Aisea 34 - Vakavakadewa Vou kei na iVola tale eso

Na Kalou ena Totogitaki Ira na Kena Meca

¹ Ni lako mai na veimatanitu kece ka mai rogoca. Ni toro mai na veimatatamata mo ni mai vakarorogo. Me ra lako mai na tamata yadua e vuravura taucoko me ra mai rogoca.

² Sa cudruva o Jiova na veimatanitu kecega, Kei na dui nodra mataivalu kece sara. Sa tukuna ni ra sa na rusa, Ka sa soli ira yani me ra vakamatei.

³ Na yagodra ena sega ni bulu, Ia ena tu ga me boi ca ka vuca e kea; Ka sa na drodro yani mai na veiulunivanua na nodra dra.

⁴ Ena vurumemea na matanisiga, na vula, kei na kalokalo, Ka na vivigi na lomalagi me vaka na i vola vivigi; Era na qeqera na veikalokalo me vaka na drau ni kau Era lutu mai na dua na vunivaini se vunilolo

⁵ Sa vakarautaka na Turaga na nona i seleiwau mai lomalagi. Ia oqo sa na mokuti Itomi, O ira na tamata sa lewa me ra rusa.

⁶ Ena ubia na nona i seleiwau na nodra dra kei na uro, Me vaka na dra kei na uro ni sipi kei na me e vakacabori, Sa na vakacabora e dua na i soro o Jiova mai Pasara, Ena cakava na ka oqo Me dua na moku levu mai na vanua o Itomi.

⁷ Era na bale na bulumakau kila Kei na bulumakau tagane gone, Sa na damudamu na vuravura ena dra Ka ubia na nodra uro.

⁸ Sa i koya oqo na siga Ena sereki Saioni kina o Jiova, Ka sauma lesu na veika ca Vei ira na nona meca.

⁹ Ena vuki na veiuciwai kei Itomi Me kuluta loaloa dregadregata, Ka vuki na qele me sulifure dau kama. Ena kama vaka na kuluta na vuravura taucoko.

¹⁰ Ena kama ena siga kei na bogi, Ka na kubou tu ka tawa mudu. Ena lala tu na vanua ena veitaba gauna, Ka na sega sara ni dua e bau lako kosova tale.

¹¹ Era na qai taukena na lulu kei na reveni. Ena qai vukica tale o Jiova me vanua mate, Me vaka ni a sa bera ni buli na vuravura.

¹² Ena sega tale na tui me na lewa na matanitu o ya, Ka ra na yali yani o ira na kena veituraga.

¹³ Era na tubu na soni kei na wa-vakavotona Ena veivalenitui kece kei na veikoro vakabai, Ka ra na tawana na jakeli kei na lulu.

¹⁴ Era na dauveilakoyaki kina na manumanu kila, Ka ra veikacivi vakai ira na me-tevoro. Ena tiko talega kina na yalewa-tevoro o Lilica, Me kunea e dua na vanua me vakacegu kina.

¹⁵ Era na tara nodra sova e kea na lulu, Ka ra vakayaloka kina; Era na dirika na nodra yaloka Ka susugi ira cake kina na luvedra. Era na lako talega yani kina na manulevu, Ka ra na dui lako vata yani kei na kedra i sa.

¹⁶ Dikeva mada ka wilika na i vola i Jiova Me baleta na veika bula. Ena sega ni dua vei ira na manumanu oqo ena yali; Ka na sega ni dua ena sega na kena i sa. Sa vakarota o Jiova me vakakina, Ni sai koya talega ena kauti ira vata mai.

¹⁷ O Jiova ga ena wasea vei ira na vanua, Ka na solia vei ira yadua na nodra i votavota. Era na tawana tiko ena veitabagauna, Ka na nodra tiko ka tawa mudu.