Aisea 23 - Vakavakadewa Vou kei na iVola tale eso

Ai Tukutuku me Baleti Taia

¹ Oqo e dua na i tukutuku baleti Taia. Mo ni vakaisaisa ka tagi na dausoko ni Tasisi, Ni sa vakarusai na nomuni i kelekele ni waqa, Ka sa ca na kena toba kei na kena veivale. Ni sa na lesu mai na nomuni waqa mai Saipurusi, O ni sa na qai kila na kena i tukutuku.

² Ni tagi na tiko mai baravi, Oi kemuni na dauveivoli mai Saitoni, Era sa takosova na wasawasa na nomuni i talai

³ Ka ra sa tiko ena loma ni wasawasa. Sa sala ni nomuni rawa i lavo na sila mai Siori, Na vua ni qele ena bati ni uciwai na Naile; O iko na dauveivoli ni veivanua kece.

⁴ Mo madua mada, na koro o Saitoni! Ni sa biuti iko na waitui kei na wasa titobu, ka kaya, “Au sa sega ni bau taratara se vakasucu, Ka'u sa sega talega ni susuga e dua na cauravou, Se meimei vua e dua na gone yalewa.”

⁵ Era na kurabui ka veilecayaki na kai Ijipita, Ena rusa sa yacovi Taia.

⁶ Ni lako yani ki Tasisi, Ka mo ni tagi na vakaitikotiko ena baravi.

⁷ Sa i koya li oqo na nomuni koro qaqa, Ka sa tauyavutaki makawa sara? Sa i koya li oqo na koro sa talai ira yani na tamata, Ki na tai ka dua ni wasawasa me ra tauyavutaka Na veivanua?

⁸ O cei li sa nakita vakaoqo Na kena saqati o Taia na koro turaga, Ka ra sa turaga dokai na kena dauveivoli, Era sa kilai e vuravura taucoko.

⁹ Sa nakita na ka oqo o Jiova ni lewevuqa, Me muduka kina na nodra dokadoka na veika era cakava, Ka vakamaduataki ira na kena tamata dokai.

¹⁰ Kemuni na kai Tasisi ni la'ki teivaka na nomuni vanua. Ni sa sega tale ni dua me taqomaki iko.

¹¹ Sa dodoka yani na ligana na Turaga ki na wasawasa, Ka yavalata na veimatanitu. A sa solia na i vakaro me baleti Kenani, Me vakarusa na kena veitikotiko kaukauwa.

¹² A sa kaya na Turaga: I Saioni, sa oti vakadua na nomu gauna ni marau, Era sa vakararawataki na nomu lewe ni vanua. Kevaka mada ga mo ni dro ki Saipurusi, Era na sega ga ni tiko vakacegu.

¹³ (Sa i ira ga na kai Papiloni ka sega ni o ira na kai Asiria era sa laivi ira na manumanu kila me ra ia na vakacaca mai Taia. O ira na kai Papiloni era a tara cake talega na i kabakaba me valuti kina na koro; era a basuraka sobu na bai kei Taia, ka laiva tu na koro ni sa rusa tu.)

¹⁴ Ni tagi na dausoko mai Tasisi, Ni sa vakarusai na koro o ni vakanuinui kina.

¹⁵ Ena yaco mai e dua na gauna ena guilecavi kina o Taia me 70 na yabaki, na dede ni gauna ni nona bula e dua na tui. Ni sa na oti na 70 na yabaki o ya, ena qai yaco o Taia me vaka na yalewa dautagane ena sere:

¹⁶ Taura na nomu api, qai wavokita na koro, O iko na yalewa dautagane sa guilecavi! Qiria ka laga tale mada na nomu sere e vuqa, Me kauti ira lesu tale mai na tagane.

¹⁷ Ni sa na oti na vitusagavulu na yabaki, sa na qai solia o Jiova me lesu tale o Taia ena kena i vakarau ni bula ni veivoli e liu, ka na qai volitaki koya yani vei ira na veimatanitu kecega e vuravura.

¹⁸ Na i lavo ena rawata ena nona veivoli ena vakacabori vei Jiova. Ena sega ni vakauta tani, ia era na vakayagataka ga o ira sa qaravi Jiova me ra volia kina na i sulu kei na kakana era vinakata.