Aisea 17 - Vakavakadewa Vou kei na iVola tale eso

Na Kalou ena Totogitaki Tamasiko kei Isireli

¹ Sa i koya oqo na i tukutuku me baleti Tamasiko. A sa kaya o Jiova, “Raica, ena muduki o Tamasiko me dua na koro levu, Era na yaco me veiyavu ni vale sa rusa.

² Era sa na biu lala tu na veikoro e Siria ka tawa mudu. Era na yaco me vanua ni vakacegu ni sipi kei na bulumakau; Ka na sega ni dua me na vakasavi ira.

³ Sa na yali na bainivalu mai Ifereimi, Ka sa na oti na nona yaco me matanitu o Tamasiko. Era na qai vakamaduataki na vo-ni-bula ni Siria, Me vakataki ira na Isireli,” Sa kaya vakaoqo o Jiova ni lewevuqa.

⁴ Sa kaya o Jiova, “Ena siga o ya, Sa na buturaki sobu kina na lagilagi i Isireli, Ka na vakaisosomitaki na nona vutuniyau ena dravudravua.

⁵ Ena qai yaco o Isireli me vaka e dua na buca, Sa tamusuki oti na kena sila, Ka na lala tu me vaka e dua na vanua ena buca o Refaimi, Ni sa tamusuki oti na kena vuata.

⁶ Ena qai vo wale ga e vica wale sara na tamata, Ka na yaco o Isireli me vaka e dua na vuniolive, Sa tau kece sara na vuana, Ka qai vo toka ga e rua se tolu e tuvukana, Se va se lima ena veitabana;” Sa i au ga o Jiova na Kalou ni Isireli sa kaya oqo.

⁷ Ena siga o ya era na qai gole na tamata vua na veibuli na Le Dua Yalo Savasava ni Isireli me vukei ira.

⁸ Era sa na sega tale ni qai vakararavi ki na veicabocabo ni soro era cakava ga e ligadra se vakadinati na veika era cakava ga ena ligadra, o ya na i vakatakarakara ni kalou yalewa o Asera kei na i cabocabonisoro me vakamai kina na ka boi vinaka.

⁹ Ena siga o ya, ena biu lala tu mai na nodra veikoro vakabai me vaka na nodra veikoro na Aivaiti kei na Amoraiti era a vakalala tu mai ka dro tani mai vei ira na Isireli.

¹⁰ Kemuni na Isireli, O ni sa guilecava na Kalou ka sa vakabulai kemuni. Ia o ni sa tea na veikau talei, Mo ni qarava kina e dua na kalou tani.

¹¹ Kevaka sara mada ga e kadre ka se ena siga e tei kina, Na vuana ena cagina tani yani, Ena siga ni rarawa kei na vutu e sega ni mudu rawa.

Era sa Vakadrukai na Veimatanitu Meca

¹² Rogoca mada! Na nodra maue na veimatanitu e vuqa, Sa vadugu me vaka na vadugu ni wasawasa, Ka vaka na rorogo ni veibiau lelevu.

¹³ Era sa vadugu na veimatanitu Me vaka na vadugu ni biau lelevu. Ia ni sa vauci ira na Turaga, Era na qai dro tani yani vakayawa, Me vaka na qa ni sila sa cagina yani ena cagi Ki na veiulunivanua, Kei na kuvu ni soso ena covulaca.

¹⁴ Ena yakavi era sa vakavuna na rere, Ia ena mataka lailai era sa lako tani yani. Sa i koya oqo na ka ena yaco vei ira Era sa butakoca na noda vanua.