Aisea 30 - Vakavakadewa Vou kei na iVola tale eso

A Veidinadinati Tawayaga kei Ijipita

¹ A sa kaya o Jiova, “Ena yaco na veika ca vei ira na i liuliu e Juta, Baleta ni ra sa veisaqasaqa kei au. Era sa veinaki eso sa sega ni noqu. Ka tabaka na veiyalayalati sa veisaqasaqa kei na noqu lewa; Era sa kuria tikoga kina na ca ena i valavala ca.

² Era sa gole sobu me ra la'ki kere veivuke mai Ijipita, Ka ra sa sega mada ni bau qara na noqu i vakasala. Era sa vinakata me taqomaki ira o Ijipita, Ka ra sa vakanuinui kina vua na nodra tui.

³ Ia ena sega ni kaukauwa na tui me taqomaki ira, Ka na la'ki tini ena leqa na veitaqomaki nei Ijipita.

⁴ Era sa yaco na nodra mata ki Soani kei Anesi;

⁵ Ia era na veivutuni na lewe i Juta, Ni ra vakararavi ki na dua na matanitu e sega ni nuitaki; Na matanitu e sega ni vukei ira rawa, Ena gauna era gadreva kina na veivuke.”

⁶ Oqo na i tukutuku ni Kalou baleti ira na manumanu yava i va, Ena vanua dravuisiga ena ceva: Era sa lako yani na mata ena loma ni vanua rerevaki, Na vanua era tu kina na laione, Na gata gaga kei na gata vuka. Era sa vakavodoka na nodra asa kei na kameli, Ena i loloma voli dredre me nona e dua na matanitu, Sa sega ni cakava rawa vei ira e dua na veivuke.

⁷ E tawa yaga na veivuke e solia o Ijipita. A sa na vakatoka vua e dua na yaca buli, O ya me yacana o “Drakoni Sega ni Rerevaki.”

Na Matatamata Talaidredre

⁸ A sa kaya vei au na Kalou, Lako ka la'ki ceuta ena dua na vava raraba, Ka vola ena dua na i vola Na ka e baleti ira na tamata oqo, Me i vakadinadina tudei ni nodra caka ca.

⁹ Era sa dau saqata na Kalou, ka lasulasu. Era sa dau sega ni vakarorogo, Ki na i vakaro i Jiova.

¹⁰ Era sa dau kaya vei ira na parofita, “Ni kakua ni raica e dua na raivotu; Ni kakua ni tukuna vei keimami na ka dodonu, Ia ni tukuna ga vei keimami na veika keimami vinakata. Ni laiva vei keimami na veika e veivakacalai.

¹¹ Mo ni lako tani ga, Ka kakua ni vakasugusugu ena neimami sala. Keimami sega ni via rogoca, Na ka e baleta na Kalou Yalo Savasava ni Isireli.”

¹² Ia sai koya oqo na ka e sa kaya Na Le Dua Yalo Savasava ni Isireli, “O sa beca na noqu vosa, Ka vakararavi ki na veivakasaurarataki, Kei na i tovo dauveivakaisini.

¹³ O sa cala dina. O sa vaka e dua na bai cecere, Sa kaca me yaco sara ki ra; Ka na bale vakasauri.

¹⁴ O na vorolaki me vaka e dua na kuro qele. Sa vorolaki vakaca sara; Sa sega mada ga na tikina levu Me tawa kina na qilaiso, Se me taki kina na wai mai na i keliwai.

¹⁵ A sa kaya o Jiova ni lewevuqa, na Kalou savasava i Isireli: “Ni lesu mai ka dinati au mo ni bula kina; O ni sa na qai kaukauwa ka tudei.” Ia o ni sa bese ga ni cakava!

¹⁶ O ni sa qai nakita mo ni dro mai vei ira na kemuni meca, Ena nomuni vodoki ira na ose daucici sara. Ia ni dro sara. O ni nanuma era sa totolo na nomuni ose, Ia era na totolo cake o ira era vakasavi kemuni.

