Aisea 36 - Vakavakadewa Vou kei na iVola tale eso

Vakasaurarataki Jerusalemi o Ira na Kai Asiria

¹ Ena i katinikava ni yabaki a tui kina e Juta o Esekaia, a sa lako mai kina o Senikarivi na tui ni matanitu levu vaka-Asiria ka kaba na veikoro vakabai kei Juta ka vakamalumalumutaka.

² Ia a qai tala na tui Asiria e dua na nona vakailesilesi liu mai Lakisi ki Jerusalemi ka kauta e dua na mataivalu levu me la'ki tukuna vei tui Esekaia me soro. A la'ki toka na vakailesilesi i tui Asiria ena sala era cakacaka tiko kina na daucaka i sulu, ena i keli e drodro mai kina na wai mai na tobu e cake.

³ E ratou a qai lako mai e tolu na vakailesilesi liu ni valenitui o Eliakimi na luve i Ilikaia, o Sipina na vunivola, kei na vakailesilesi e qarava na i vola tukutuku ni matanitu o Jioa na luve i Esava.

⁴ A sa kaya vei iratou na vakailesilesi i tui Asiria ni vinakata na turaga levu na tui Asiria me kila se cava na vuna e sa nuitaki koya tikoga kina vakai koya o Esekaia.

⁵ Oqo na ka e via kila, “O ni nanuma beka ni vosa wale e tautauvata kei na maqosa ena tuva i valu kei na yalo qaqa ena vala? O cei o ni nuitaka me na vukei kemuni ena nomuni saqati au?

⁶ O sa vakanuinui tiko vei Ijipita me vukei iko. Na nomu vakararavi oqori ena vaka na titoko ena dua na gasau, e qai kamusu ka coka tale na ligamuni. Ena vaka o ya o Ijipita vei ira kece era vakararavi vua.”

⁷ A vakuria ka kaya, “Ia kevaka o ni tukuna vei au ni o ni sa vakararavi ga vei Jiova na nomuni Kalou, e sega li ni o koya oqo na i cabocabonisoro ni Kalou a vakarusa o Esekaia ni a tukuna vei ira na Juta kei Jerusalemi me dua ga na vanua ni vakacaboisoro.

⁸ Au na cakava vata kei kemuni e dua na veidinadinati ena vukuna na turaga levu na tui Asiria. Au na solia vei kemuni e rua na udolu na ose kevaka o ni na kunei ira rawa mai me ra na mai vodoka.

⁹ O ni sega mada ga ni veirauti kei na dua na nona vakailesilesi na turaga na tui Asiria, ia o ni sa qai la'ki nuitaki ira sara na kai Ijipita me ra vakauta mai na qiqinivalu kei na sotia dauvodo ose vei kemuni.

¹⁰ O ni sa nanuma beka ni sega ni talai au mai o Jiova me'u kaba ka vakarusa na nomuni vanua? Sa talai au sara ga mai oqo o koya me'u mai kaba ka vakarusa na nomuni vanua.

¹¹ Ia e ratou a qai kaya o Iliakimi, Sefina, kei Jioa vua na vakailesilesi ni Asiria, Mo vosa mai vei keitou ena vosa vaka-Aramea. Keitou kila na vosa o ya. Kakua ni vosa vaka-Iperiu baleta ni ra vakarorogo kece tu oqo na tamata ena bai.

¹² A qai kaya na vakailesilesi ni Asiria, “O dou nanuma beka ni sa talai au mai na tui Asiria me'u vosa ga vei kemudou kei Esekaia na tui? Sega! Au vosa sara tikoga vei ira na tamata era dabe tiko ena bai, sai ira era na kania na benu ni ketedra ka na gunuva na nodra suasua me vakataki kemudou.”

¹³ Era a qai tucake na vakailesilesi ni Asiria ka qolouvaka yani ena vosa vaka-Iperiu ka kaya, “Ni rogoca mada na nona vosa na turaga ni tui Asiria vei kemuni.

¹⁴ Sa vunauci kemuni mo ni kakua ni laivi Esekaia tiko me vakacalai kemuni. Ena sega ni vakabulai kemuni rawa o Esekaia.

¹⁵ Ni kakua ni laivi koya me rawai kemuni ena nona kaya mo ni vakararavi vei Jiova, ka mo ni nanuma ni na vakabulai kemuni o koya ka na sega ni solia vei ira na kai Asiria me ra vakamalumalumutaka na nomuni koro.

¹⁶ Ni kakua ni vakarorogo vei Esekaia. Sa vakarota mai na turaga na tui Asiria mo ni lako mai ki na taudaku ni koro ka mai soro. Ena vakatarai vei kemuni mo ni kania ga na qerepi mai na nomuni loganivaini, kei na lolo mai na nomuni vunilolo, ka gunu ga mai na nomuni keliwai,

¹⁷ me yacova ni sa vakatikori kemuni na turaga na tui Asiria ena dua na vanua e via tautauvata ga kei na nomuni vanua. Sa tu kina na vaini mo ni gunu waini kina kei na witi me caka kina na kemuni madrai.

¹⁸ Ni kakua ni laiva me vakacalai kemuni o Esekaia, ena nomuni nanuma ni na vakabulai kemuni o Jiova. Sa bau so li na kalou ni so na vanua e vakabula rawa na nodra vanua mai vua na tui Asiria?

¹⁹ Sa e vei na nodra kalou na Emaci kei na Apati? Sa e vei na nodra kalou na Sifaveimi? E sega ni bau dua vei ira e vakabulai Samaria.

²⁰ Na kalou cava vei ira na veikalou ni veivanua oqo e vakabula rawa na nodra vanua mai vua na turaga tui Asiria? Ia na cava o ni vakabauta kina ni na rawa ni vakabulai Jerusalemi o Jiova?”

²¹ Era a galu ga na tamata ka sega ni bau sauma e dua na ka, me vaka a vakarota vei ira o Esekaia.

²² Ia e ratou a qai dresuka na nodratou i sulu o Eliakimi, Sefina, kei Jioa, ena rarawa. E ratou a qai lako yani ka la'ki tukuna vei Esekaia na tui na nona i tukutuku na vakailesilesi i tui Asiria.