Aisea 32 - Vakavakadewa Vou kei na iVola tale eso

Na Tui Yalodina

¹ Raica, ena yaco me veiliutaki e dua na tui yalodina; Ka ra na vakayacora na turaga na lewa dodonu.

² O ira yadua era na vaka na i vakaruru mai na cagi Ka i drodro mai na cagilaba. Era na vaka na uciwai ena vanua dravuisiga, Ka vaka na i yaloyalo ni dua na vatu levu ena vanua sigasiga.

³ Ena tadola tu na daligadra ka rai tu na matadra Ki na nodra leqa na tamata.

⁴ Ena yaco me lewa vinaka o koya sa dau yalo totolo, Ka vosa vakavinaka ka matata o koya sa dau kaka,

⁵ Era na sega tale ni vakatokai na lialia me ra turaga Se na dauveivakaisini me yalodina.

⁶ Ni sa dau vosataka na ka lialia na tamata lialia Ka nakita me vakayacora na ka ca. Na veika e kaya kei na veika e cakava E vakacacani kina o Jiova; Sa sega ni bau vakani koya sa viakana, Se vagunuvi koya sa viagunu.

⁷ Sa ca na nona i lawaki na tamata ca Ka sa nakita me cakava na veika ca. Sa nakita me vakarusai ira na dravudravua ena nona lasu, Ka tabaki ira me ra kakua ni vakayagataka na nodra dodonu.

⁸ Ia na tamata yalodina ena cakacaka ena yalodina Ka tudei ena ka e dina.

Na i Totogi kei na Veivakacokotaki

⁹ Kemuni na yalewa o ni sota kaya na bula vakacegu Ka sega ni loma ocaoca, Ni rogoca mada na noqu vosa.

¹⁰ O ni sa tiko vakacegu ena gauna oqo, Ia ena gauna vata oqo ena yabaki ka tu mai, O ni sa na sotava na veika dredre, Ni sa na sega tale na qerepi mo ni tomika.

¹¹ O ni a tiko voli ena bula vakacegu Ka sega ni bau loma ocaoca, Ia oqo mo ni sautaninini ena rere. Ni luvata tani na nomuni i sulu Ka vakaisulu ena i sulu kakadresudresu.

¹² Ni tavia na lomaseremuni ena rarawa, Baleta ni sa vakarusai na veivaini Kei na vanua bulabula vinaka;

¹³ Ka sa tubu mai na wa vakavotona kei na soni Ena nodra vanua na noqu tamata. Ni tagicaka na veivale kece sara Era mamarau tiko na lewena, Kei na koro era dau mamarau.

¹⁴ Na i tikotiko sara mada ga vakatui ena biu tu, Ka na vakalalai vakadua na koro turaga. Na veivale kei na kena bai cecere ena vakarusai vakadua. Era na qai dau veilakoyaki kina na asa kila, Ka na yaco me nodra i kanakana na sipi.

¹⁵ Ia ena qai yaco me sovaraka tale vakadua, Vei keda na Kalou na yalona. Ena qai yaco me bulabula tale na vanua dravuisiga, Ka vuataka na qele na vuata vinaka.

¹⁶ Ena vakayacori ena veiyasa ni vanua kecega, Na i tovo savasava kei na ka dodonu.

¹⁷ Ni ra sa na ia na tamata yadua na ka dodonu, Ena tubu kina na sautu kei na bula galala tawamudu.

¹⁸ Ena yaco na bula sautu kei na vakacegu, Ena nodra vanua na tamata ni Kalou, Ka vagalalataki mai na nodra nuiqawaqawa.

¹⁹ Ena qai tauca na veikau na uca cevata Ka na bale sobu na koro.

²⁰ Sa na ka levu sara na nomuni marau Ni sa levu na wai ena vuku ni kakana ni teitei, Kei na vanua ni kanakana sa taqomaki vinaka Me nodra na asa kei na bulumakau.