Aisea 29 - Vakavakadewa Vou kei na iVola tale eso

Na Leqa e Yacovi Jerusalemi

¹ Ena yaco ga na leqa ki Jerusalemi, Na koro e a vakaitikotiko kina o Tevita. Laiva tale mada e dua se rua na yabaki me oti yani, Vata kei na kena veisolevu.

² Ia ena qai kauta mai na Kalou Na veika ni leqa ki Jerusalemi. Ena qai yaco na tagi kei na vakaloloku, Ka na vuki na koro me i cabocabonisoro E dau vakamai kina na i soro.

³ Ena qai valuta na koro na Kalou Ka vakavolivolita, ka sa vesuka vakaukauwa.

⁴ Ena qai yaco o Jerusalemi me vaka e dua na yalo, E saga me vosa mai na qele; Ena rogo mai na domomu mai na kuvu ni soso.

⁵ Jerusalemi o ira kece na vulagi era valuti iko, Era na cagina tani me vaka na kuvu ni soso, Me vaka na qa ni sila. Ena vakasauri ka vakidacala.

⁶ Na nona sereki kemuni o Jiova ni lewevuqa, Ena covulaca kaukauwa kei na uneune. Ena tala mai na cagilaba kaukauwa kei na bukawaqa;

⁷ Ia ena takali yani na nodra mataivalu kece na veimatanitu, Na nodra yaragi kece kei na nodra i yaya, Me vaka na tadra, na vakanananu ena dua na bogi.

⁸ O ira kece na veimatanitu era soqo vata me ra valuti Jerusalemi, Era na vaka e dua na tamata viakana e tadra ni kana tiko, Ka qai yadra mai ena nona viakana; Se vaka e dua na tamata sa mate ena viagunu, E tadra ni gunu tiko ka qai yadra ena karamaca.

Na Mataboko kei na Veidabui i Isireli

⁹ Mo ni ia sara mo ni dogadoga! Ni kitaka sara mo ni mataboko! Mo ni mateni, e segai ga mai na waini, Ni ceba ka tatabalebale, ka segai ga mai na bia.

¹⁰ Sa vakavuna vei kemuni o Jiova mo ni via moce, Ka sa vakarau mo ni na moce lutu sara. O ira na parofita e dodonu me ra matadra na tamata, Ia sa vau na matamuni, Ka ubi na ulumuni.

¹¹ Sa na vunitaki vei kemuni na i balebale kece ni raivotu vakaparofita, ka sa na vaka na i vola vivigi sa dregati. Kevaka e kau vua e dua sa kila na wilivola ka kerei me wilika vei kemuni ena kaya ni sega ni rawa ni wilika ni sa dregati tu.

¹² Kevaka e kau vua e dua e sega ni kila na wilivola ka kerei vua me wilika vei kemuni, ena kaya ni sega ni kila na wilivola.

¹³ A sa kaya o Jiova, O ira na tamata oqo era volekati au ga ena gusudra, Ka vakarokorokotaki au ena tebe ni gusudra; Ia na yalodra sa yawa tani sara mai vei au. Na nodra rerevaka na Kalou sa dua na lawa vakatamata, Era vulica me ra dau wiligusutaka.

¹⁴ Raica au na cakava tale eso na ka veivakurabuitaki, Vei ira na tamata oqo, Na veika e veivakidacalataki ka veivakidroataki;

Na Vakanuinui ki na Veigauna sa Bera Mai

¹⁵ Ena yaco na veika ca vei ira era vunia na nodra i naki, vei Jiova. Era vakayacora vuni na nodra i naki, Ka nanuma ni sega ni dua e raica se kila, na ka era cakava.

¹⁶ Era sa vukica vakatoboicu na veika kecega. O cei e bibi vei rau, na daucaka kuro qele se na qele? E rawa li ki na dua na ka e bulia na tamata, Me kaya lesu vua ka bulia ni a sega ni buli koya, Se me kaya vua na tamata ni sega ni kila e dua na ka?

¹⁷ Ena sega ni dede sa na veisau o Lepanoni me vanua ni teitei Kei na veivanua ni teitei bulabula me veikau loa.

¹⁸ Ena siga o ya era na rogoca na didivara, Ni sa wiliki ena domolevu e dua na i vola, Ka ra na rai na mataboko era bula voli ena bula ni vakayayamo.

¹⁹ Era na kunea na marau vou mai vei Jiova na yalo malumalumu. Ka ra rawata na reki na tamata dravudravua ena kedra maliwa na tamata, Vua na Kalou Yalosavasava ni Isireli.

²⁰ Ni ra sa takali yani na dauveivakasaurarataki, Ena oti yani na viavialevu, Ka ra na vakarusai na i valavala ca.

²¹ Era na vakarusai na dauvakacaca, Se o ira era tarova na nodra totogi na dauvakacaca, Kei ira era lasu me ra tarova kina na lewa dodonu, Vei ira na tamata caka dodonu.

²² Ia oqo, sa kaya o Jiova na nodra Kalou na Isireli O koya sa vakabulai Epara-ama mai na nona leqa, “Era na sega tale ni madua na noqu tamata, Se vulaci na matadra ni ra vakamaduataki.”

²³ Ni sa raici ira na luvena, Na cakacaka ni ligaqu ena kedra maliwa; Era na vakarokorokotaka na yacaqu; Era sa rokova na Le Dua Yalo Savasava i Jekope, Ka rerevaka na nodra Kalou na Isireli.

²⁴ O ira sa cala na yalodra Era na yalomatua tale, O ira era dau vosa kudrukudru, Era na vinakata tale me ra vakavulici.