Aisea 2 - Vakavakadewa Vou kei na iVola tale eso

Na Vakacegu Tawamudu

¹ Sa i koya oqo na i tukutuku e a vakaraitaka vei Aisea na luve i Emosi me baleti Juta kei Jerusalemi.

² Ena yaco mai na gauna, Sa na cecere duadua kina, Na ulunivanua e duri tu kina na Valenisoro. Era na lako yani kina na veimatanitu kecega, Ka ra na kaya na tamata,

³ “Me da cabe cake ki na ulunivanua i Jiova Ki na Valenisoro ni nodra Kalou na Isireli. Me da vulica kina na ka sa vinakata me da cakava, Ka muria na gaunisala sa digitaka. Sa lako mai Jerusalemi na i vakavuvuli i Jiova Ka sa vosa mai Saioni vei ira na nona tamata.”

⁴ Ena vakatulewa vei ira na veimatanitu o koya. Era na tukitukia na nodra i seleiwau me bati ni siviyara, Kei na nodra moto me i sele ni sasamaki. Era sa na sega tale ni veivaluvaluti na veimatanitu, Se vakavakarau tale ki na i valu.

⁵ Kemuni na kawa i Jekope, me da lako voli ena rarama i Jiova!

Cudruvi o Ira na Dokadoka ka Viavialevu

⁶ Kemuni na Kalou, o ni sa biuti ira na nomuni tamata, O ira na kawa i Jekope. Sa sinai na vanua vei ira na daucakamana Kei ira na daucakaisausau era vakataki ira mai Filisitia, Ka ra sa robota na kai matanitu tani na vanua kecega.

⁷ Sa sinai na nodra vanua ena siliva kei na koula; Ka sa sega ni wili rawa na nodra i yau. Sa sinai na nodra vanua ena ose; Ka sa sega ni wiliki rawa na nodra qiqinivalu.

⁸ Sa sinai na nodra vanua ena matakau, Ka ra sokalou ki na veika ga era cakava ena ligadra.

⁹ Ena ka oqo era sa vakamalumalumutaki kina Ka vakamaduataki na tamata kecega. Ni kakua sara ni vosoti ira Turaga!

¹⁰ Ni lako ki na veiqara vatu, Ka vunitaki kemuni ki na qele, Mai na cudru i Jiova Se mai na i serau ni nona i ukuuku.

¹¹ Na mata viavialevu ni tamata ena vakamalumalumutaki, Ka na buturaki sobu na nodra dokadoka. Ena siga o ya sa na vakacerecerei taudua ga kina o Jiova.

¹² Ni sa dua na siga i Jiova ni lewevuqa, Me vakamalumalumutaki ira kina na viavialevu kei na dokadoka, Kei ira na dokai kei na cecere talega.

¹³ Ena vakarusai ira na sitari babalavu kei Lepanoni, Kei na oki kecega ni vanua o Pasani.

¹⁴ Ena vakatautauvatataka na veiulunivanua kei na veidelana,

¹⁵ Na veivale cecere kei na bai ni vale kecega.

¹⁶ Ena vakadromuca na waqa kecega ni Tasisi, Kei na i yaya kecega e gadrevi ka dau divi.

¹⁷ Sa na qai vakamalumalumutaki na viavialevu ni tamata Ka buturaki sobu na nodra dokadoka. Ia ena siga o ya, Sa na qai vakacerecerei taudua ga kina o Jiova,

¹⁸ Ia na veimatakau era na yali vakadua sara.

¹⁹ Era na vuni na tamata ena veiqara vatu, Ka kelia na qara ena loma ni qele, Me ra dro tani kina mai na cudru i Jiova, Ni sa lako mai me yavalata na vuravura.

²⁰ Ni sa na yaco mai na siga o ya, Era a viritaka na tamata na nodra matakau siliva, Kei na nodra matakau koula; Era a cakava ga ena ligadra me ra qarava; Ka solia ki na dua na mataqali manumanu era vaka na kalavo kei na beka.

²¹ Ni sa na lako mai o Jiova me yavalata na vuravura Era na vuni na tamata ena loma ni qele Kei na veiqara vatu ena veidelana veivatu; Me ra drotaka kina na cudru i Jiova Se vunitaki ira mai na i serau ni nona i ukuuku.

²² Ni kakua ni vakararavi ki na tamata Ni sa vaka ga na i cegu sa tiko e ucuna. Na cava sa yaga kina o koya?