Aisea 40 - Vakavakadewa Vou kei na iVola tale eso

Na Vosa ni Veivakacegui

¹ “Ni vakacegui ira, ni vakacegui ira na noqu tamata! Sa kaya na nomuni Kalou!

² Vakayaloqaqataki ira na lewe i Jerusalemi. Kaya vei ira ni sa balavu mai na nodra vakararawataki Ka sa bokoci na nodra i valavala ca. Sa saumi taucoko sara vei ira na nodra i valavala ca.”

³ Sa rogo mai e dua na domo, “Dou vakarautaka na sala i Jiova ena vanua lala! Samaka na sala ni noda Kalou ena vanua dravuisiga!

⁴ Ena vakaceceretaki na buca kecega, Ka na vakatautauvatataki na veiulunivanua, Kei na veivanua cecere kecega, Ka vakalogalogavinakataki na vanua sa sukusukura.

⁵ Ia sa na qai vakaraitaki mai na lagilagi i Jiova Ka ra na raica na tamata kecega. O Jiova sara ga vakai koya sa yalataka na ka oqo.

⁶ A sa kaya e dua na domo, “Mo kacivaka!” Au sa qai kaya, “Na cava me'u kacivaka?” Sa tautauvata kei na co na tamata kecega Ka ra sa sega ni dede cake mai na senikau ni vanua.

⁷ Sa dau malai na co ka mira na senikau Ni sa tala mai na cagi o Jiova me liwava. Sa dina sara ni sa vaka ga na co na tamata!

⁸ Io sa dau malai na co, ka mira na senikau, Ia na vosa ni Kalou ena tudei ga ka sega ni mudu.

⁹ Cabe cake ki na dua na ulunivanua, Jerusalemi, La'ki tukuna na i tukutuku ni marau! Kaila yani ena domo levu Saioni, Ka tukuna na i tukutuku vinaka! Vosa yani ka kakua ni rere! Tukuna ki na veikoro e Juta Ni sa lako mai na nodra Kalou.

¹⁰ Raica, sa lako mai na Turaga o Jiova me veiliutaki ena qaqa, Ka sa kauti ira mai na tamata sa vakabula o koya.

¹¹ Ena qaravi ira na nona qele ni sipi Me vaka e dua na i vakatawa, Ena soqoni ira vata kece mai na lami, Ka keveti ira ena ligana; Ena tuberi ira yani vakamalua na tinadra.

Na Kalou Vakasakiti nei Isireli

¹² O cei na tamata sa vakarautaka rawa na wasawasa Ena qeteqete ni ligana, Se na lomalagi lala ena i qaqalo ni ligana? E rawa li vua e dua na tamata Me na taura tu na qele kei vuravura ena dua na bilo, Se vakarautaka na veiulunivanua kei na veidelana ena dua na i vakarau?

¹³ E rawa li ni dua na tamata me tukuna vei Jiova na ka me cakava? O cei e rawa ni vakavulici Jiova se vakasalataki koya.

¹⁴ E sa bau taro i vakasala vei cei na Kalou. O cei e vakavulici koya ena lewa dodonu Se vakavulici koya ena vuku?

¹⁵ Sa ka wale ga vei Jiova na veimatanitu, Era sa vaka wale ga e dua na turu ni wai mai na dua na vokete; Era sa vaka ga na kuvu ni qele ena i vakarau ni bibi, Ka ra sa mamada na veiyanuyanu yawa me vaka na kuvu.

¹⁶ Na manumanu yava i va kece ena veikau mai Lepanoni Sa lailai me i soro vua na noda Kalou Ka lailai talega na kena kau me vakamai kina!

¹⁷ Sa tawa yaga, ka, ka wale ga vua na veimatanitu.

¹⁸ O cei me vakatautauvatataki rawa kei na Kalou Se me vakatauvatani kei na cava o koya?

¹⁹ Sa sega ni vakataka na matakau era taya na matai, Ka ra qai ukutaka ena koula na matai ni kaukamea Ka cakava na kena sinucodo siliva.

²⁰ Na tamata e sega ni rawata na siliva se na koula Ena digitaka na kau e sega ni vuca rawa. Ena vaqara e dua na matai maqosa Me taya e dua na matakau e sega ni rawa ni yavala.

²¹ O ni sega li ni kila? O ni sega li ni rogoca? E sega li ni tukuni vei kemuni ena gauna e liu?

²² Ni a bulia o koya e dabe tiko ena i tikotiko vakaturaga, Ena dela i vuravura sivia na lomalagi. Na tamata era tu ka rairai lalai sara vaka na vodre. Sa tevuka yani na lomalagi me vaka na i latilati, Ka vaka na valelaca me ra tiko kina na tamata.

²³ Sa i koya sa vakasivoi ira na tui Ka vukici ira na i liuliu qaqa me ra ka wale ga.

²⁴ Era sa vaka na kau gone Era sa qai tubu cake ka vakawakana, Ia ni sa vakaliwava mai e dua na cagi o Jiova, Era sa malai ka cagina me vaka na qa ni sila madu.

²⁵ O cei me vakatautauvatataki kei na Kalou Yalo Savasava? E dua li e rawa ni rau vakatauvatani kaya?

²⁶ Rai cake mada ki lomalagi; O cei a bulia na veikalokalo o raica? O koya sa liutaki ira me vaka e dua na mataivalu, Sa kila na kedra lewe levu Ka kacivi ira ena dui yacadra! Sa ka levu sara na nona kaukauwa, Ka sa sega mada ni bau yali e dua vei ira!

²⁷ Na cava o kudruvaka Isireli, Na cava o kaya kina Jekope Ni sa sega ni kila na nomu leqa o Jiova Se sa sega ni kauwaitaka na veika o dodonu kina?

²⁸ O sega li ni kila, o sa sega li ni rogoca? Sa tawa mudu o Jiova na Kalou; Sa bulia o koya na vuravura taucoko. E se sega mada ni bau oca se malumalumu. Sa sega ni dua e kila rawa na nona vakasama.

²⁹ Sa dau solia na i cegu vei ira sa oca, Kei na kaukauwa vei ira sa malumalumu.

³⁰ Ia era na malumalumu talega mai na i tabagone, Ka ra na bale sobu na tamata bula.

³¹ Ia o ira sa nuitaki Jiova Ena vakavoutaki na nodra kaukauwa. Era na cabe cake Me vaka era sa vakatabana vakaikeli; Era na cici ka sega ni oca; Era na lako tu ka sega ni malumalumu.