Aisea 33 - Vakavakadewa Vou kei na iVola tale eso

A Masu ni Kere Veivuke

¹ Ena yaco na veika ca vei ira na noda meca! Era sa butako ka vakacaca, Ia era sa sega ni butakoci, se vakacacani. Ia ena oti mai na nodra gauna ni butako kei na vakacaca, Era sa na qai butakoci ka vakacacani.

² I Jiova, ni lomani keimami mai. Keimami sa vakanuinui vei kemuni. Ni taqomaki keimami ena veisiga, Ka vakabulai keimami ena gauna ni leqa.

³ Ni o ni vala ena vuku i keimami, Era sa dro ga na meca Ena vuku ni domo ni veiraravui.

⁴ Sa biu tu na nodra i yau Ka sa kau me i toki ni valu.

⁵ Me laveti ga o Jiova! Io sa cecere na nona i tikotiko; Ena vakasinaiti Jerusalemi Ena lewa dodonu kei na yalodina.

⁶ Ena vakataudeitaka na matanitu; Ena taqomaki ira tikoga na nona tamata Ka na solia vei ira na vuku kei na kila-ka. Ia na nodra i yau talei duadua Sa i koya na rerevaki Jiova.

⁷ Rogoca! Era sa kere veivuke na tamata qaqa; Era sa tagi vakalevu Na mata era kauta mai na veisaututaki.

⁸ Sa lala tu na veigaunisala lelevu; Era sa sega ni muria na dauveilakoyaki. Sa kavoro na veiyalayalati; Era na beci na kena i vakadinadina Ka sa sega ni dokai e dua na tamata.

⁹ Sa tu wale na vanua ka lala didi. Sa malai na veikau mai Lepanoni ka vuca yani, Ka sa vaka na vanua dravuisiga o Saroni; Era sa malai sara ka mira yani na draunikau Mai Pasani kei Ulu i Kameli.

Sa Vunaici Ira na Meca o Jiova

¹⁰ A sa kaya o Jiova, “Ia oqo au sa na cakava! Au sa na vakaraitaka sara mada na levu ni noqu kaukauwa

¹¹ Sa tawa yaga na veika o ni nakita, Ka tawa yaga na veika o ni cakava; O ni sa vakacacani kemuni ga.

¹² O ni na vakavurumemeataki me vaka na lase vakamai Ka vaka na kau vakavotona sa kama me dravusa.

¹³ Ni rogoca na veika au sa cakava, Oi kemuni o ni voleka kei ira era yawa sara yani, Ka mo ni kila talega na noqu kaukauwa.”

¹⁴ Era sa rere na tamata i valavala ca mai Saioni Ka sautaninini o ira era sega ni kila na Kalou. Era sa kaya, “O cei vei keda e rawa ni bula vata Kei na bukawaqa e dau veivakamai? Se me na bula vata kei na bukawaqa tawa mudu?”

¹⁵ O koya ga e vosataka na ka dina Ka cakava na ka dodonu sa rawa me bula. Kakua ni vakayagataka na nomu kaukauwa Mo veidabuitaka kina na dravudravua; Mo kua talega ni ciqoma na veika o vaqumi kina. Kakua ni lala vata kei ira era navuca na laba Se cakava na veika tawa dodonu.

¹⁶ O na qai taqomaki vinaka kina; O na maroroi vinaka me vaka sa viribaiti vinaka Ena bai cecere kaukauwa; Ena tiko na kakana mo kania Kei na wai mo gunuva.

Na Gauna Lagilagi ka se Bera Mai

¹⁷ Na matamuni ena raica e dua na tui e veiliutaki ena lagilagi Ka lewa tiko e dua na matanitu vakaitamera.

¹⁸ O ni sa na dau nanuma wale tu ga na ka o ni dau rerevaka: E vei o koya e dau wiliwili? E vei o koya e dau wilika na i lavo? E vei o koya e dau wilika na veivale lelevu?

¹⁹ O ni sa na sega tale ni raici ira Na kai tani dokadoka era vosataka na vosa o ni sega ni kila.

²⁰ Raici Saioni mada! Sa dua na vanua sa taqomaki vinaka, Sa vaka e dua na valelaca sa sega ni veitokiyaki, Ka sa sega ni bau cavu e dua na kena i vakadei Se cavuka e dua na kena dali.

²¹ Ena vakaraitaka vei keda o Jiova na nona i ukuuku. Eda na vakaitikotiko ena bati ni wai levu kei na veiuciwai lalai, Ena sega ni bau voce kina e dua na waqa Se soko kina e dua na waqa vakaturaga.

²² Ni sa noda turaganilewa ka i liuliu o Jiova. Sa noda Tui o koya ka na vakabulai keda.

²³ Era na kaya na tamata, “Sa lili savu wale tu ga na nomu dali; Sa na sega ni vakadeitaka na i vana, Se me tevuka vakavinaka na laca. Sa na qai wasei na i toki ni valu Ka ra na bau votai talega kina na mataboko, Ni sa rui levu.”

²⁴ Ena sega ni dua e tiko e kea me na kaya, “Au sa tauvi mate,” Ni sa na bokoci kece na nodra i valavala ca, Na tamata era tiko e kea.