Aisea 24 - Vakavakadewa Vou kei na iVola tale eso

O Jiova ena Totogitaka na Vuravura

¹ Sa voleka ni vakatoboicutaka o Jiova Na vuravura ka biuta tu me lala. Ena moica na dela i vuravura Ka cakava me ra veiseyaki na lewena.

² NI sa tautauvata ga na ka ena yaco Vei ira na bete kei ira na tamata, Na bobula kei ira na nodra turaga, Na dauveivoli kei ira era mai volivoli, O ira na daudinau kei ira na dausoli dinau, Vei ira na vutuniyau kei na dravudravua.

³ Ena lala sara na vuravura ka vakacacani, Sa i koya oqo na vosa ka tukuna o Jiova.

⁴ Sa mamaca sara na vuravura ka vuca yani. Sa malumalumu mai na vuravura taucoko, Ka sa vakacacani na vuravura kei na maliwa lala.

⁵ Era sa vakadukadukalitaka na vuravura na lewena, Ena nodra voroka na lawa ni Kalou; Ka vakacacana na veiyalayalati tawa mudu e a cakava o koya.

⁶ O koya oqo sa cudruva kina na vuravura na Kalou, Ka sa saumi vei ira na tamata na nodra i valavala ca, Era sa malai yani kina na lewe i vuravura, Ka ra sa lewe lailai sara ga era sa vo ka bula tiko.

⁷ Sa malai na veivaini, Ka sa lailai sara na waini, Era sa mai rarawa tiko yani, O ira era a dau marau e liu.

⁸ Sa mudu na rogo ni domo ni nodra i vakatagi ni marau, Ka sa oti na rorogo ni domo ni dramu.

⁹ Sa sega tale ni ra qai gunu waini Ka laga sere tiko; Sa gaga na wai ni gunu kaukauwa vei ira era gunuva.

¹⁰ Sa vakacacani na veika kecega sa tu ena koro, Sa sogo na veivale kecega, Ka sa sega ni rawa ni dua na tamata me curu.

¹¹ Sa rorogo na domo ni kacikaci ena veigaunisala, Ni sa sega na waini, Sa oti vakadua na reki, Ka sa takali na marau ni vanua.

¹² Sa rusa tu na koro, Ka sa kabasu tu na kena veimatamata ni koro.

¹³ Sa i koya oqo na ka ena yaco, Ena veimatanitu kecega e vuravura. Ena vaka ni sa cava na tatamusuki, Ni sa samu na taba ni olive, Ka veti na i otioti ni qerepi mai vuna.

¹⁴ Era na tabalaka cake na domodra na tamata Ka sere ena reki. O ira mai na ra era na tukuna na lagilagi ni Kalou.

¹⁵ Ka ra na vakacaucautaki koya mai na tokalau. Era na vakacaucautaki Jiova na Kalou ni Isireli, Na tamata era tiko ena veibaravi.

¹⁶ Eda na rogoca mai na i yalayala kei vuravura Na sere ni veivakacaucautaki vei Isireli, Na matanitu i valavala dodonu. Ia sa oti na noqu vakanuinui Au sa malumalumu sobu tikoga mai. Era sa ia tikoga na veicakitaki na dauveicakitaki, Ka sa qai toro cake ga na ca ni nodra veivakaisini, Na dauveivakaisini.

¹⁷ Kemuni na lewe i vuravura, Sa waraki kemuni tu na rere, na qara kei na dai.

¹⁸ O koya ena dro ena nona domobula, Ena lutu ena qara. O koya ena drotaka na qara, Ena coko ena dai. Ni sa na tadola na katubaleka kei lomalagi, Ena yavala sara ga na yavu kei vuravura.

¹⁹ Sa kavoro na vuravura, Ka sa kaca rua, Ka yavala vakaukauwa sara.

²⁰ Ena tataivatia na vuravura me vaka e dua Na tamata mateni Ka veisuayaki me vaka e dua na vale sega ni caka vinaka ena cagilaba. Sa bikai sobu na vuravura ena kena i valavala ca, Ka sa na bale ka na sega ni tucake rawa tale.

²¹ Ena yaco mai na gauna, Me totogitaki ira kina na veikaukauwa mai lomalagi, Kei ira na tui e vuravura o Jiova.

²² Ena soqoni ira vata na tui ki na dua na qara, Me vakataki ira na kaivesu. Ena sogoti ira ena vale ni veivesu Me yacova ni sa yaco mai na gauna ni nodra totogi.

²³ Sa na butobuto na vula, Ka sa na sega tale ni cila na matanisiga, Baleta ni sa na tui o Jiova ni lewevuqa. Ena veiliutaki tiko mai Jerusalemi Ena ulunivanua o Saioni; Era na raica na nona lagilagi, Na nodra i liuliu na tamata.