Aisea 41 - Vakavakadewa Vou kei na iVola tale eso

Na Veivakadeitaki ni Kalou vei Isireli

¹ Sa kaya na Kalou, “Ni vakanomodi ka vakarorogo vei au na veiyanuyanu! Ni vakarau mo ni la'ki tukutuku ena mataveilewai; Ena soli vei kemuni mo ni vosa. Me da vakasoqoni vata mai ka lewa se o cei e dodonu.

² O cei e kauta mai na qaqa mai na tokalau? O solia vua na qaqa ena veivanua kecega e lako kina? O cei e solia vua me qaqa vei ira na tui kei na veimatanitu? Sa mokuti ira sobu na nona i seleiwau me vaka na kuvu ni qele. Ka sa vakabuwacarataki ira ena nona gasau ni dakaititi Me vaka na qa ni sila sa cagina ena cagi.

³ Sa muri yani ka vakasavi ira, ka sa sega ni vakaleqai na nona i lakolako.

⁴ O cei sa vakavuna me yaco na ka oqo? O cei sa lewa na veika sa yaco ena veigauna? Oi au o Jiova au a tiko mai na kena i vakatekivu. Oi au na Turaga na Kalou, au na tiko talega Ena kena i vakataotioti.

⁵ O ira mai na veivanua yawa Era sa raica na veika au sa cakava; Era sa rere ka sautaninini ena domobula. O koya oqo era sa lako vata kece mai kina.

⁶ Era sa veivukei vakai ira, Ka ra sa kaya ena kedra maliwa, “Mo kaukauwa tiko!”

⁷ Era sa kaya na matai vei ira na dautuki kaukamea, “Sa caka dina vakavinaka.” O koya sa tukia ka vakayagoyagovinakataka na matakau Sa vakayaloqaqataki koya sa vakota vata. A sa kaya e dua, ‘Sa drega vinaka oqo!’ Ka rau sa vakota vata na matakau me kakua ni yavala.

⁸ Ia oi kemuni na Isireli na noqu dauveiqaravi Sa i kemuni na matamata au a digitaka; Oi kemuni na kawa i Epara-ama na wekaqu.

⁹ Au a kauti kemuni mai na i yalayala kei vuravura Ka kacivi kemuni mai na kena tutu yawa duadua Ka kaya vei kemuni ‘Sa i kemuni na noqu dauveiqaravi!’ Au sega ni cati kemuni ia au a digitaki kemuni.

¹⁰ Ni kakua ni rere — au sa tiko vata kei kemuni! Oi au na nomuni Kalou — ni kakua ni rerevaka e dua na ka! Au na vakaukauwataki kemuni ka vukei kemuni; Au na taqomaki kemuni ka vakabulai kemuni.

¹¹ “O ira kece era cudruvi kemuni na noqu tamata Era na vakamaduataki ka veilecayaki. O ira era vala kei kemuni era na mate.

¹² O ira era ia na i valu kei kemuni Era na kawa boko mai na dela i vuravura.

¹³ Oi au o Jiova na nomuni Kalou Au na vakaukauwataki kemuni ka tukuna vei kemuni, ‘Ni kakua ni rere, au na vukei kemuni.’ ”

¹⁴ A sa kaya o Jiova, “Kemuni na Isireli, o ni lewe lailai ka malumalumu Ia ni kakua ni rere ni'u na vukei kemuni. Oi au na Kalou Yalo Savasava ni Isireli, O koya a vakabulai kemuni.

¹⁵ Au na qisi kemuni mo ni vaka e dua na kau raraba. Me dau samu kina na sila, Ka sa ka vou, vakabatina ka gata. O ni na samuta na veiulunivanua, Ka talaraka sobu na veidelana me kuvu ni soso.

¹⁶ O ni na viritaki ira ki cake; Ena qai caginataki ira na cagi, Ka ra na veiseyaki ena cava. Ia o ni na marau ga Baleta ni sai au ga na nomuni Kalou; O ni na rokovi au, na Kalou Yalo Savasava i Isireli.

¹⁷ Ena gauna era vaqara wai kina na noqu tamata, Ka sa mamaca sara na nodra i tilotilo ena viagunu. Au na qai sauma na nodra masu oi au o Jiova Au na nodra Kalou na Isireli, Ka'u na sega sara ni laivi ira.

¹⁸ Au na vakadrodrova mai na veiuciwai Ena veidelana talasiga, Ka vakavuna me ra vure mai na wai ena veibuca. Au na vukica na vanua dravuisiga me veitobu wai, Kei na vanua mamaca me ra veimata ni wai.

¹⁹ Au na cakava me ra tubu na kau sitari ena vanua dravuisiga Ka vakakina e dua na mataqali kau vaka na vaivai, Kei na mateli vata kei na olive. Ena yaco me veipaini, damanu kei na dilo.

²⁰ Era na raica na tamata na ka oqo ka kila Ni'u sa cakava oi au o Jiova. Ena yaco me ra kila Ni sa vakavuna na ka oqo na Kalou Yalo Savasava ni Isireli

Bolei Ira na Kalou Tani o Jiova

²¹ A sa kaya o Jiova, na nodra tui na Isireli, “Kemuni na kalou ni veimatanitu, Ni vakaraitaka mai na nomuni tukutuku. Ni kauta mai na i le vinaka duadua e tu vei kemuni.

²² Ni lako mai ka mai tukuna na veika e yaco. Mo ni mai vakamacalataka mada na veika sa yaco oti Ka tukuna vei keda na ka ena yaco mai Me da kila tiko ni sa na yaco mai.

²³ Ni mai tukuna vei keimami na veika ena yaco mai muri Keimami na qai kila ni o ni sa kalou. Ni cakava eso na ka vinaka se kauta mai eso na ka ca. Me keimami rere ka taqaya kina!

²⁴ Raica o ni sa sega ni okati me dua na ka, Ka sa tawa yaga na nomuni cakacaka. Sa okati me vakasisila o koya sa vakalou vei kemuni.

²⁵ Au sa digitaka e dua na tamata e tiko voli mai na tokalau; Ka'u na kauti koya mai me kaba na vualiku. Ena buturaki ira sobu na i liuliu ni veimatanitu me vaka na soso Ka vaka na daucaka kuro sa butuka na qele dregadregata.

²⁶ O cei vei kemuni sa tukuna na ka oqo ni sa bera ni yaco Se yalataka ni na yaco mai na ka oqo, Me keimami kaya kina ni sa dina? E sega ni bau dua vei kemuni e kaya e dua na ka e baleta na ka oqo. Ka sega tale ni bau dua e rogoca na domomuni.

²⁷ Oi au o Jiova au a tukuna taumada ki Saioni na kena i tukutuku. Au a tala e dua na i talai ki Jerusalemi me la'ki tukuna, Era sa lesu tiko mai na wekamuni! Era sa lesu tale mai ki na nodra vanua.

²⁸ Ni'u rai yani ena kedra maliwa na veikalou E sega ni bau dua vei ira e tu vua e dua na ka me kaya, Ka sega talega ni bau dua e sauma rawa na taro au taroga.

²⁹ Era sa tawa yaga na veikalou kece oqo Era sa sega ni cakava rawa e dua na ka; Ka ra sa malumalumu ka tawa yaga na nodra veimatakau.