Aisea 21 - Vakavakadewa Vou kei na iVola tale eso

Na Raivotu ni Bale nei Papiloni

¹ Oqo e dua na i tukutuku baleti Papiloni, Me vaka na kena lako mai na covulaca mai na ceva, Sa na lako mai vakakina na veika vakadomobula Mai na dua na vanua rerevaki.

² Au a raica e dua na raivotu ni veika vakadomobula ena yaco, Era na butako na daubutako, Ka veivakarusai na dauveivakarusai. Ni la'ki valu na mataivalu ni Ilama! Ni buku na druadrua ena koro na mataivalu ni Mitia! Na veivakararawataki sa vakavuna o Papiloni Ena muduka kece na Kalou.

³ Na veika au raica ka rogoca ena raivotu, Sa vakasinaiti au ena domobula kei na rere, Kei na mosi me vaka na taratara ni yalewa bukete.

⁴ Sa cowiri na uluqu ka'u sautaninini ena rere, Au a gadreva me yaco mai na yakavi, Ia sa qai kauta talega mai vei au na rere.

⁵ Ena raivotu au a raica, Ni sa vakarau tu e dua na magiti ni kana vata. Sa tevu tu na i sulu me ra dabe kina na vulagi, A sa tekivu me ra kana ka gunu. Sa qai kacivaki mai vakasauri, “Kemuni na turaganivalu! Ni vakarautaka Na nomuni i sasabai!”

⁶ Ia sa qai kaya vei au o Jiova, “Lako ka la'ki lesia e dua na tamata yadra, Ka tukuna vua me vakaraitaka mai na ka a raica.

⁷ Kevaka sa raica ni ra sa lako mai na tamata Ka ra vodo ose, Ka ra lako vakaveisa yarua mai, Kei ira era vodo mai ena asa kei na kameli, Tukuna vua me vakaraici ira vinaka sara.”

⁸ Sa qai kailavaka mai na tamata yadra, “Kemuni na Turaga, Au sa dau yadra tiko ena i tikotiko ni yadra, Ena veisiga kecega.”

⁹ Era sa qai lako mai oqo na tamata era vodo ose, Era lako yarurua mai. “Sa bale, sa bale o Papiloni! Era sa kavoro kece tu na matakau Era dau qarava ena dela ni qele.”

¹⁰ Kemuni na noqu tamata, O ni a samulaki me vaka na witi, Ia oqo au sa kacivaka vei kemuni Na i tukutuku vinaka, Au sa rogoca mai vei Jiova ni lewevuqa, Na nodra Kalou na Isireli.

Ai Tukutuku me Baleti Itomi

¹¹ Oqo e dua na i tukutuku me baleti Itomi. A sa kaci mai vua na sotia yadra. “Sotia yadra, ena qai oti ena gauna cava na bogi? Tukuna vei au na gauna ena qai oti kina.”

¹² Sa qai kaya na sotia yadra, “Sa kida mai na mataka, Ia ena lako tale mai na bogi! Kevaka o via taroga tale mai, Lesu mai ka mai taroga tale.”

Ai Tukutuku me Baleti Arapea

¹³ Oqo e dua na i tukutuku baleti Arapea. Kemuni na kai Titani, O ni na mai vakeba tiko ena vanua talasiga mai Arapea.

¹⁴ Ni solia na wai vei ira era viagunu Era lako mai vei kemuni. Kemuni mai na vanua o Tema, Ni solia na madrai vei ira era sa dro mai.

¹⁵ Era sa dro mai na tamata mai na i seleiwau, Sa vakarau me vakamatei ira, Na dakaititi sa vakarau vanai ira, Kei na vakarerevaki ni i valu.

¹⁶ Ia sa qai kaya vei au na Turaga, “Ena loma ga ni dua vinaka na yabaki, sa na oti kina na lagilagi kei Kitari.

¹⁷ Era na qai vo ga e vica wale sara na dauvavana yaloqaqa mai Kitari, ni'u sa kaya vakaoqo oi au o Jiova na nodra Kalou na Isireli.