Aisea 18 - Vakavakadewa Vou kei na iVola tale eso

Na Kalou ena Totogitaki Eciopia

¹ Isa, na vanua sa rogo kina domo ni vakatetaba, Ena vanua e sivia yani na veiuciwai kei Eciopea,

² Era sa vakauti na veimataki ena Naile, Ena waqa masi ena dela ni wai! Ni lako yani, na dauvakau i tukutuku totolo, Ki na matanitu sa balabalavu ka yago lumisa, Ki na kawa tamata sa rerevaka raraba, Na matanitu sa kaukauwa ka qaqa, Ka sa tawase na kena vanua kei na uciwai.

³ Ni rogoca mada na tamata kece o ni tiko e vuravura, Oi kemuni kece o ni bula tiko e vuravura. Ni sa vakarewataka cake e dua na drotini i vakatakilakila Ena dela ni veiulunivanua, ni raica! Ni o ni sa rogoca ni sa tagi na davui, ni vakarorogo!

⁴ Ni sa kaya vei au o Jiova, “Au na rai sobu mai vakamalua ena noqu i tikotiko Me vaka na katakata savasava ni matanisiga Ena siga katakata, Ka vaka na o katakata ni tegu Ena vula i tatamusuki.

⁵ Ni se bera ni veti na qerepi, Ni se qai mira na sena ka tekivu dreu, Era sa na vakarusai Eciopea na meca, Me vaka na rawarawa ni musu ni taba ni vaini ena i sele.

⁶ Ena qai biu tu na yagodra me kedra, Na manumanu vuka ena veidelana, Kei na manumanu kila ena dela i vuravura. Era na mai kania na yagodra na manumanu vuka Ena vula i katakata, Kei na manumanu kila ena vula i batabata.”

⁷ Ena gauna o ya ena kau mai vei Jiova ni lewevuqa Na i loloma mai na matanitu kaukauwa ka qaqa, Na nodra vanua na tamata babalavu ka yago dravia ena ulu ni Naile. Era sa tamata rerevaki e vuravura taucoko. Era na lako mai ki na ulunivanua o Saioni, Na vanua sa dau qaravi kina o Jiova ni lewevuqa.