oqo. Sa tu na matadra, ia era sa mataboko. Sa tu na daligadra ia era sa didivara!

⁹ Tukuna ki na veimatanitu me ra lako mai, Kei ira na tamata me ra soqo vata mai. O cei vei ira sa rawa me tukuna na ka oqo Ka tukuna vei keda na veika e a yaco e liu? Laiva me ra kauta mai na nodra i vakadinadina Me ra mai vakadinadinataka vei keda ni dina na nodra vosa.

¹⁰ Kemuni na Isireli, sai kemuni na noqu i vakadinadina, Ka'u a digitaki kemuni mo ni noqu i vakadinadina, Ka'u a digitaki kemuni mo ni noqu matanitu dauveiqaravi, Ka mo ni kilai au ka vakabauti au.

¹¹ Mo ni kila talega ni sai au taudua ga na Kalou Ka sega tale ni dua e a liu vei au Ka na sega tale ni dua me na taravi au. Sa i au taudua ga o Jiova, Oi au taudua talega au rawa ni veivakabulai.

¹² Au a tukuna oti na ka ena yaco, Ia au sa qai lako mai me'u vukei kemuni. E sa sega ni bau dua na kalou tani e cakava na ka oqo; Sa i kemuni na noqu i vakadinadina.

¹³ Oi au na Kalou, ka'u Kalou taudua ga ena veigauna kecega mai muri. Ena sega sara ni dua me na dro tani rawa mai vei au, Ka na sega ni rawa ni dua e veisautaka na ka au cakava.”

Na Dro mai Papiloni

¹⁴ A sa kaya na Kalou Yalo Savasava ni Isireli, O Jiova na nomuni i Vakabula. “Au na tala yani e dua na mataivalu ki Papiloni Me'u vakabulai kemuni kina. Au na basuraka sobu na matamata ni koro Ka na vuki na nodra kaila na lewena me domo ni tagi.

¹⁵ Oi au o Jiova na nomuni Kalou Yalo Savasava, Au a buli kemuni na Isireli ka'u sa nomuni tui.”

¹⁶ O koya e a cakava e dua na sala ena loma ni wasawasa Ka bulia e dua na gaunisala ena wai kui kaukauwa.

¹⁷ E a kauta yani e dua na mataivalu me rusa; E mataivalu tamata qaqa, na qiqinivalu kei na ose. Era sa bale sobu ka sega ni tucake tale Ka boko yani vakadua Me vaka na yameyame ni cina.

¹⁸ Ia a kaya o Jiova. “Ni kakua ni kabita matua tiko na veika makawa Se taura tikoga na veika sa sivi oti yani.

¹⁹ Ni raica, au sa na cakava e dua na ka vou. Sa yaco oti, o sa rawa ni raica oqo! Au na cakava e dua na gaunisala Ena loma ni vanua dravuisiga, Ka vakadrodroya tu eso na uciwai vei kemuni e kea.

²⁰ O ira sara mada ga na manumanu kila era na dokai au; Na oliva kei na lulu era na vakacaucautaki au Ni'u na cakava na veiuciwai me ra drodro Ena vanua dravuisiga; Me ra gunu kina na noqu tamata.

²¹ Sa i ira na tamata au a buli ira me ra noqu, Ka ra na laga sere ni vakacaucautaki au!”

Na i Valavala Ca i Isireli

²² A sa kaya o Jiova, “E sega ni oi au o ni a qarava, O ni a sa oca ni qaravi au Isireli.

²³ O ni a sega ni kauta mai vei au Na nomuni i soro kama sipi; Se dokai au ena nomuni veisoro. Au a sega ni lavaka vei kemuni na i solisoli, Se vakaicolacolataki kemuni ena ka boi vinaka.

²⁴ O ni sega ni volia na ka boi vinaka me noqu Se vakacegui au ena uro ni nomuni manumanu. Ia o ni sa vakacolati au ga ena nomuni i valavala ca; Ka vakaocai au ena nomuni caka cala.

²⁵ Au sa cakava na ka oqo ena vukuqu ga; Ka'u na sega ni nanuma tiko na nomuni i valavala ca.

²⁶ Vakananuma mada na veika e baleti au Ka me da veilewai mada. Tukuna mai na veika e baleti kemuni Me vakadinadinataki kina ni o ni sa dodonu!

²⁷ O ira sara na nomuni qase e liu era i valavala ca, Era a i valavala ca talega vei au na nomuni i liuliu.

²⁸ Ka vakadukadukalitaka na noqu vale tabu O ira na nomuni turaga. Au sa mani kauta mai kina ki Isireli na veivakarusai Ka laivi ira na noqu tamata me ra vakarogocataki.”