Aisea 16 - Vakavakadewa Vou kei na iVola tale eso

Sotava na Leqa o Ira na Kai Moapi

¹ Era sa vakauta mai eso na lami na kai Moapi, Me i loloma vei koya sa veiliutaki e Jerusalemi. Era sa kau mai na lami mai Sela, Ena sala mai na vanua dravuisiga.

² Era sa vaka na manumanu vuka sa sese, Se na luve ni manumanu vuka sa veiseyaki Na kai Moapi era sa mai toka ena bati ni uciwai na Arimoni.

³ Era sa kaya vei ira na kai Juta, “Ni taqomaki keimami me vaka e dua na vunikau, Sa vakarurugi keimami mai na katakata ena siga levu. Ni laivi keimami me keimami vakarurugi kemuni. Keimami sa dro mai, Ni vunitaki keimami me kakua ni dua e raici keimami.

⁴ Ni laivi keimami me keimami tiko kei kemuni, Ka taqomaki keimami mai vei ira era via vakarusai keimami.” Na veivakararawataki kei na veivakarusai ena oti. O ira talega era vakacacana na vanua era na oti yani.

⁵ Ia sa na qai yaco me tui e dua na kawa i Tevita, Ka na liutaki ira na tamata ena yalodina kei na loloma. Ena dautotolo me vakayacora na ka dina, Ka na raica me caka na ka dodonu,

⁶ Era sa kaya na kai Juta, “Keimami sa rogoca na qaciqacia i Moapi; Sa dokadoka dina o koya! Sa kilai na nona viavialevu kei na veivakaisini; Sa lasu ga na nona tukutukuni koya.

⁷ Era na tagi na kai Moapi Ena vuku ni leqa era sotava. Era na tagi ni ra nanuma na keke ni Kiri-erese, Ka ra na vakasavi ena domobula,

⁸ Sa vakarusai na i teitei volekati Esiponi, Ka vakarusai na veivaini mai Sipima, Na veivaini sa caka mai kina na waini, Sa dau vakamatenitaki ira na i liuliu. Ena dua na gauna e a tete sara ki Jasa kei na vanua dravuisiga, Ka vakakina na ra vaka ki na Waitui Mate.

⁹ Ia oqo au sa tagicaka na waini ni Sipima, Me vaka na noqu tagicaki Jasa. Sa tiri na wai ni mataqu me baleti Esiponi kei Elala, Baleta ni sa sega tale na vuata me ra marau kina na tamata.

¹⁰ Sa kau tani na reki kei na marau mai na vanua ni teitei bulabula, Ka sa sega na sere e lagati se kaila me rorogo, ena veiloganivaini. Sa sega na daubutu qerepi ena vanua ni caka waini, Ka sa mudu na kaila ni marau.

¹¹ O koya oqo sa tagi kina na yaloqu Me vaka na api me baleti Moapi Ka luluvu na lomaqu me baleti Kiri Erese.

¹² Era sa vakaocai ira wale na kai Moapi ena nodra lako yani ki na nodra veicabocabo ni soro ena veidelana kei na nodra lako ki na nodra veivale tabu me ra masu; ia sa sega ni solia e dua na ka vinaka vei ira.

¹³ Sa i koya oqo na i tukutuku e a tukuna e liu na Kalou me baleti Moapi.

¹⁴ Ia oqo sa qai kaya o Jiova, “Ena loma ga ni tolu vinaka na yabaki, sa na yali kina vakadua na lagilagi kei Moapi. Veitalia ga na kedra levu; era na lewe lailai sara era na bula, ka ra na malumalumu sara.”