Aisea 20 - Vakavakadewa Vou kei na iVola tale eso

Na i Vakatakilakila ni Parofita Luvawale

¹ A sa tala mai o Sarikoni na tui Asiria na nona turaganivalu liu ka sa kaba na koro o Asitoti ka taura.

² Ena gauna vata oqori e a tukuna kina o Jiova vei Aisea na luve i Emosi, “Mo lako ka la'ki luvata na nomu i sulu taga mai na tolomu ka vaka talega kina na nomu i vava ka mai veilakoyaki luvawale voli yani ka sega ni vakaivava.

³ A sa qai kaya o Jiova, “Na noqu tamata o Aisea e sa veilakoyaki luvawale voli ka sega ni vakaivava me tolu na yabaki me i vakatakilakila ni ka ena yaco vei Ijipita kei Eciopea.

⁴ Ena kauti ira luvawale yani vakabobula na tamata era vesu mai na vanua e rua oqori o koya na tui Asiria. Na gone kei na qase era na lako luvawale ka sega ni vakaivava ka ra na vakaraitaka tu yani na tiki ni yagodra tabu me vakamaduataki kina o Ijipita.

⁵ O ira kece era vakararavi vei Eciopea ka cibitaki Ijipita era na vakacalai ka na oti na nodra vakanuinui.

⁶ Ena siga o ya era sa kaya o ira kece era tiko ena baravi kei Filisitia, ‘Ni raica na ka sa yacovi ira na tamata eda sa vakararavi vei ira me ra taqomaki keda mai vua na tui Asiria! Eda na dro rawa li vakacava?’ ”