¹⁷ Era na dro e dua na udolu vei kemuni, Ni ra raica wale tu ga e dua na meca, Ka na lima wale ga na meca, Era na vakasavi kemuni kece sara. Ena sega tale ni vo e dua na ka ki na nomuni mataivalu, Sa na qai vo ga e dua na kau ni drotini ena dua na delana.

¹⁸ Ia sa wawa tikoga o Jiova me yalololoma vei kemuni. Sa vakarau tu me lomani kemuni, Ni sa Kalou Yalo Dodonu o koya. Era marau o ira kecega era vakanuinui vua.

Na Kalou ena Vakalougatataki Ira na Nona Tamata

¹⁹ O ni sa na sega ni tagi tale na tamata mai Saioni o ni tiko e Jerusalemi. Sa dau loloma na Turaga, ni o ni tagica na nona veivuke, ena rogoci kemuni.

²⁰ Ena vakavuna na Turaga me lako vata voli kei kemuni o koya me vakavulici kemuni, o ni na sega tale ni vaqarai koya.

²¹ Kevaka o ni sese mai na sala vaka ki na i matau se ki na i mawi, o ni na rogoca na domona mai dakumuni ni kaya. “Oqo na gaunisala. Ni mai lako kina.”

²² O ni na okata na nomuni matakau siliva kei na matakau koula me ka dukadukali. O ni na viritaki ira tani ka kaya, “Ni lako tani mai na mataqu!”

²³ Ena gauna o ni tea kina na nomuni teitei ena vakatauca kina na uca na Turaga me ra vakabulai; Ena solia me levu na ka o ni tamusuka mai na nomuni tikiniqele, ka na levu na veico me kedra na nomuni bulumakau.

²⁴ Na bulumakau kei na asa era siviyarataka na nomuni i teitei era na kania na co vinaka sara.

²⁵ Ena siga sa na bale kina na nodra bai ni valu na kemuni meca ka vakamatei na lewena, ena qai drodro mai na veiuciwai mai na veiulunivanua kei na veidelana.

²⁶ Ena serau sara na vula me vaka na matanisiga ia na matanisiga ena vakavitutaki na kena i serau me vaka na rarama ni vitu na siga ena dua ga na siga. Ena yaco na ka oqo ni sa na vauca ka vakabula na mavoa e a vakavuna vei ira na nona tamata o Jiova.

Na Kalou ena Totogitaki Asiria

²⁷ Raica na yaca i Jiova sa lako vakayawa mai, Sa waqa vata kei na nona cudru kei na kubou sa kuvu cake. Sa sinai na gusuna ena cudru, Ka sa vaka na bukawaqa na yamena.

²⁸ Na nona i cegu sa vaka na wai ni waluvu, Sa yaco sara ki domona. Sa vakayavalata na veimatanitu ena vulo ni veivakarusai; Sa vakadarama ki na galegaledra na tamata Na i tarovi ni ose sa vakauti ira vakatani.

²⁹ O ni na qai laga sere Me vaka na nomuni dau seresere ena gauna ni solevu tabu; Ena reki na yalomuni Ni ra sa tayabe na tamata kei na nodra bitu ni vakatagi Ka cabe cake ki na ulunivanua i Jiova, Ki na Uluvatu i Isireli.

³⁰ Era na rogoca na domo vakaturaga i Jiova na tamata Ka vakayacora me ra raica na ligana ni sa lako sobu mai Kei na nona cudru kaukauwa kei na bukawaqa, Vata kei na yaseyase, na cava, kei na uca cevata.

³¹ Ena vakarerei ira na kai Asiria na domo i Jiova; Ka na mokuti ira ena nona i titoko.

³² Na i moku kece sa vakatauca o Jiova vei ira Mai na nona i titoko ni veitotogitaki Ena sala vata kei na domo ni tibereli kei na api, Ni sa valuti ira ena valu mai na kaukauwa ni ligana.

³³ Ni sa vakarautaki makawa tu na vanua me na kama kina O koya na tui Asiria ena bukawaqa. Na kena matadravu sa titobu sara ka rabailevu, Ka sa levu sara na kena buka era sa bini cake tu. Na i cegu i Jiova, Ka sa vaka na kubou ni sulifure katakata, Ena vakawaqaca na buka.