Aisea 4 - Vakavakadewa Vou kei na iVola tale eso

¹ Ni sa na yaco mai na siga o ya, ena vitu na yalewa e ratou na vesuka e dua ga na tagane, ka kaya, “Keitou rawa ni vakani keitou ga ka vakaisulutaki keitou, ia me keitou vakatokai ga me keitou watimu, me kau tani kina na neitou madua.”

Ena Vakalesui Tale na Bula ki Jerusalemi

² Ena yaco mai na gauna ena vakatubura tale kina o Jiova na kau sa teivaki kei na vuanikau me ra lelevu ka rairai vinaka. O ira kece era vo tu e Jerusalemi era na marautaka ka cibitaka na kena vua ni qele.

³ O ira yadua sa digitaki ira na Kalou ka ra vo tu e Jerusalemi era na vakatokai me ra savasava.

⁴ Ena veilewaitaka ka vakasavasavataka na matanitu na Turaga ena nona kaukauwa, ka na savata laivi na dukadukali i Jerusalemi kei na dra sa vakadavei kina.

⁵ Ia ena qai tala mai o Jiova e dua na o ena siga vata kei na kubou kei na rarama ni bukawaqa ena bogi ena dela ni ulunivanua o Saioni kei ira kece sa soqoni vata kina. Na lagilagi ni Kalou ena ubia ka taqomaka na koro taucoko.

⁶ Ena vakaruguya na koro mai na katakata ni siga ka vakavuna me koro ni drodro e vakarurugi mai na uca kei na cagilaba.