Aisea 38 - Vakavakadewa Vou kei na iVola tale eso

Na Tauvi Mate i Esekaia na Tui

¹ Ena gauna vata o ya a tauvi mate kina na tui o Esekaia ka voleka sara ni mate. E a qai mani la'ki sikovi koya o Aisea na parofita na luve i Emosi ka kaya, vua, “Sa tukuna o Jiova mo tuva vinaka kece sara tu na veika kece e tu ena nomu vale baleta ni o sa na sega ni bula tale mai na nomu tauvi mate oqori.”

² A qai vuki ki lalaga o Esekaia na tui ka masu vei Jiova:

³ Kemuni Jiova, ni qai nanuma na noqu a qaravi kemuni ena yaloqu taucoko ena yalodina, ka'u sa dau tovolea me'u cakava na veika kece sara o ni vinakata me'u cakava.” A mai tabalaka yani na tagi ena rarawa levu.

⁴ A sa qai vakaroti Aisea o Jiova

⁵ me lako vei Esekaia ka kaya vua, “Oi au, o Jiova, na Kalou i Tevita na nomu qase, au sa rogoca na nomu masu ka raica na wai ni matamu. Raica, au sa na solia tale e tinikalima na yabaki me vakuri kina na nomu bula.

⁶ Au na vakabulai iko kei na koro oqo o Jerusalemi mai vua na tui Asiria, ka'u na tomana tikoga na noqu taqomaka na koro oqo.”

⁷ A qai sauma o Aisea ka kaya, “Ena vakaraitaka vei iko na Kalou e dua na i vakatakilakila mo vakadinadinataka ni na vakayacora na ka sa yalataka.

⁸ Ena vakasuka lesu na i yaloyalo ni matanisiga sa kala sobu me rauta ni tini na i kalawa ki muri.

⁹ Ni sa bula tale o Esekaia mai na nona tauvi mate, a sa qai vola na sere ni veivakacaucautaki oqo:

¹⁰ Au nanuma ga ni'u sa na mate ni'u sa sega ni qase, Ka me'u sa na la'ki tu voli ki Etesi ena vo kece ni noqu bula.

¹¹ Au a nanuma ga ni'u sa na sega tale ni raici Jiova Se dua tale na tamata ena vuravura oqo.

¹² Sa muduki koso na noqu bula ka sa cava, Me vaka na uru sobu ni valelaca. Sa vaka na i sulu sa kotivi tani mai na misini ni lali i sulu Ka'u nanuma ga ni sa muduka na noqu bula na Kalou.

¹³ Au tagi yani ena vutugu ena loma ni bogi taucoko, Me vaka sa qurulaka na suiqu e dua na laione, Ka'u nanuma ga ni sa tinia na noqu bula na Kalou.

¹⁴ Sa rogo lailai ka malumalumu na domoqu, Ka'u sa tagi me vaka na ruve. Sa oca mai na mataqu ena rai cake ki lomalagi, I Jiova ni sereki au mai na leqa kece oqo.

¹⁵ Na cava me'u kaya rawa. Sa cakava o Jiova na ka oqo. Sa rarawa na yaloqu ka'u sega ni moce rawa.

¹⁶ Kemuni Jiova, au na bula ga ena vukumuni, Ena vukumuni duadua ga. Ni vakabulai au, ka solia me'u bula tiko.

¹⁷ Ena vuki na noqu rarawa me vakacegu. O ni a vakabulai au mai na leqa kecega, Ka bokoca na noqu i valavala ca taucoko sara.

¹⁸ E sega ni dua mai na nodra vanua na mate Me rawa ni vakacaucautaki kemuni. Ni ra sa sega ni rawa ni vakadinata na mate na nomuni yalodina.

¹⁹ O ira ga na bula sai ira era vakacaucautaki kemuni. Me vaka na noqu vakacaucautaki kemuni yani oqo. Era sa tukuna na tamata vei ira na luvedra na nomuni yalodina.

²⁰ I Jiova, o ni sa vakabulai au. Keimami na qiria na api Ka seretaka na nomuni lagilagi. Keimami na seretaka ena nomuni vale tabu Ena gauna kece ni neimami bula.

²¹ A sa tukuna o Aisea vua na tui me walia na nona bo ena drega ni lolo ka me na qai bula tale kina.

²² Ia sa qai kaya o Esekaia, “Na i vakatakilakila cava ena vakadinadinataka ni'u rawa ni lako tale ki na Valenisoro?”