Aisea 42 - Vakavakadewa Vou kei na iVola tale eso

Na Dauveiqaravi i Jiova

¹ A sa kaya o Jiova, “Sa i koya oqo na noqu dauveiqaravi O koya au sa vakaukauwataka; Sa i koya ka'u sa digitaka ka taleitaka. Au sa solia vua na yaloqu, Ka sai koya ga ena vakavuna Na lewa dodonu ki na veimatanitu.

² Ena sega ni qolou se tabalaka ki cake na domona, Se la'ki vosa tu e cake ena veigaunisala.

³ Ena yalovinaka o koya vei ira era sa malumalumu Ka yalololoma vei ira era leqa. Ena kauta mai o koya na lewa dodonu ki na tamata kecega.

⁴ Sa na sega ni rere se yalolailai o koya, Ka na vakataudeitaka na lewa dodonu e vuravura. Era waraka tu na veivanua yawa na nona i vakavuvuli.”

⁵ A sa bulia na lomalagi na Kalou ka tevuki ira yani, A sa bulia talega na vuravura, Kei na veika bula kecega e tu kina; Sa i koya ga sa solia na bula kei na i cegu ki na tamata. Ia oqo sa qai kaya o Jiova na Kalou vua na nona dauveiqaravi,

⁶ “Oi au o Jiova, ka'u sa kacivi iko ena dua na i naki vinaka. Au a taura na ligamu ka maroroi iko. Ena vukumu au na cakava kina e dua na veiyalayalati Vata kei ira na tamata kecega, Ka kauta mai na rarama ki na veimatanitu kecega.

⁷ O na dolava na matadra era mataboko Ka sereki ira era tiko ena vanua butobuto Ena veivale ni veivesu.

⁸ Oi au taudua ga o Jiova na nomu Kalou. E sega tale ni dua na kalou keirau vota vata na noqu lagilagi Ka'u na sega ni solia na noqu dokai ki na dua na matakau.

⁹ Na veika au a yalataka era sa yaco. Ia oqo au sa na tukuna vei kemuni eso na ka vou Ni ra sa bera ni yaco mai.

A Sere ni Veivakacaucautaki

¹⁰ Ni seretaka e dua na sere vou vei Jiova; Ni seretaka na nona lagilagi na vuravura taucoko! Ni vakacaucautaki koya oi kemuni o ni soko tiko e wasawasa. Mo ni vakalagilagi koya na veika bula kece ni wasawasa. Ni sere vua na veivanua yawa kei kemuni kece o ni tiko kina.

¹¹ Laiva na vanua dravuisiga kei na kena veikoro, Me ra vakacaucautaka na Kalou. Laiva me ra vakacaucautaki koya na lewe i Kitari. Laivi ira era tiko ena koro o Sela

¹² Me ra vakacaucautaka ka vakalagilagi Jiova!

¹³ Sa lako yani o Jiova me vala ena nona qaqa, Sa vakarau ka gadreva me vala. A qolou ka kaila ena kaila ni valu o koya, Ka sa vakaraitaka na nona qaqa ena nona saqati ira na meca.

Yalataka na Kalou me Vukei Ira na Nona Tamata

¹⁴ A sa kaya na Kalou, “Sa dede sara na noqu galu tiko; Ka'u sega ni vosa mai vei ira na noqu tamata. Ia oqo na gauna me'u yavala kina, Ka'u na kaila me vaka e dua na yalewa taratara.

¹⁵ Au na vakarusa na veidelana kei na veiulunivanua, Ka vakavuna me ra malai na co kei na kau. Au na vukica na veiuciwai me vanua dravuisiga, Ka vakamacara na veitobu wai.

¹⁶ Au na liutaki ira na noqu tamata mataboko Ena sala era sa bera ni lakova vakadua. Au na vukica na nodra butobuto me rarama, Ka veisautaka na vanua sukusukura Me tautauvata e matadra. Au na cakava dina sara na veika oqo.

¹⁷ Era na vakamalumalumutaki ka vakamaduataki. O ira kece era vakadinata ka dau masuta na veimatakau.”

Mataboko ka Didivara o Isireli

¹⁸ A sa kaya o Jiova, “Dou rogoca, oi kemudou na tamata didivara! Ni vakararai matua sara, oi kemudou sa mataboko!

¹⁹ E dua li sa mataboko vakalevu cake Mai vua na noqu dauveiqaravi, Ka didivara vakalevu cake mai vua na noqu i talai?

²⁰ I Isireli, sa levu na ka o raica, Ia na cava e sa kena i balebale oqo vei iko? Sa tu na daligamu mo rogoca kina, Ia na cava sara mada o sa rogoca dina?”

²¹ Sa dau gadreva o Jiova me veivakabulai Ka sa vinakata me dokai na nona i vakavuvuli.

²² Ia o ira na tamata oqo era sa kovei ka butakoci Ka ra sa sogoti kece ena veiloma ni qara, Ka vunitaki e veivale ni veivesu. Era sa kovei ka butakoci Ka sega ni dua me vakabulai ira.

²³ Ena dua li vei kemuni ena vakarorogo ki na ka oqo? Me tekivu oqo, o ni sa na dau qarauni li mo ni vakarorogo?

²⁴ O cei sa soli Isireli vei ira na dauvakacaca? O Jiova ga vakai koya o koya o ni sai valavala ca vua! Eda sa sega ni muria na veika e vinakata Se talairawarawa ki na i vakavuvuli sa solia vei keda.

²⁵ Ia sa cakava me da kila na kaukauwa ni nona cudru, Kei na katakata ni nona i valu. A sa waqa na nona cudru Me vaka na buka sa roboti Isireli. Ia eda a sega ga ni kila na ka e yaco tiko; Sa sega sara ni vulica rawa kina e dua na ka.