Aisea 3 - Vakavakadewa Vou kei na iVola tale eso

Sa Cudruvi o Jerusalemi kei Juta

¹ Ni raica, sa na vakarau kauta tani na Turaga o Jiova E Jerusalemi vata kei Juta, Na veika kece era vakararavi kina na tamata; Na medra wai kei na kedra kakana.

² O ira na nodra qaqa kei ira na nodra sotia; O ira na turaganilewa kei ira na parofita, O ira na qase kei ira na dautukuna na veika vinaka,

³ O ira na turaganivalu kei ira na turaga, O ira na dauveiliutaki, dauvakadraunikau kei na daucakamana.

⁴ Au na laivi ira na gone tagane me ra nodra turaga Kei ira na gone lalai me ra liutaki ira.

⁵ Era na veivakasaurarataki vakai ira na tamata yadua, Ka vakakina na tamata yadua kei na kai nona. O ira na i taba gone era na sega ni dokai ira na qase, Kei ira na tamata wale era na beci ira na nodra turaga.

⁶ Sa na yaco dina mai na gauna, Era sa na digia kina na lewe ni dua na mataqali, E dua ga vei ira ka ra kaya vua, “E sa bau toka e dua na i sulu mo daramaka, Mo sa noda i liuliu mada ena gauna dredre oqo.”

⁷ Ena qai kaya na tamata o ya ena siga o ya, “Au na sega ni nomuni liuliu, Sa sega na madrai kei na i sulu ena noqu vale, Ka mo ni kakua ni lesi au me'u liutaki kemuni.”

⁸ Sa bale o Jerusalemi, ka rusa o Juta, Na veika kece era kaya ka cakava, Sa veisaqasaqa kei Jiova.

⁹ Na i rairai ni matadra sa beitaki ira. Era sa vakaraitaka e matana levu na nodra ca me vakataki Sotoma. Era na rusa, ni ra sa kauta mai vei ira na veivakarusai.

¹⁰ Tukuna vei ira na yalo dodonu, Ni na daumaka na veika kecega vei ira, Ni ra na kania na vua ni nodra cakacaka.

¹¹ Ia na tamata ca ena rusa, Ni na saumi lesu vua na veika e a cakava.

¹² O ira na gone lalai era sa vakararawataki ira noqu tamata Ka sa liutaki ira na yalewa. Kemuni noqu tamata, Era sa vakasesei kemuni na nomuni i liuliu, Mo ni kakua ni kila kina na sala mo ni lesu tale mai kina.

¹³ Sa vakarau tukuna na ka e veibeitaki kina o Jiova; Ka sa vakarau lewai ira na veimatanitu.

¹⁴ Sa kauti ira mai na qase, Kei ira na nodra i liuliu na nona tamata o Jiova me ra lewai mada. A sa beitaki ira ka kaya, “O ni sa butakoca na veiloganivaini Ka sa sinai na nomuni veivale Ena veika o ni taura mai vei ira na dravudravua.

¹⁵ Sa sega ni tu vei kemuni na dodonu, Mo ni tabaki ira sobu na noqu tamata, Ka rawa ka mai vei ira na dravudravua. Oi au, o Jiova ni lewevuqa sa kaya vakaoqo.”

Ai Vakasala vei Ira na Yalewa ni Jerusalemi

¹⁶ A sa kaya o Jiova, “Raica mada na nodra dokadoka na gone yalewa ni Jerusalemi Era sa dau rai tu ga ki cake ni ra lako, Ka sa kunei sara tu ga e matadra na gagadre ca. Era dau kalawa vakaleleka ni ra lako, Ka me qai rorogo tu na i ukuuku ni yavadra.

¹⁷ Ia ena qai vakavuna o Jiova, Me cou na uludra na gone yalewa ni Saioni Ka biuti ira tu me ra luvawale.

¹⁸ Ena yaco mai na gauna ena kauta tani kina na Turaga Na veika era dau dokadokataka na yalewa ni Jerusalemi. Na veiukuuku ni yavadra, uludra kei na domodra;

¹⁹ Kei na i ukuuku ni ligadra. Ena kauta tani na nodra i pulou,

²⁰ Na nodra i sala, na i ubi ni tabadra kei na i vau ni tolodra;

²¹ Na mama ni nodra i qaqalo kei na ucudra,

²² Na nodra kote balavu, na i ubi balavu, na kote kei na nodra kato ni lavo,

²³ Na nodra i sulu lineni, i sala kei na i ubi balavu.

²⁴ Ena vakaisosomitaki na ka boi vinaka ena ka bona Ena i sosomi ni beleti na dali, Ena i sosomi ni drau ni ulu bula vinaka na ulu cou, Ena i sosomi talega ni sulu balavu voli dredre na taga, Ka i sosomi ni rairai vinaka na madua.

²⁵ Era na bale na nomuni tagane ena i seleiwau, Ka ra na bale na nomuni tamata qaqa ena i valu.

²⁶ Ena tagi ka vakaloloku na matamata ni koro Ka na vaka e dua na yalewa sa dabe tiko ena qele, ka sa luvawale.